سنہرے رنگ کے کمبل پناہ گزینوں کی ایک طرح سے پہچان بن گئے تھے تاہم اب اقوام متحدہ کی جانب سے یورپ پہنچنے والے مہاجرین کو سردی سے محفوظ رکھنے کے لیے سرمئی رنگ کے کمبل دیے جا رہے ہیں۔ ابھی ہفتے کے روز ہی چار ہزار کے قریب مہاجرین یونان میں داخل ہوئے ہیں۔

بڑی تعداد میں پناہ گزینوں کی آمد کی وجہ سے مقدونیا نے سیاسی پناہ کی درخواستیں قبول کرنے میں نمایاں کمی کر دی ہے۔ اس پالیسی کے تحت سرکاری حکام مطلع کیے بغیر سرحدیں کھولتے اور بند کرتے ہیں۔ اس وجہ سے بہت سے لوگوں کو اکثر بارہ سے چوبیس گھنٹے سرحدوں پر بنائے جانے والے پٹرول پمپوں پر گزارنا پڑتے ہیں۔

تنظیم ڈاکٹرز ود آؤٹ بارڈرز ’ایم ایس ایف‘ ایکو نامی پٹرول پمپ پر جمع ہونے والے پناہ گزینوں کی مدد کر رہی ہے۔ یہ پٹرول پمپ مقدونیا کی سرحد سے بیس کلومیٹر کی دوری پر واقع ہے۔ ایم ایس ایف ان افراد میں کھانے پینے کی اشیاء تقسیم کر رہی ہے جبکہ انہیں طبی امداد بھی فراہم کی جا رہی ہیں۔

شدید ٹریفک کی وجہ سے کبھی کبھی مہاجرین کو چوبیس گھنٹوں سے زائد پٹرول پمپس پر گزارنے پڑتے ہیں۔ ایم ایس ایف کے مطابق شدید سردی سے بچنے کے لیے متعدد پناہ گزینوں کو بند بسوں کے نیچے ان حصوں میں راتیں بسر کرنا پڑ رہی ہیں، جو سامان کے لیے مخصوص ہوتے ہیں۔ ’’بس ڈرائیور اکثر پناہ گزینوں کو راتوں میں تنہا چھوڑ کر قریبی ہوٹلوں میں سونے چلے جاتے ہیں‘‘۔

یورپ کی جانب سفر کرنے والوں میں بڑی تعداد ان ماؤں کی بھی ہے، جن کے ساتھ ان کے نومولود بچے بھی ہیں۔ ’سیو دی چلڈرن‘ کے مطابق یونانی گاؤں ایڈومینے کے قریب پندرہ روز قبل پیدا ہونے والے ایک بچے کو منفی آٹھ درجہ حرارت میں کھلے آسمان تلے رات بسر کرنا پڑی۔ اس تنظیم کی سیلین گیگنے کے مطابق ایڈومینے میں ایسے ٹینٹ موجود تھے، جہاں سردی سے بچنے کا انتظام تھا ’ لیکن ان لوگوں کو وہاں رکنے کی اجازت نہیں دی گئی۔‘‘

یہ تصویر عراقی مسیحی نوجوان ڈینیئل اسدزادے اور اس کے دوستوں کی ہے۔ اسد زادے کے بقول’’ یہ لوگ صبح پانچ بجے اس پٹرول پمپ پر پہنچے تھے اور اس سے قبل کی رات وہ کسی اور پٹرول پمپ پر گزار کر آئے تھے۔‘‘ وہ کہتے ہیں:’’میں اب ایسا مزید نہیں کر سکتا۔ جرمنی پہنچ کر سب سے پہلے میں غسل کروں گا۔‘‘

اسد زادے کے مطابق اس نے مقدونیا کے لیے بس والے کو تقریباً 42 یورو ادا کیے۔ اس کے بقول وہ لگ بھگ چار ہزار یورو دے کر یونان پہنچا ہے:’’اب میرے پاس بہت کم رقم بچی ہے۔ میں تنہا ہی اس صورتحال کا شکار نہیں ہوں بلکہ اور بھی خاندان ہیں، جو بغیر پیسوں کے سفر کر رہے ہیں۔ ہمیں مخصوص پٹرول پمپوں پر روکا جاتا ہے، جہاں سے ہمیں لازمی طور پر چیزیں خریدنی ہوتی ہیں۔ اب ہمیں سرحد پر ہی عبادت کرنی پڑ رہی ہے۔ ‘‘

یہ ایک افغان شہری ہے، جس کے پاس نقد رقم نہیں ہے۔ اسے پٹرول پمپ سے باہر نکلنے کے لیے کہا گیا ہے۔ تاہم جو لوگ پٹرول پمپوں سے چیزیں خریدتے ہیں انہیں اُس جگہ انتظار کرنے کی اجازت دی جاتی ہے، جہاں کھانا کھایا جاتا ہے۔ پٹرول پمپ کے مالک کے مطابق ’’پناہ گزینوں کی بڑھتی ہوئی تعداد کی وجہ سے کاروبار میں اضافہ ہوا ہے لیکن یہ لوگ چیزوں کو بھی نقصان پہنچاتے ہیں۔‘‘

یونانی امدادی کارکن گے اورگ اور سمانتھا پاپاس ڈاکٹروز ود آؤٹ بارڈرز کی امداد کو استعمال کرتے ہوئے اُن علاقوں میں جلانے کے لیے لکڑی مہیا کر رہے ہیں، جہاں پناہ گزین موجود ہیں۔ یہ ایکو کے پٹرول پمپ کے باہر کی تصویر ہے۔ اتوار کے روز یہاں لکڑیوں کی تیسری اور آخری کھیپ پہنچائی گئی۔ سمانتھا کے مطابق ایک ٹرک پر لدی گیارہ ٹن لکڑی کی قمیت تقریباً ایک ہزار یورو ہوتی ہے۔

ایڈومینے نامی علاقے میں قائم ایکو پٹرول پمپ پر اتوار کے روز دو ہزار سے زائد افراد نے رات بسر کی۔ سیو دی چلڈرن کی سیلین گیگنے کہتی ہیں کہ یونان میں مہاجرین کی بڑھتی ہوئی تعداد کی وجہ سے یہ ایک عام سی بات بنتی جا رہی ہے ۔’’میں اور میرا عملہ ان لوگوں کے لیے بہت کچھ کرنا چاہتے ہیں لیکن ہمارے پاس وسائل نہیں ہیں۔‘‘