کورونا وبا کے لاک ڈاؤن کے بعد آخر کار جرمنی میں بالی ووڈ کے مداحوں نے ایک مرتبہ پھر سینما گھروں کا رخ کیا۔ انڈو جرمن فلم ویک کے منتظم اشٹیفان اوٹن بُرخ نے ڈی ڈبلیو اردو کو بتایا کہ پانچ سو سیٹوں کے سنیما ہال میں صرف ڈھائی سو حاضرین کو فلم بینی کی اجازت دی گئی۔

چوبیس ستمبر سے شروع ہونے والے انڈو جرمن فلم ویک میں بیس سے زائد فلموں کی نمائش کی گئی۔ فیسٹیول کے دوران کورونا وائرس سےبچاؤ کے لیے سخت احتیاطی تدابیر کا بندوبست کیا گیا۔

برلن میں انڈو جرمن فلمی میلہ بھارت کے روایتی ملبوسات پسند کرنے والے جرمن خواتین و حضرات کے لیے ساری اور کرتا پجامہ پہننے کا ایک بہترین موقع ہوتا ہے۔ اس فیسٹیول کی افتتاحی تقریب میں زیادہ تر افراد رنگ برنگے ملبوسات زیب تن کر تے ہیں۔

کورونا وبا کی وجہ سے بھارتی ستارے برلن میں فیسٹیول میں شرکت تو نہ کر سکے لیکن ہدایتکار پرکاش جھا، اداکارہ تنشتھا چیٹرجی اور عادل حسین جیسے چند ستاروں نے ایک ہفتے پر مشتمل فیسٹیول کے دوران شرکا کے ساتھ آن لائن سیشنز میں اپنی فلموں کے بارے میں بات چیت کی۔

فلم ویک کی افتتاحی تقریب میں برلن کے مقامی بالی ووڈ ڈانس گروپ ’بالی ووڈ انزیمبل رنگ دے‘ نے شاندار پرفارمنس پیش کی۔ اس ڈانس گروپ کی جانب سے برلن میں بالی ووڈ ڈانس کی باقاعدہ کلاسز کا بندوبست بھی کیا جاتا ہے۔

انڈو جرمن فلم ویک کے اختتام پر فلم جیوری کی جانب سے تنشتا چیٹرجی کی فلم ’روم روم میں‘ بہترین فلم، عادل حسین بہترین اداکار، اور اوشا یادیو کو بہترین اداکارہ کے انعام سے نوازا گیا۔ فلم بینوں نے بہترین فلم کے لیے ’موتھون دی ایلڈر ون‘ کا انتخاب کیا۔

برلن میں انڈو جرمن فلم ویک کے موقع پر ہر سال جرمنی بھر سے انڈیئن سنیما کے شائقین شرکت کرنے پہنچتے ہیں۔ اشٹیفان نے بتایا کہ کورونا کی وجہ سے نئی فلموں کی باقاعدہ نمائش بھی رک گئی ہے۔ اس وجہ سے انہوں نے ہندی فلم ’بالا‘ کو چھوٹے سنیما ہال میں دوبارہ نشر کرنے کا فیصلہ کیا۔

امیکال نامی تنظیم نے بھارتی سفارتخانے کے تعاون کے ساتھ مل کر جرمنی میں مقیم بھارتی اور جرمن شہریوں کے لیے مفت بھارتی کلاسیکل رقص، یوگا، اور کوکنگ کلاسز کا بھی اہتمام کیا۔

اشٹیفان اوٹن برخ تقریباﹰ ایک دہائی کے عرصے سے جرمنی میں بالی ووڈ فلموں کی نمائش کے لیے کوشش کر رہے ہیں۔ ان کے بقول، جرمنی میں بالی ووڈ فلموں کو بہت پسند کیا جاتا ہے لیکن برطانیہ اور امریکا کے مقابلے میں فلم بینوں کی تعداد کم ہونے کی وجہ سے فلم ڈسٹریبیوٹرز جرمنی پر زیادہ توجہ نہیں دیتے۔ ان کے بقول، ’’کورونا وائرس کی وبا نے نئی فلموں کی اسکریننگ کو مزید مشکل بنا دیا ہے۔‘‘

