سوڈان کی حکمراں فوج کے ساتھ قریبی تعلقات رکھنے والے دونوں عرب ریاستوں نے بغاوت کے بعد اپنے بیانات میں صرف ملک میں استحکام پر زور دیا تھا۔ تاہم اب چار ممالک امریکا، برطانیہ، سعودی عرب اور متحدہ عرب امارات کی طرف سے جاری مشترکہ بیان میں کہا گیا ہے،”ہم سوڈان میں سویلین قیادت والی عبوری حکومت اور اداروں کی مکمل اور فوری طور پربحال کرنے کی اپیل کرتے ہیں۔"

امریکی وزارت خارجہ کی جانب سے جاری کردہ اس بیان میں کہا گیا ہے،”ہم ملک میں ایمرجنسی کو ختم کرنے اور ان تمام افراد کی رہائی کی بھی اپیل کرتے ہیں جنہیں حالیہ واقعات کے بعد حراست میں لیا گیا ہے۔"  بیان میں مزید کہا گیا ہے،”نئے سوڈان میں تشدد کے لیے کوئی جگہ نہیں ہے اوراس مرحلے پر ہم تمام فریقوں کے درمیان موثر مذاکرات کی تائید کرتے ہیں اور تمام فریقین سے اپیل کرتے ہیں کہ وہ سوڈان کے عوام کے لیے امن اور سلامتی کو یقینی بنانے کو اپنی اولین ترجیح دیں۔"

امریکا کی جانب سے مذمت

امریکا نے فوج کے ذریعہ 25 اکتوبر کو اقتدار پر قبضہ کرلینے کی مذمت کی ہے۔ فوجی بغاوت سے قبل سوڈان میں اس وقت ایک انتہائی نازک عبوری حکومت تھی، جس میں وزیر اعظم عبداللہ حمدوک کی قیادت والی سویلین حکومت میں فوجی رہنما بھی شامل تھے۔ بغاوت کے بعد عبداللہ حمدوک کو پہلے گرفتار کیا گیا پھر انہیں گھر میں نظر بند کر دیا گیا۔ امریکا نے اس واقعے کے بعد سوڈان کو مجوزہ 700 ملین ڈالر کی مالی امداد فوری طورپر روک دی تھی۔

سوڈان کی فوج کو افریقی یونین کی طرف سے بھی دباو کا سامنا ہے۔ اس نے ”سویلین قیادت والی عبوری اتھارٹی کے موثر بحالی" تک سوڈان کے ساتھ اپنے تعلقات منقطع کر لیے ہیں۔

قابل ذکر بات یہ ہے کہ چاروں ملکوں کی طرف سے جاری مشترکہ بیان میں سوڈان کا پڑوسی مصر شامل نہیں ہے۔ بغاوت کے بعد ملک میں ہونے والے جمہوریت نواز مظاہروں میں لوگوں نے قاہرہ کے رویے پربھی ناراضی کا اظہار کیا۔

بحران کا حل تلاش کرنے کی کوشش جاری

امریکا، برطانیہ، سعودی عرب اور متحدہ عرب امارات کی جانب سے مشترکہ بیان ایسے وقت آیا ہے جب سوڈان کے بحران کا بات چیت کے ذریعہ حل تلاش کرنے کی کوششیں کئی دنوں سے جاری ہیں۔ فوج کے سربراہ جنرل عبدالفتاح برہان نے گزشتہ ہفتے کہا تھا کہ وہ ٹیکنوکریٹس پر مشتمل ایک نئی حکومت تشکیل دینا چاہتے ہیں اوراس کی قیادت عبداللہ حمدوک کو سونپی جا سکتی ہے۔

تاہم عبداللہ حمدوک کے دفتر نے بدھ کے روز ان خبروں کی تردید کی کہ وہ ایک نئی حکومت کی قیادت کے لیے رضامند ہو گئے ہیں اور زور دیا کہ معزول وزیر اعظم کسی طرح کی بات چیت میں اسی وقت شامل ہوں گے جب تمام گرفتار شدگان کو رہا اور حکومتی اداروں کو بحال کر دیا جائے گا۔

ایک فیس بک بیان میں انہوں نے کہا،”وزیر اعظم عبداللہ حمدوک، جنہیں فوجی حکام کی حکم پر ان کی رہائش گاہ پر نظر بند کردیا گیا ہے، ان شرائط پر قائم ہیں کہ کسی طرح کی بات چیت شروع کرنے سے قبل تمام گرفتار شدگان کو رہا کیا جائے اور تمام آئینی اداروں کی 25 اکتوبر سے قبل کی حیثیت بحال کی جائے۔"

فوج نے حمدوک کو اپنے حامیوں سے بات چیت کرنے سے روک دیا ہے۔

مظاہرے اور ہلاکتیں

سوڈان میں سویلین حکومت کی بحالی اور فوجی حکومت کے خاتمے کے لیے متعدد شہروں میں مظاہرے ہوئے، جن میں ہزاروں افراد نے حصہ لیا۔

پچیس اکتوبر کو ہونے والی فوجی بغاوت کے بعد سے مظاہروں میں اب تک تقریباً ایک درجن افراد ہلاک ہو چکے ہیں۔ دارالحکومت خرطوم اور ملک کے دیگر اہم شہروں میں فوجی اہلکار تعینات کردیے گئے ہیں۔

دریں اثنا فوجی سربراہ عبدالفتاح برہان نے دعویٰ کیا کہ ملک کو خانہ جنگی سے بچانے کے لیے اسے اپنے ہاتھوں میں لینا ضروری ہوگیا تھا۔ انہوں نے یہ دعویٰ بھی کیا کہ سیاسی رہنماوں میں اختلافات بہت بڑھ گئے تھے۔

خیال رہے کہ سن 2019 میں عمر البشیر کی حکومت کو معزول کرنے کے بعد نئی سویلین حکومت کے انتخاب تک ملک کا نظام چلانے کے لیے فوجی اور سویلین رہنماوں پر مشتمل ایک عبوری کونسل قائم کی گئی تھی۔

ج ا/ ص ز (اے پی، اے ایف پی، روئٹرز)