شام پر ممکنہ امریکی حملہ، ’وسیع تر امکانات زیر غور‘
31 اگست 2013![](https://static.dw.com/image/17057011_800.webp)
صدر اوباما نے جمعے کی شام کہا کہ شامی صدر بشار الاسد کی طرف سے اپنے ہی ہموطنوں کے خلاف کیمیائی ہتھیاروں کے استعمال کے بعد عالمی برادری کا فرض بنتا ہے کہ وہ اس خطرناک عمل پر بشار الاسد کی انتظامیہ کے خلاف کارروائی پر متفق ہو۔ خبر رساں ادارے اے ایف پی نے باراک اوباما کا حوالہ دیتے ہوئے لکھا ہے کہ امریکی صدر نے دمشق میں اسد حکومت کے خلاف کسی عسکری کارروائی سے متعلق ابھی تک کوئی حتمی فیصلہ نہیں کیا۔
امریکی صدر نے البتہ جمعے کی شام یہ واضح اشارہ دیا کہ اسد حکومت کے خلاف عسکری کارروائی جلد ہی ممکن ہے۔ وائٹ ہاؤس میں صحافیوں کو ایک مختصر بریفنگ دیتے ہوئے اوباما نے کہا، ’’ہم ایک ایسی دنیا تسلیم نہیں کر سکتے جہاں خواتین، بچوں اور معصوم شہریوں کو اتنے خطرناک پیمانے پر زہریلی گیس کے ذریعے ہلاک کر دیا جائے۔‘‘ اوباما نے اسد حکومت کی طرف سے اس مبینہ کیمیائی حملے کو امریکا کے قومی سلامتی سے متعلق مفادات کے لیے بھی ایک خطرہ قرار دیا۔
باراک اوباما کا یہ بیان ایک ایسے وقت پر سامنے آیا ہے، جب واشنگٹن انتظامیہ نے اپنی ایک انٹیلی جنس رپورٹ میں تصدیق کر دی ہے کہ گزشتہ ویک اینڈ پر دمشق کے نواح میں صدر اسد کی حامی افواج نے اپنے حملے میں کیمیائی ہتھیار استعمال کیے تھے، جن کے نتیجے میں مجموعی طور پر 1429 افراد مارے گئے تھے۔ امریکی انٹیلی جنس کی رپورٹوں کے مطابق ان ہلاک شدگان میں 426 بچے بھی شامل تھے۔
اس تناظر میں اوباما نے مزید کہا کہ اس مخصوص صورتحال میں عالمی برادری کے لیے چیلنج یہ ہے کہ اسد حکومت کے خلاف کس نوعیت کی کارروائی کی جائے۔ اوباما کے بقول ان کی انتظامیہ اور فوج ’وسیع تر امکانات‘ پر غور کر رہے ہیں۔ تاہم انہوں نے شامی حکومت کے خلاف ’زمینی کارروائی‘ یا ’طویل المدتی عسکری مہم‘ کو خارج از امکان قرار دیا۔ اوباما کے مطابق ان کی حکومت شامی حکومت کے خلاف محدود پیمانے پر حملے کرنے پر غور کر رہی ہے۔ امریکی صدر نے اس حوالے سے اقوام متحدہ کی سلامتی کونسل میں ابھی تک کسی اتفاق رائے کے ممکن نہ ہو سکنے کو بھی تنقید کا نشانہ بنایا۔
روس کا انتباہ
شام کے طاقتور حمایتی ملک روس نے ان امریکی خفیہ رپورٹوں سے متعلق کئی سوالات اٹھائے ہیں، جن کے مطابق 21 اگست کو غوطہ میں کیے گئے حملے میں کیمیائی ہتھیاروں کا استعمال کیا گیا۔ ماسکو حکومت نے اقوام متحدہ کی سلامتی کونسل کی رضا مندی کے بغیر شام پر حملے کے خلاف خبردار بھی کیا ہے۔
دریں اثناء اقوام متحدہ کے معائنہ کاروں نے شام میں کیمیائی ہتھیاروں کے مبینہ استعمال سے متعلق اپنی تحقیقات مکمل کر لی ہیں۔ اس ٹیم کا کہنا ہے کہ وہ جلد ہی اس بارے میں اپنی رپورٹ مرتب کر لے گی کہ آیا شام میں کیمیاوی ہتھیار استعمال کیے گئے۔
دمشق حکومت یہ الزامات مسترد کرتی ہے کہ اس نے زہریلی گیس کا استعمال کیا ہے۔ ہفتے کو علی الصبح شام کے سرکاری ٹیلی وژن نے ملکی وزارت خارجہ کے حوالے سے بتایا کہ امریکا کی طرف سے اسد حکومت کے خلاف عائد کردہ ایسے تمام الزامات ’من گھڑت اور بے بنیاد‘ ہیں۔
اس سے چند گھنٹے قبل امریکی وزیر خارجہ جان کیری نے ایک پریس کانفرنس میں کہا کہ خفیہ رپورٹوں کے مطابق اسد حکومت نے زہریلی گیسوں کا استعمال کیا ہے۔ امریکی صدر اوباما کی پریس بریفنگ سے کچھ دیر پہلے جان کیری نے زور دیا کہ شامی حکومت کے خلاف کارروائی نہ کرنے کے نتیجے میں ایران اور اس کی حامی شیعہ جنگجو تنظیم حزب اللہ کو بھی تقویت ملے گی۔