اگست میں حکومت کے منحرف ہو جانے والے والے شام کے سابق وزیر اعظم ریاض حجاب نے ایک عرب ٹیلی وژن کو انٹرویو دیتے ہوئے بتایا کہ جولائی میں دمشق میں باغیوں کے حملے کے نتیجے میں وزیر دفاع اور اسد کے بردار نسبتی کی ہلاکت کے بعد اعلیٰ حکومتی اہلکاروں نے اسد کوسمجھانے کی کوشش کی تھی کہ اس تنازع کا کوئی عسکری حل نہیں ہے۔

خبر رساں ادارے روئٹرز نے منگل کے دن نشر کیے گئے اس انٹرویو کا حوالہ دیتے ہوئے مزید کہا کہ ریاض حجاب نے اس وقت نائب صدر، پارلیمنٹ کے سربراہ اور حکمران بعث پارٹی کے نائب سیکرٹری جنرل کے علاوہ کئی دیگر اعلیٰ حکومتی اہلکاروں سے ملاقاتیں کیں تاکہ وہ اسد پر دباؤ دیں کہ وہ اپوزیشن سے مذاکرات شروع کر دیں۔

ریاض حجاب نے مزید کہا کہ اسد نے ایسی تجاویز کو رد کر دیا۔ انہوں نے ملک کے اندر اور باہر اپوزیشن کے ساتھ کسی بھی قسم کے مذاکرات کو مسترد کر دیا اور کہا کہ ایک مشترکہ ایجنڈے پر عمل پیرا منقسم اپوزیشن کے ساتھ مذاکرات ممکن نہیں ۔ اسد کے بقول وہ محب الوطن اپوزیشن نہیں ہے بلکہ وہ مسلح ہے۔

شام کے سابق وزیر اعظم نے بتایا کہ اُس وقت اسد کے اِس جواب پر وہ دم بخود رہ گئے تھے، ’’یہ میرے لیے ایک دھچکا تھا۔ اس وقت میں مکمل طور پر نا امید ہو گیا تھا، بالخصوص اُس وقت جب سیرئین فری آرمی نے حلب کے 70 فیصد علاقے پر قبضہ کر لیا تھا۔

ریاض حجاب کے ان بیانات کی فوری طور پر آزاد ذرائع سے تصدیق نہیں ہو سکی ہے۔ روئٹرز کے مطابق اس انٹرویو میں حجاب نے مزید کہا کہ شام میں قیام امن کے لیے عالمی کوششوں کی ناکامی کے بعد وہاں خون خرابہ روکنے کے لیے اب صرف یہی حل رہ گیا ہے کہ اپوزیشن کو مسلح کیا جائے۔ انہوں نے یہ دعویٰ بھی کیا کہ باغی شام کے ایک بڑے حصے پر قابض ہو چکے ہیں۔

حجاب نے شام کے تنازعے کے حل کے لیے اقوام متحدہ اور عرب لیگ کی طرف سے ثالثی کی کوششوں کو بھی تنقید کا نشانہ بنایا۔ انہوں نے کہا کہ شامی مندوب لخضر براہیمی کی کوششیں وقت کا زیاں ہیں کیونکہ اسد مذاکرات نہیں چاہتے۔

ادھر ایسی اطلاعات ہیں کہ شامی فوج نے دارالحکومت دمشق کے نواح کے علاوہ حلب میں اپنی کارروائیوں کا سلسلہ جاری رکھا ہوا ہے۔خبر رساں ادارے اے ایف پی نے اپوزیشن ذرائع کے حوالے سے بتایا ہے کہ حلب میں مزید فوجی تعینات کر دیے گئے ہیں۔ شام میں گزشہ اٹھارہ ماہ سے جاری انتشار کے نتیجے میں سیرئین آبزرویٹری فار ہیومن رائٹس کے بقول اکتیس ہزار افراد لقمہ اجل بن چکے ہیں۔

شام میں تشدد کے تازہ واقعات ایسے وقت میں رونما ہونے شروع ہوئے ہیں جب اقوام متحدہ کے سیکرٹری جنرل بان کی مون نے دمشق حکومت پر زور دیا ہے کہ وہ اپنے عوام کے ساتھ ہمدردی کریں۔ شامی وزیر خارجہ ولید المعلم نے کہا ہے کہ اگر مغرب اور عرب ممالک باغیوں کی مدد کرنا بند کر دیں تو شام کے بحران کا سیاسی حل ابھی بھی ممکن ہے۔

( ab / ia (AFP, Reuters