اس حوالے سے خبر رساں ادارے اے پی کو دیے گئے ایک انٹرویو میں پوٹن کا مزید کہنا تھا کہ اگر یہ ثابت ہو جاتا ہے کہ اسد فورسز کی جانب سے کیمیائی ہتھیار استعمال کیے گئے ہیں تو روس، شام میں فوجی کارروائی کی حمایت کرسکتا ہے تاہم اس کے لیے ضروری ہے کہ اس کارروائی کی منظوری اقوام متحدہ کی جانب سے دی جائے۔

دوران انٹرویو پوٹن کی جانب سے ان خدشات کا اظہار بھی کیا گیا کہ 21 اگست کو دمشق کے نواح میں ہونے والا کیمیائی حملہ شاید القاعدہ سے منسلک شدت پسندوں نے کیا ہو۔

اسد حکومت کے لیے روسی حمایت

اپنے اس انٹرویو کے دوران پوٹن انتہائی با اعتماد نظر آرہے تھے۔ انہوں نے کہا کہ ان کے ملک نے دمشق کو زمین سے فضا میں مار کرنے والی S-300 میزائل ٹیکنالوجی بھی منتقل کی ہے۔ تاہم اس حوالے سے ابھی کچھ کام ہونا باقی ہے۔ شام ابھی ان میزائلوں کو استعمال نہیں کرسکتا۔ مغربی ممالک کو اس میزائل ٹیکنالوجی کے حوالے سے کئی تحفظات ہیں۔

خبر رساں ادارے روئٹرز کے مطابق کچھ تجزیہ کار صدر پوٹن کے حالیہ انٹرویو کو اس حوالے خوش آئند قرار دے رہے ہیں کہ انہوں نے شام کے مسئلے پر اپنے درینہ مؤقف میں لچک کا مظاہرہ کیا ہے۔

روسی صدر سے جب یہ سوال کیا گیا کہ کیا وہ دمشق کے نواح میں اسد فورسز کی جانب سے کیمیائی ہتھیاروں کا استعمال ثابت ہونے پر شام پر حملے کی حمایت کریں گے تو ان کا کہنا تھا، ’’شام پر حملے کی حمایت کر بھی سکتے ہیں‘‘ تاہم انہوں نے یہ بھی واضح کیا کہ وہ یورپ اور امریکا کے ان دعوں کو تسلیم نہیں کرتے، جن میں یہ کہا جا رہا ہے کہ شام میں کیمیائی ہتھیاروں کا استعمال دمشق حکومت کی جانب سے کیا گیا ہے۔

انہوں نے کہا کہ یہ کہنا بھی ابھی قبل از وقت ہوگا کہ اگر امریکہ نے اقوام متحدہ کی قرارداد کے بغیر فوجی کارروائی کی تو روس اس صورت میں کیا کرے گا۔

جی ایٹ کانفرنس اور مسئلہ شام

صدر پوٹن کا یہ انٹرویو کل 5 ستمبر سے شروع ہونے والی G20 سربراہ کانفرنس سے محض ایک روز قبل سامنے آیا ہے۔ اس سربراہ کانفرنس کے دوران امریکی صدر باراک اوباما اور روسی صدر ولادیمیر پوٹن کی ملاقات بھی متوقع ہے۔ تاہم باضابطہ مذاکرات پہلے ہی منسوخ کئے جاچکے ہیں۔ یہ کانفرنس روسی شہر سینٹ پیٹرز برگ میں پانچ تا چھ ستمبر جاری رہے گی۔ اس دوران وہاں G20 ممالک کے سربراہان مملکت کے ہمراہ وزرائے خارجہ بھی موجود ہوں گے۔ اس کانفرنس کا اہم ترین موضوع شام میں ممکنہ طور پر کیمیائی ہتھیاروں کے استعمال کا مسئلہ ہوگا۔

روس کے صدر ولادیمیر پوٹن نے امریکا اور اس کے اتحادیوں کو شام کے خلاف یکطرفہ کارروائی کرنے پر خبردار کرتے ہوئے کہا ہے کہ اقوام متحدہ سے منظوری کے بغیر شام کے خلاف کوئی بھی فوجی کارروائی غیر قانونی ہوگی۔

روسی امریکی تعلقات میں سرد مہری

خبر رساں ادارے روئٹرز کے مطابق تمام تر تلخیوں کے باوجود امریکی صدر اور ان کے روسی ہم منصب کے بیانات کافی حوصلہ افزا ہیں۔ پوٹن نے امریکی صدر کے حوالے سے کہا، ’’اوباما ایک ایسی عملیت پسند شخصیت ہیں جو کم عقل نہیں ہیں۔‘‘ گزشتہ ماہ روسی امریکی دوطرفہ مذاکرات کی منسوخی کے بعد اوباما نے کہا تھا کہ ان کے روسی صدر کے ساتھ مذاکرات ہمیشہ مثبت اور تعمیری رہے ہیں تاہم جب پوٹن سر جھکا کر بیٹھتے ہیں تو ایسا لگتا ہے جیسے کسی کلاس کے بالکل آخر میں بوریت کا شکار کوئی بچہ بیٹھا ہو۔ روس کی جانب سے ایڈورڈ سنوڈن کو عارضی سیاسی پناہ دئے جانے کے بعد امریکا نے جی ایٹ سربراہ کانفرس سے قبل روسی امریکی دوطرفہ مذاکرات منسوخ کر دئے تھے۔

ان دنوں روس اور امریکا کے تعلقات میں انتہائی سرد مہری پائی جا رہی ہے۔ روئٹرز کے مطابق سرد جنگ کے خاتمے کے بعد روس امریکا تعلقات تاریخ کی نچلی ترین سطح پر ہیں۔ اس کی اہم وجہ صدر پوٹن کی شام کی غیر متزلزل حمایت بھی ہے۔