کینیڈا کی سائمن فریزر یونیورسٹی کے پروفیسر نکولس ڈولوی نے سمندری حیات شارک اور ریز مچھلیوں کی اٹھائیس فیصد قسموں کے معدوم ہونے کے بارے میں فرانسیسی شہر مارسے میں منعقدہ آئی یو سی این کی کانگریس میں بتایا۔

قطب شمالی کی وہیل: جسامت چھوٹی ہونے کے خطرے سے دوچار

دوسری جانب ماحولیاتی معاملات پر نگاہ رکھنے والی بین الاقوامی تنظیم کے ڈائریکٹر جنرل برونو اوبرلی نے ہفتہ چار ستمبر کو اپنے ایک بیان میں واضح کیا کہ عظیم الجثہ چھپکلیوں کی قسم کموڈو ڈریگون کو بھی سمندری سطح بلند ہونے کے بعد سے سیلابوں کا مسلسل سامنا ہے اور اسے اُن جانوروں میں شامل کر دیا گیا ہے، جن کی نسل کو معدوم ہونے کے خطرات لاحق ہو گئے ہیں۔

شارک اور ریز مچھلی

نکولس ڈولوی نے بتایا ہے کہ اس وقت سمندری حیات کی بعض اقسام کے مکمل طور پر نابود ہو جانے کے شدید خطرات پیدا ہو چکے ہیں۔ اس تناظر میں انہوں نے وضاحت کرتے ہوئے کہا کہ شارک اور ریز مچھلی کی بارہ سو مختلف اقسام میں سے چار سو چوالیس کے معدوم ہونے کا امکان بڑھ گیا ہے۔

ان کے مطابق سات سال قبل کے مقابلے میں معدوم ہونے کے خطرے کا سامنا کرنے والی اس سمندری مخلوق میں ایک تہائی کا اضافہ ہوا ہے۔ انہوں نے اپنے بیان کو ایک 'خطرے کی گھنٹی‘ قرار دیا۔

انٹارکٹیکا میں گرمی کی پہلی لہر، پودوں اور حیوانات کو خطرہ

پروفیسر ڈولوی کے مطابق اگر اسی رفتار سے ماحولیاتی گراوٹ کا سلسلہ چلتا رہا تو جلد ہی سمندروں میں سے شارک اور ریز مچھلیوں کی کئی اقسام پوری طرح نابود ہو کر رہ جائیں گی۔  ان کے مطابق پانچ میں سے دو شارک معدوم ہونے کی دہلیز پر پہنچ گئی ہیں۔

پروفیسر نکولس کیون ڈولوی انٹرنیشنل یونین برائے تحفظِ فطرت (IUCN) کے شارک ماہرین کے گروپ کے شریک چیرمین ہیں۔ وہ کینیڈین صوبے برٹش کولمبیا کے بڑے شہر وینکوور میں واقع سائمن فریزر یونیورسٹی میں سمندری حیاتیاتی تنوع کے شعبے سے منسلک سینیئر ریسرچر ہیں۔

کموڈو ڈریگون کو لاحق خطرہ

گوہ یا چھپکلیوں کی نسل سے تعلق رکھنے والی ایک انتہائی بڑی اور خطرناک قسم انڈونیشی جزیرے کموڈو میں بڑی تعداد میں بستی ہے۔ اس کو جزیرے کے نام سے دنیا بھر میں کموڈو ڈریگن سے پکارا جاتا ہے۔

سمندری ماحول کو ڈوبنے والے تیل ٹینکروں سے کیسے بچایا جائے؟

یہ دوسرے انڈونیشی جزائر رنکا، فلوریس اور گِلی مونٹاگ میں بھی پائی جاتی ہے۔ اس کی مجموعی معلومہ تعداد ایک لاکھ اڑتیس ہزار ہے۔

اس ڈریگن میں اٹھائیس فیصد کمی کا خطرہ پیدا ہو گیا ہے کیونکہ قدرتی جنگلات کو سمندری سیلابوں سے ناقابلِ تلافی نقصان پہنچ رہا ہے اور دوسری جانب جنگل بردگی میں انسانوں کی تباہ کن کارروائیاں بھی شامل ہیں۔

ڈریگن کی حیات کا سب سے بڑا مرکز و مقام کموڈو جزیرے میں واقع نیشنل پارک ہے۔ یہ پارک اب عالمی ورثے میں شامل ہے۔

انٹرنیشنل یونین برائے تحفظِ فطرت نے اس جانور کو معدومی کے خطرے سے دوچار ہونے پر گہری تشویش ظاہر کی ہے۔

تنظیم کے مطابق سمندری سطح کے بلند ہونے سے گوہ یا مانیٹور لیزرڈ (Monitor Lizard) کی اس عظیم الجثہ زہریلی قسم کو اکثر و بیشتر سیلابی صورت حال کا سامنا رہنے لگا ہے۔ اب کموڈو ڈریگن کو جنگلی حیات کی سرخ فہرست میں شامل کر دیا گیا ہے۔

ع ح/ع ت  (اے ایف پی، روئٹرز)