1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں
سیاستسربیا

سیربیا شوٹنگ کا ملزم گرفتار

5 مئی 2023

سیربیا کے دارالحکومت بلغراد کے قریب ایک پرتشدد واقعے میں ملوث مبینہ حملہ آور کو گرفتار کر لیا گیا ہے۔ شوٹنگ کے اس واقعے میں کم از کم آٹھ افراد ہلاک ہو گئے تھے۔

Serbien Polizeipräsenz in Dubona nach der Schießerei
تصویر: Armin Durgut/AP Photo/picture alliance

سیربین میڈیا کے مطابق مشتبہ حملہ آور کو جمعے کی صبح حراست میں لے لیا گیا۔ یہ گرفتاری سیربیا کے وسطیٰ قصبے کراگوجیواچ میں عمل میں آئی۔

سیربیا میں دو روز میں اندھا دھند فائرنگ کا یہ دوسرا واقعہ تھا۔ اس واقعے میں دس سے زائد افراد زخمی بھی ہو گئے تھے۔ دارالحکومت بلغراد کے جنوب میں پچاس کلومیٹر دور واقعے گاؤں دُوبونا میں 21 سالہ مشتبہ حملہ آور نے اندھا دھند فائرنگ کر کے آٹھ افراد کو ہلاک کر دیا تھا اور جائے واقعہ سے فرار ہو گیا تھا۔

سیربیا یورپی یونین کی رکنیت کے لیے امیدوار بن گیا

سیربیا کے لیے یورپی یونین کے باضابطہ امیدوار کی حیثیت

اس حملہ آور کی گرفتاری کے لیے پولیس نے ایک وسیع آپریشن کا آغاز کیا تھا، جس میں چھ سو سے زائد اہلکار تعینات کیے گئے تھے، جن میں انسداد دہشت گردی شعبے کے اہلکار بھی شامل تھے۔ مقامی میڈیا کے مطابق اس گرفتاری کے لیے ڈرونز، ہیلی کاپٹر اور تھرمل امیجنگ کیمروں کی ٹیکنالوجی تک استعمال کی گئی۔ جمعرات کی شب پیش آنے والے اس واقعے کے بعد پوری رات اس حملہ آور کی تلاش کا آپریشن جاری رہا۔

بتایا گیا ہےکہ کراجیواچ گاؤں جہاں سے اس مشتبہ حملہ آور کو حراست میں لیا گیا،  جائے واقعے سے سو کلومیٹر کے فاصلے پر ہے۔ اب تک اس واقعے کے درپردہ محرکات کی بابت تفصیلات سامنے نہیں آئی ہیں۔

سیربیا کے وزیرداخلہ نے جائے واقعہ کے دورے پر کہا تھا کہ یہ ایک 'دہشت گردانہ‘ حملہ ہے، تاہم انہوں نے اس واقعے سے متعلق تفصیلات نہیں بتائی تھیں۔

صرف ایک روز قبل سیربیا میں ایک 13 سالہ نوجوان نے ایک اسکول میں فائرنگ کر کے اپنے ہی آٹھ ہم جماعت بچوں اور ایک محافظ کو ہلاک کر دیا تھا۔ جب کہ اس واقعے میں ایک استاد اور چھ طلبہ زخمی بھی ہوئے تھے۔ پولیس نے اس بچے کو بھی اپنی حراست میں لے لیا تھا۔ پولیس کے مطابق اس نوجوان نے حملے کے لیے اپنے والد کی بندوق کا استعمال کیا تھا۔  یہ بات اہم ہے کہ سیربیا حالیہ تاریخ میں جنگوں سے گزرا ہے، تاہم اس انداز کی شوٹنگ کے واقعے اس بلقان ریاست کے لیے انوکھے ہیں۔ گزشتہ ایک دہائی میں اس انداز کی شوٹنگ کے یہ پہلے واقعات تھے۔

ع ت، ا ا (اے ایف پی، روئٹرز)

ڈی ڈبلیو کی ٹاپ اسٹوری سیکشن پر جائیں

ڈی ڈبلیو کی ٹاپ اسٹوری

ڈی ڈبلیو کی مزید رپورٹیں سیکشن پر جائیں