یورپی یونین کی رکنیت حاصل کرنے کے لیے کسی بھی ملک کو پہلے باضابطہ امیدوار کی حیثیت دی جاتی ہے۔ یورپی حکام کے مطابق سیربیا کو حتمی امیدوار کی حیثیت دینے کا فیصلہ رواں ہفتے ہی سربراہی سمٹ میں کر دیا جائے گا۔ یورپی امور سے متعلق ڈنمارک کے وزیر نکولائی وامین نے گزشتہ روز برسلز میں صحافیوں کو بتایا کہ رکن ممالک اس فیصلے پر متفق ہیں۔ انہوں نے کہا کہ سیربیا نے امیدوار کی حیثیت حاصل کرنے کی شرائط کو پورا کردیا ہے، ’’اس لیے ہم نے سیربیا کو امیدوار کی حیثیت دینے کی تجویز پیش کی ہے اور ہمیں اس کی توثیق کی امید ہے۔‘‘

خیال رہے کہ سیربیا کو یورپی یونین کی رکنیت دیے جانے سے متعلق رومانیہ کو کچھ تحفظات لاحق ہیں۔ منگل کو رکن ریاستوں کے وزارتی سطح کے اجلاس میں رومانیہ نے اپنا مؤقف واضح کیا۔ اس معاملے پر بات چیت کے دوران رومانیہ نے سربیا کو امیدوار کا درجہ دینے کے معاہدے پر دستخط کرنے سے انکار کیا اور بلغراد حکومت سے ملک میں رومانیائی اقلیت کے حقوق سے متعلق مزید ضمانتوں کا مطالبہ کیا۔ اس کے برعکس دیگر رکن ریاستیں سیربیا میں جمہوری اصلاحات سے خاصی خوش ہیں۔

منگل کو اجلاس کے دوران بیشتر یورپی ریاستوں کے وزراء کا خیال تھا کہ سیربیا نے جنگی جرائم میں ملوث مفرورین کو حراست میں لینے اور کوسووو کے ساتھ تعلقات کی بہتری کے لیے بہت کچھ کیا ہے، جس کا اسے صلہ ملنا چاہیے۔ بلقان خطے میں 13 برس قبل کی جنگ نے سیربیا کی معیشت اور سیاسی ڈھانچے کو بری طرح متاثر کر رکھا ہے اور یہ سابق سوویت ریاست اپنی ہم عصر ریاستوں سے بہت پیچھے رہ گئی ہے۔ سلووینیہ کو یورپی یونین کی رکنیت مل چکی ہے، کروشیا اگلے سال متوقع طور پر رکن بن جائے گا جبکہ مقدونیہ کو پہلے ہی امیدوار کی حیثیت حاصل ہے۔

سیربیا کو گزشتہ برس دسمبر میں اس لیے امیدوار کی حیثیت حاصل نہیں ہوسکی تھی کیونکہ بیشتر یورپی ممالک کو کوسووو میں کشیدگی سے متعلق خدشات لاحق تھے۔ اس کے بعد حالیہ کچھ عرصے میں کوسووو کی علاقائی سطح پر سیاسی نمائندگی سے متعلق معاملات طے پا جانے کے بعد سیربیا کے لیے یورپی یونین میں حمایت بڑھ گئی ہے۔

رپورٹ: شادی خان سیف

ادارت: حماد کیانی