خبر رساں ادارے روئٹرز کے مطابق شام کے شمال، مشرق اور جنوب میں ایک بڑا علاقہ اب یا تو القاعدہ سے تعلق رکھنے والے گروہ النصرہ فرنٹ کے قبضے میں ہے، یا شدت پسند تنظیم اسلامک اسٹیٹ کے کنٹرول میں۔ اب صدر اسد کی فورسز کی عمل داری صرف مغربی علاقوں تک محدود ہو کر رہ گئی ہے اور ان علاقوں کے تحفظ کو بشار الاسد کی بقا کے لیے لازمی قرار دیا جا رہا ہے۔

تاریخی اور عسکری اعتبار سے انتہائی اہم شہر پالمیرا سے پسپائی اور ادلیب کا تقریباﹰ تمام صوبہ کھو دینے کے بعد بشار الاسد اپنی فورسز کو مغربی علاقوں کے گرد دفاعی پوزیشنوں پر متعین کر رہے ہیں۔ ان مغربی علاقوں میں دمشق کے علاوہ، حمص، حما اور مغربی بندرگاہ بھی شامل ہے۔

روئٹرز نے شامی دفاعی ذرائع کے حوالے سے بتایا ہے کہ دمشق حکومت اس دباؤ کو محسوس کرتی ہے تاہم حکومت پُر اعتماد ہے کہ وہ اپنے اتحادیوں کے ساتھ مل کر اپنے اہم علاقوں کا تحفظ کر لے گی۔

روئٹرز کے مطابق اسد حکومت کی عمل داری اب بھی دور دراز کے علاقوں تک قائم ہے، تاہم ایک ایک کر کے یہ علاقے باغیوں کے قبضے میں جاتے جا رہے ہیں۔ دیرالزور، حسکہ اور حلب میں شامی فوجیں بدستور تعینات رکھنے کے فیصلے سے یہ معلوم ہوتا ہے کہ شامی حکومت اب بھی ملک بھر میں اپنی موجودگی قائم رکھنا چاہتی ہے۔ شامی حکومت یہ ماننے کو تیار نہیں کہ عملی طور پر شام تقسیم ہو چکا ہے۔

حکومت سے متعلقہ ذرائع کا کہنا ہے کہ صدر اسد پُر اعتماد ہیں کہ وہ اب بھی مستحکم ہیں اور وہ ایران سے مزید امداد کی توقع کر رہے ہیں۔ منگل کے روز ایران کی جانب سے واضح انداز میں کہا گیا تھا کہ وہ بشار الاسد کے ساتھ کھڑا رہے گا۔ لبنان کا شیعہ عسکریت پسند گروہ حزب اللہ بھی ماضی کے مقابلے میں کہیں بھرپور طریقے سے شام میں اپنے عسکریت پسند بھیج رہا ہے۔

صدر اسد کو یہ امید بھی ہے کہ مغربی ممالک شدت پسند تنظیم ’اسلامک اسٹیٹ‘ سے نمٹنے کے لیے بالآخر دمشق حکومت کی جانب ہی دیکھیں گے۔ روئٹزر کے مطابق اب تک مغربی ممالک کی جانب سے ایسے کوئی اشارے نہیں ملے، تاہم بشارالاسد یہی سمجھتے ہیں کہ مغربی دنیا کبھی نہیں چاہے گی کہ یہ پورا علاقہ جہادیوں کے قبضے میں چلا جائے۔