شامی خانہ جنگی میں مبینہ طور پر حصہ لینے کے بعد جرمنی واپس آنے والے ان مشتبہ افراد کے خلاف اس کارروائی کو جرمنی کی داخلی سلامتی کے لیے ممکنہ خطرہ تصور کیا جا رہا ہے۔ امریکی خبر رساں ادارے اے پی کی ایک تجزیاتی رپورٹ میں جرمن پولیس کی طرف سے پير کے دن کی جانے والی اس کارروائی کو ایسے ہی ممکنہ خطرات کے خلاف ایک احتیاطی قدم قرار دیا گیا ہے۔ اس کارروائی میں جرمنی کی ایلیٹ GSG 9 فورس کے سو سے زائد اہلکاروں نے حصہ لیا جبکہ انہیں وفاقی اور ریاستی پولیس فورس کا تعاون بھی حاصل تھا۔

جرمن وفاقی دفتر استغاثہ کی طرف سے بتایا گیا ہے کہ برلن، فرینکفرٹ اور سابق دارالحکومت بون میں دس مختلف اپارٹمنٹس پر چھاپے مارے گئے اور ان تینوں شہروں سے ایک ایک مشتبہ شخص کو حراست میں لے لیا گیا۔ بتایا گیا ہے ایسے پانچ مشتبہ افراد کے گھروں کی تلاشی بھی لی گئی ہے، جن پر شک ہے کہ وہ القاعدہ کی حامی ’اسلامک اسٹیٹ آف عراق اینڈ دی لیوانٹ‘ سے یا تو تعلق رکھتے ہیں یا ان کی مدد کرتے ہیں۔

گرفتار شدہ افراد میں ایک ترک نژاد جرمن شہری بھی شامل ہے، جس کا نام فتح کے بتایا گیا ہے۔ کہا جاتا ہے کہ یہ شخص گزشتہ برس ’اسلامک اسٹیٹ‘ کا رکن بننے کے لیے شام گیا تھا۔ فتح پر الزام عائد کیا گیا ہے کہ وہ جولائی اور ستمبر کے دوران شامی خانہ جنگی میں ’اسلامک اسٹیٹ‘ کے رکن کے طور پر باقاعدہ طور پر حصہ لے چکا ہے۔ یہ امر اہم ہے کہ جرمن حکومت اس انتہا پسند تنظیم کو کالعدم قرار دیتی ہے۔

حراست میں لیا گیا ایک اور مشتبہ شخص ترک شہری بتایا گیا ہے، جو جرمن استغاثہ کے مطابق گزشتہ برس ستمبر ميں شام گیا تھا۔ وہ رواں برس جنوری میں واپس جرمنی آنے کے بعد اس شدت پسند تنظیم کے لیے چندہ اکٹھا کر رہا تھا اور اس کا منصوبہ ایک مرتبہ پھر شام جانے کا تھا۔

پیر کے دن کی گئی کارروائی میں ایک خاتون کو بھی گرفتار کیا گیا ہے۔ بتایا گیا ہے کہ جرمنی اور پولینڈ کی دوہری شہریت کی حامل اس ستائیس سالہ خاتون نے مبینہ طور پر اسلامک اسٹیٹ کو اڑتالیس ہزار یورو منتقل کیے ہیں۔

جرمنی کے چیف فیڈرل پراسیکیوٹر ہیرالڈ رانگے نے گزشتہ روز ان گرفتاریوں پر تبصرہ کرتے ہوئے کہا ہے، ’’آج کی کارروائی واضح کرتی ہے کہ شام جیسے تنازعات کے جرمنی پر بھی براہ راست اثرات پڑ رہے ہیں۔‘‘ انہوں نے مزید کہا کہ ایسے ممکنہ خطرات سے نمٹنے کے لیے جرمنی کو مؤثر طریقہ کار اختیار کرنا ہو گا۔ رانگے کے بقول شام سے واپس آنے والے ’ریڈیکلائزاڈ‘ افراد سے جرمنی کی آبادی کو خطرات لاحق ہیں۔