اسرائیل کی طرف سے پہلی بار شامی حکومت پر غیر روایتی ہتھیاروں کے ذخائر کے استعمال کا الزام عائد کیا گیا ہے۔ اسرائیل کے اس اقدام سے امریکا اور دیگر مغربی طاقتوں پر شامی جنگ میں براہ راست مداخلت کے لیے دباؤ بڑھ سکتا ہے۔ ابھی حال ہی میں یورپی ملک فرانس اور برطانیہ نے اعلان کیا تھا کہ اُن کے پاس ایسے شواہد موجود ہیں، جن سے ثابت ہوتا ہے کہ بشار الاسد نے کیمیاوی ہتھیار استعمال کیے ہیں جبکہ امریکا اب تک شامی حکومت کی طرف سے باغیوں کے خلاف کیمیاوی ہتھیاروں کے استعمال کی تصدیق نہیں کر سکا ہے۔ لیکن امریکی صدر باراک اوباما نے شامی صدر بشار الاسد کو متنبہ کیا ہے کہ ان کی طرف سے ان مہلک ہتھیاروں کا استعمال عالمی سیاسی بساط پر جاری کھیل کو یکسر تبدیل کر دینے کا باعث بنے گا۔

اسرائیل کی جنوب مغربی سرحد شام سے ملتی ہے اور مشرق وسطیٰ کا یہ ملک مارچ 2011 ء سے جاری شام کی جنگ کی صورتحال پر لمحہ با لمحہ نظر رکھے ہوئے ہے۔ اگرچہ بشار الاسد کے ساتھ اسرائیل کی سخت دشمنی ہے تاہم تل ابیب شام کے معاملے میں نہایت محتاط انداز اختیار کیے ہوئے ہے اور شامی حکومت اور باغیوں میں سے کسی کی بھی طرف داری نہیں کر رہا ہے۔ اس کی دو اہم وجوہات ہیں۔ ایک یہ کہ شام میں برسر اقتدار اسد فیملی گزشتہ 40 برسوں سے اسرائیل سے ملحق سرحدی علاقوں کو پُر امن رکھے ہوئے ہے، دوسرے یہ کہ اسرائیل نہیں جانتا کہ اسد حکومت کے ممکنہ خاتمے کے بعد کیسی صورتحال جنم لے گی۔

اسرائیلی حکام تاہم اس تشویش میں مبتلا ہیں کہ اگر شام کے کیمیاوی ہتھیار لبنان میں اُس کے حامی اور حلیف گوریلا گروپ حزب اللہ یا اُن انتہا پسند اسلامی گروپوں کے ہاتھ لگ گئے، جو اسد کو ہٹانا چاہتے ہیں تو کیا ہوگا۔ اسرائیل اس امر سے خائف ہے کہ اگر اسد حکومت کا شیرازہ بکھرتا ہے تو اُس کے جدید ترین ہتھیاروں کو ان میں سے کوئی بھی گروپ اسرائیل کے خلاف استعمال کرسکتا ہے۔

اسرائیلی فوج کے بریگیڈیئر جنرل اتائی برن، جو اسرائیلی فوج کی خفیہ ایجنسی کے ریسرچ اور تجزیے کے ادارے کے سربراہ بھی ہیں، نے آج تل ابیب میں سکیورٹی کے حوالے سے ہونے والی ایک کانفرنس میں کہا کہ اسد حکومت متعدد بار کیمیاوی ہتھیاروں کا استعمال کر چکی ہے۔ انہوں نے اس کے شواہد کے طور پر برطانیہ اور فرانس کی طرف سے اکھٹی کی جانے والی اُن دستاویزات کا حوالہ دیا جو گزشتہ ماہ دمشق میں ہونے والے حملوں سے متعلق ہیں۔ اسرائیلی جنرل کے بقول،’ ہماری پیشہ ورانہ سمجھ کے مطابق دمشق حکومت نے گزشتہ مہینوں کے دوران عسکریت پسندوں کے خلاف مہلک کیمیاوی ہتھیار استعمال کیے ہیں۔ ان واقعات میں مثال کے طور پر 19 مارچ کا واقعہ بھی شامل ہے جس کے متاثرین کے سوکھے ہوئے جسموں اور منہ سے نکلتے ہوئے دھوئیں کیمیاوی ہتھیاروں کے استعمال کی علامات اور اشارہ ہیں‘۔

اسرائیلی بریگیڈیئر جنرل اتائی برن نے کہا ہے کہ غالباﹰ اسد حکومت نے ’سیرین‘ نامی ایک مہلک اعصابی کیمیکل استعمال کیا ہے۔ انہوں نے مزید کہا کہ اس سے پہلے شام نسبتاﹰ کم مہلک ہتھیار استعمال کر رہا تھا تاہم روس اُسے SA-17 جیسے جدید ہتھیار فراہم کرنے کا عمل جاری رکھے ہوئے ہے۔

یاد رہے کہ گزشتہ روز یعنی پیر کو اسرائیل کے دورے پر آئے ہوئے امریکی وزیر دفاع چک ہیگل کے ساتھ مذاکرات کے دوران اسرائیلی وزیر اعظم بنجمن نیتن یاہو نے اپنا موقف دہراتے ہوئے کہا تھا کہ اسرائیل کو کسی بھی خطرے کے خلاف اپنے دفاع کا پورا حق حاصل ہے۔

km/ia (AFP)