18 ملین کی آبادی والے جنوبی بندر گاہی شہر میں ہونے والی اس احتجاجی مارچ کو پیرس میں شارلی ایبدو کے آفس پر سات جنوری کو ہونے والے دہشت گردانہ حملوں کے بعد سے پاکستان میں سلسلہ وار مظاہروں میں اب تک کا سب سے بڑا مظاہرہ قرار دیا جا رہا ہے۔

فرانسیسی دارالحکومت پیرس میں اخبار شارلی ایبدو پر حملے میں کم از کم 12 افراد ہلاک ہو گئے تھے۔ حملہ آور مسلم مسلح انتہا پسند تھے اور ان کی تعداد دو بتائی گئی تھی اور وہ کلاشنکوف اور راکٹ لانچر سے لیس تھے۔ اُس واقع کے بعد سے اسلامی دنیا میں اس قسم کے توہین آمیز خاکوں کی اشاعت پر سخت غم و غصہ پایا گیا اور احتجاج اور مظاہروں کا سلسلہ شروع ہو گیا تھا۔

جمعرات کو کراچی میں ہونے والے مظاہرے پر کڑی نظر رکھنے والے ایک انٹیلیجنس اہلکار نے خبر رساں ادارے اے ایف پی کو بیان دیتے ہوئے کہا کہ " مظاہرین کی تعداد ہزاروں میں ہے" ۔ تاہم اُن کا کہنا تھا کہ کراچی کی 18 ملین کی آبادی کو دیکھتے ہوئے یہ کہا جا سکتا ہے کہ آج کے احتجاجی مظاہرے میں شامل ہونے والوں کی تعداد توقع سے کم ہی رہی۔

مظاہرین نے ہاتھوں میں سبز پرچم اُٹھا رکھے تھے جس پر روضہٴ رسول کی تصویر چھپی ہوئی تھی اور وہ شارلی ایبدو مردہ باد، توہین رسالت کے مرتکب مردہ باد" کے نعرے لگا رہے تھے۔ بہت سے مظاہرین نے ہاتھوں پر ایسے بینرز اُٹھا رکھے تھے جن پر توہین رسالت کرنے والوں کو قتل کرنے کا مطالبہ درج تھا۔

مظاہرین کے ایک لیڈر ثروت اعجاز قادری نے حکومت پاکستان سے مطالبہ کیا ہے کہ وہ مغربی ملک فرانس کے ساتھ اپنے سفارتی تعلقات منقطع کر لے اور فرانس کے پاکستان میں متعین سفیر کو ’ناپسندیدہ شخصیت‘ قرار دیتے ہوئے انہیں ملک چھوڑ دینے کا حکم دیا جائے۔

اُدھر جنوب مغربی شہر کوئٹہ میں مرکزی جمعیت اہل حدیث نے بھی پریس کلب کے سامنے ایک احتجاجی ریلی کی اور فرانسیسی پرچم کو نذر آتش کر دیا۔ مظاہرین میں ایک بڑی تعداد نوعمر افراد کی تھی جنہوں نے ایسے بینر اٹھا رکھے تھے جن پر شارلی ایبدو کی مذمت اور توہین پیغمبر کرنے والوں کو پھانسی دینا لکھا ہوا تھا۔ اس کے علاوہ احتجاج میں شریک مقررین نے کہا کہ وہ اپنے پیغمبر کی شان میں کسی قسم کی گستاخی برداشت نہیں کریں گے۔

مشرقی شہر لاہور میں مختلف گروپوں سے تعلق رکھنے والے، جن میں لیبر یونین اور کلرکوں کی ایک سرکاری تنظیم سے تعلق رکھنے والے قریب 2000 مظاہرین نے فرانسیسی جریدے میں پیغمبر اسلام کے خاکوں کی اشاعت پر سخت احتجاج میں حصہ لیا۔

پاکستان کے پڑوسی ملک افغانستان سے موصولہ اطلاعات کے مطابق سرحد پار افغانستان میں قریب 50 افراد نے کابل میں فرانسیسی سفارتخانے کے باہر شارلی ایبدو کے خلاف مظاہرے کیے۔ یہ مظاہرین،" فرانس تم شیطان ہو" کا نعرہ لگا رہے تھے۔ یاد رہے کہ گذشتہ ہفتے چارلی ایبدو نے اپنے تازہ شمارے کے سرورق پر پیغمبر اسلام کا خاکہ شائع کیا تھا ۔