شام میں امریکی اور فرانسیسی سفارت خانوں پر حملے
12 جولائی 2011![](https://static.dw.com/image/15226802_800.webp)
اطلاعات کے مطابق فرانس اور امریکہ کے خلاف شامی صدر بشار الاسد کے حامیوں کے غصے کی اصل وجہ ان دونوں ممالک کی جانب سے شام میں جمہوریت کے لیے چلنے والی تحریک کے ساتھ یکجہتی کا اظہار ہے۔ ساتھ ہی ان دونوں ممالک کے سفیروں نے حما شہر میں حکومت مخالفین سے ملاقات بھی کی تھی۔ حما شام کا وہ شہر ہے، جہاں سے صدر بشار الاسد کے خلاف اب بھی مظاہرے جاری ہیں۔
فرانسیسی سفارت خانے کی حفاظت پر مامور اہلکاروں نے فائرنگ کرتے ہوئے حملہ آوروں کو بھاگنے پر مجبور کیا۔ ساتھ ہی امریکی سفیر کی رہائش گاہ کے حفاظتی گارڈز نے بروقت کارروائی کر کے حملہ ناکام بنایا۔ سفارتی ذرائع نے بتایا کہ اس دوران کوئی بھی شخص ہلاک یازخمی نہیں ہوا۔ امریکی اور فرانسیسی ذرائع کے مطابق یہ حملے جمہوریت کے لیے چلائی جانے والی تحریک کی حمایت کے رد عمل کے طور پر کیے گئے ہیں۔ چار روز قبل ہی ان دونوں ممالک کے سفیروں نے حما شہر کا دورہ کیا تھا۔ اس وقت بھی حما میں بشار الاسد کے ہزاروں مخالفین حکومتی دستوں کی موجودگی کے باوجود سراپا احتجاج ہیں۔
امریکہ نے شام کے نمائندے کو وزارت خارجہ طلب کر کے احتجاج ریکارڈ کرایا ہے۔ اسی طرح فرانسیسی حکومت نے بھی اس حملے پر غم و غصے کا اظہار کیا ہے۔ برلن حکام نے ان دونوں ممالک سے یکجہتی کا اظہار کرتے ہوئے کہا ہے کہ اس قسم کے حملے کسی بھی صورت میں قابل قبول نہیں ہیں۔
امریکہ سمیت دیگر مغربی ممالک نے بشار الاسد کی جانب سے احتجاجی تحریک کے خلاف طاقت کے استعمال کو تنقیدکا نشانہ بنایا ہے۔ انسانی حقوق کی تنظیموں کے مطابق حکومت کی جانب سے کی جانے والی کارروائی میں اب تک 1400 سے زائد افراد ہلاک ہو چکے ہیں جبکہ سینکڑوں کو گرفتار کیا جا چکا ہے۔
رپورٹ: عدنان اسحاق
ادارت: شادی خان سیف