دارالحکومت دمشق میں داخل ہونے سے پہلے حیات تحریر الشام نامی اس باغی گروہ کے جنگجوؤں نے شامی شہر حمص پر بھی قبضہ کر لیا تھا۔ شامی میڈیا نے بھی اطلاع دی ہے کہ صدر بشار الاسد اب دمشق میں نہیں بلکہ بیرون ملک جا چکے ہیں۔

حما پر قبضے کے بعد باغیوں کی اب حمص کی جانب ممکنہ پیش قدمی

مختلف خبر رساں اداروں کی دمشق سے ملنے والی رپورٹوں میں باغیوں کے ملکی دارالحکومت میں داخلے اور صدر اسد کے بیرون ملک چلے جانے کے علاوہ یہ بھی بتایا گیا ہے کہ شامی وزیر اعظم نے پیشکش کی ہے کہ وہ ملک میں پرامن انتقال اقتدار کے لیے تیار ہیں جبکہ دمشق کے ہوائی اڈے پر تعینات حکومتی فورسز بھی مبینہ طور پر وہاں سے رخصت ہو گئی ہیں۔

اسد حکومت کا خاتمہ، تمام قیدیوں کی رہائی

حیات تحریر الشام کے جو باغی گزشتہ دنوں کے دوران مسلسل پیش قدمی کرتے ہوئے مختلف شہروں پر قابض ہوتے جا رہے تھے، انہوں نے پہلے حما کو، پھر حمص کو اپنے قبضے میں لیا اور اب وہ دمشق پر بھی قابض ہو گئے ہیں۔

ملکی دارالحکومت میں داخلے کے بعد شام کے سرکاری ٹیلی وژن سے نشر ہونے والے ان باغیوں کے ایک بیان میں آج اتوار کے روز کہا گیا کہ انہوں نے 24 برسوں سے برسراقتدار بشار الاسد کی حکومت کا تختہ الٹ دیا ہے اور ملکی جیلوں میں قید تمام  قیدی رہا کر دیے ہیں۔

شامی باغی حما میں داخل ہو گئے

اس ویڈیو بیان میں باغیوں نے کہا، ''آمر حکمران اسد کے زوال اور دمشق شہر کی آزادی کے ساتھ شام اب تک آزاد ریاست ہے اور تمام شہریوں اور اپوزیشن جنگجوؤں کو مل کر جملہ ریاستی اداروں کی حفاظت کرنا چاہیے۔‘‘

شامی فوج نے بھی اسد حکومت کے خاتمے کی تصدیق کر دی

خبر رساں اداروں روئٹرز اور ڈی پی اے نے شامی فوجی ذرائع کے حوالے سے بتایا ہے کہ ملکی فوج کی اعلیٰ کمان نے بھی اپنے تمام افسران کو اطلاع کر دی ہے کہ ملک میں صدر بشار الاسد کا دور اقتدار ختم ہو گیا ہے۔

ساتھ ہی ڈی پی اے نے بتایا کہ سرکاری فورسز کے اہلکاروں کو یہ بھی کہہ دیا گیا ہے کہ وہ ''اب سروس میں نہیں ہیں۔‘‘

عینی شاہدین کے مطابق آج اتوار کی صبح جب باغی دمشق میں داخل ہوئے، تو وہاں شامی فوج کی تعیناتی کے کوئی نشان نہیں تھے۔ اکثر فوجی چیک پوسٹیں خالی پڑی تھیں جبکہ وہاں زمین پر پھینکی ہوئی استعمال شدہ فوجی وردیاں پڑی تھیں اور بشار الاسد کے پوسٹر بکھرے ہوئے تھے۔

شامی خانہ جنگی میں کون کس کے خلاف لڑ رہا ہے، اور کیوں؟

یہ اطلاعات بھی ہیں کہ باغیوں کے دمشق میں داخلے اور صدر اسد کے ملک سے فرار ہونے کے بعد شہر کی سڑکوں پر عام شہریوں کو خوشیاں مناتے ہوئے بھی دیکھا گیا۔

اس حوالے سے سوشل میڈیا پر بہت سے ایسی ویڈیوز بھی گردش کر رہی ہیں، جن میں دمشق میں عام شہری خوشیاں مناتے اور رقص کرتے ہوئے دیکھے جا سکتے ہیں۔

م م / ا ا (روئٹرز، اے پی، ڈی پی اے، اے ایف پی)