اِس 47 رکنی کونسل میں یورپی یونین کی طرف سے پیش کی جانے والی قرارداد کی حمایت میں 41 اور مخالفت میں تین ووٹ پڑے جبکہ دو ملکوں نے رائے شماری کے عمل میں حصہ نہیں لیا۔

قرارداد میں ’شامی حکام کی طرف سے انسانی حقوق اور بنیادی آزادیوں کی وسیع، منظم اور سنگین خلاف ورزیوں‘ کی مذمت کی گئی۔ قرارداد میں حکام کے ہاتھوں ہسپتالوں اور طبی مراکز کو جان بوجھ کر نشانہ بنانے، بیماروں اور مریضوں تک طبی امداد کی فراہمی کو روکنے اور زخمی مظاہرین کو ہلاک کرنے پر تنقید کی گئی۔

شام کے سفیر فیصل الحموی نے اس رائے شماری کو ’متعصبانہ‘ قرار دیتے ہوئے کہا کہ اس میں زمینی حقائق کی عکاسی نہیں ہے۔

ادھر اقوام متحدہ کے مہاجرین کے ادارے یو این ایچ سی آر نے کہا ہے کہ اسے آئندہ چھ ماہ کے دوران شام سے مزید ایک لاکھ مہاجرین کے آنے کی توقع ہے۔ ادارے نے پہلے ہی ہمسایہ ملکوں کو نقل مکانی کر جانے والے افراد کی مدد کے لیے چوراسی ملین ڈالرز کی اپیل جاری کی ہے۔

اقوام متحدہ اور عرب لیگ کے مشترکہ ایلچی کوفی عنان بھی رواں ہفتے کے اختتام پر ماسکو اور بیجنگ جائیں گے جہاں وہ شام کی صورت حال پر تبادلہ خیال کریں گے۔ ان کے ترجمان کے مطابق ان کی ٹیم شام میں تشدد کو رکوانے کے لیے وہاں کے حکام سے تین روزہ مذاکرات کر کے واپس لوٹی ہے۔

عالمی سطح پر ہونے والی ایک اور پیشرفت میں آج یورپی یونین نے صدر بشار الاسد پر دباؤ بڑھانے کے لیے ان کی اہلیہ اور قریبی حلقے کے افراد پر پابندیاں عائد کر دیں۔ برسلز میں سفارت کاروں نے بتایا کہ یورپی یونین کے اجلاس میں ان افراد کے اثاثے منجمد کرنے اور ان پر یورپی یونین میں سفر کی پابندیاں لگانے کا فیصلہ کیا گیا۔

ان پابندیوں کے حوالے سے یورپی یونین کی خارجہ پالیسی کی سربراہ کیتھرین ایشٹن نے کہا، ’ میرے نزدیک ان پابندیوں سے شامی حکومت پر دباؤ بڑھ رہا ہے۔ میں نے انہیں ہمیشہ اہم تصور کیا ہے۔ پابندیوں سے ہمیشہ غیر معمولی فرق پڑتا ہے، پہلی چیز تو یہ ہے کہ وہ انفرادی اداروں کو اس طرح سے ہدف بناتی ہیں کہ ان کے لیے معمول کی سرگرمیاں جاری رکھنا دشوار ہو جاتا ہے اور دوسری چیز یہ ہے کہ ان سے ایک مضبوط سیاسی پیغام ملتا ہے۔‘

دریں اثناء شام کے مختلف علاقوں سے موصول ہونے والی اطلاعات کے مطابق دارالحکومت دمشق میں سکیورٹی فورسز نے ایک مظاہرے پر فائرنگ کر کے پانچ مظاہرین کو زخمی کر دیا۔ ترکی کی سرحد کے نزدیک صوبہ اِدلب میں لڑائی کی اطلاعات ملی ہیں جہاں شاہدین کے مطابق سکیورٹی فورسز اور منحرف فوجیوں کے درمیان لڑائی جاری ہے۔ ملک کے وسطی صوبے حما میں بھی سکیورٹی فورسز نے مظاہرین پر فائرنگ کی ہے۔ اقوام متحدہ کے تخمینوں کے مطابق شام میں گزشتہ برس مارچ سے اب تک حکومتی کریک ڈاؤن میں آٹھ ہزار سے زائد افراد ہلاک ہو چکے ہیںِ۔

رپورٹ: حماد کیانی

ادارت: امجد علی