ایرانی ہدایتکار محمد رسولاف کی فلم ’برائی کہیں نہیں‘ کو برلینالے فلم فیسٹیول کا سب سے بڑا انعام یعنی ’گولڈن بیئر‘ دیا گیا۔ یہ فلم مختصر دورانیے کی چار فلموں کا مجموعہ ہے اور اس کا موضوع فرد واحد کی آزادی اور موت کی سزا ہے۔ رسولاف پر ایرانی انقلابی عدالت نے فلم سازی کی پابندی بھی عائد کی۔ اُن کا پاسپورٹ ضبط کرنے کے علاوہ انہیں جیل میں قید بھی کیا گیا۔

ایلیزا ہٹمین کی فلم Never Rarely Sometimes Always کو برلینالے کا دوسرا بڑا ’سلور بیئر‘ دیا گیا۔ اس فلم میں امریکی ریاست پینسیلوینیا کی دو ٹین ایجر لڑکیوں کے نیو یارک شہر جا کر اسقاط حمل کرانے کے سفر کو موضوع بنایا گیا۔ تصویر فلک کی ایک اداکارہ سڈنی فلنجین ہے۔

آسکر ایوارڈ جیتنے والی جنوبی کوریائی فلم پیراسائیٹ کے ہدایتکار بونگ جُون ہو کی طرح اسی ملک کے ایک اور ہدایتکار ہونگ سانگسُو کا بھی بہت عزت و احترام کیا جاتا ہے۔ برلینالے میں اُن کی فلم The Woman Who Ran میں ایک خاتون کے اپنی خود شناسی کے عمل کو فلمانے پر بہترین ہدایتکار کے ایوارڈ سے نوازا گیا۔

پچیس سالہ جرمن اداکارہ پاؤلا بیئر کو فلم Undine یا ’آبی روح‘ میں شاندار کردار نگاری پر بہترین اداکارہ قرار دیا گیا۔ اس فلم میں اداکارہ بیئر نے ایک مشکل کردار کو ادا کرنے کے لیے انتہائی زوردار پرفارمنس دی ہے، جو دیکھنے کے لائق ہے۔

سترہویں برلینالے میں اطالوی اداکار ایلیو جرمانو کو بہترین اداکار قرار دیا گیا۔ انہوں نے فلم ’ہڈن اوے‘ Hidden Away میں بیسویں صدی کے مشہور اطالوی مصور انتونیو لیگابُو کا کردار ادا کیا ہے۔ جرمانو نے فلم میں لیگابو کے ذہنی بیمار ہونے کی اداکاری کو کمال مہارت سے نبھایا اور جیوری نے اس کے اعتراف میں انہیں سلور بیئر سے نوازا۔

روم کے نواحی علاقے کے حالات و واقعات پر مبنی فلم Bad Tales یا ’بُری کہانیاں‘ کا اسکرین پلے دو بھائیوں فابیو اور ڈامیانو ڈی اینوسینزو نے تحریر کیا۔ مشکل واقعات کو مربوط انداز میں فلم میں ڈھالنے کے لیے جو اسکرین پلے لکھا گیا، اس کی تعریف میں اس فلم کو بہترین اسکرین پلے کی حامل قرار دیا گیا۔

جرمن کیمرہ مین ژؤرگن ژؤرگس نے کئی فلموں میں عکاسی کے جوہر دکھائے ہیں۔ اُن کو ایک لیجنڈ قرار دیا جاتا ہے۔ اُن کے نام پر کئی ایسی فلمیں ہیں جن کی عکاسی کو شاہکار کا درجہ حاصل ہے۔ ژؤرگس کی بے بہا خدمات کے اعتراف انہیں سلور بیئر دیا گیا۔

برلینالے میں کئی عمدہ فلمیں مقابلے میں شریک تھیں۔ ان میں فرانسیسی ہدایتکار بینوا ڈیلفین کیرویر کی فلم ’ڈیلیٹ ہسٹری‘ یا تاریخ ضائع کر دیں کو خصوصی ایوارڈ دیا گیا۔ اس فلم میں موجودہ ڈیجیٹل دور کی حماقتوں اور پیچیدگیوں کو سمویا گیا ہے۔

برلینالے میں کمبوڈیا کے ہدایتکار ریتی پانہ کی تخلیق کی گئی دستاویزی فلم Irradiated کو بہترین قرار دیا گیا۔ بیسویں صدی میں جنگی واقعات کو ایک خاص انداز میں جوڑ کر کولاژ کی صورت میں پیش کیا گیا۔