اقوام متحدہ کا کہنا ہے کہ مختلف عناصر اور گروہ ان تاریخی مقامات پر مسلسل لوٹ مار کر رہے ہیں اور یہ تاریخی ورثہ تباہ کیا جا رہا ہے۔ اقوام متحدہ کے سیکرٹری جنرل بان کی مون، یونیسکو کی ڈائریکٹر ایرینا بوکووا اور شام کے لیے بین الاقوامی مندوب لخضر براہیمی کی جانب سے جاری کردہ ایک مشترکہ بیان میں کہا گیا ہے کہ شام میں جاری خانہ جنگی میں تاریخی انسانی ورثے کو شدید نقصان پہنچ رہا ہے اور اس تنازعے میں شامل فریقوں کو اس ورثے کی حفاظت کو یقینی بنانے کے لیے اقدامات کرنا چاہیئں۔ بیان میں فریقین سے مطالبہ کیا گیا ہے کہ وہ ان تاریخی مقامات کی تباہی فوری طور پر بند کریں اور شام کی شاندار تاریخی اور ثقافتی جگہوں کا تحفظ یقینی بنائیں۔

اس بیان میں تاریخی اور تقافتی مقامات کو عسکری کارروائیوں اور فوجی سرگرمیوں کے لیے استعمال کرنا کی بھی شدید مذمت کی گئی ہے۔ خیال رہے کہ شام میں جاری خانہ جنگی کی وجہ سے عالمی ورثہ کہلائے جانے والے مقامات بشمول پالمیرا، سینٹ سائمن چرچ اور حلب کیتھیڈرل کو شدید نقصان پہنچا ہے۔

اقوام متحدہ کے اعلیٰ عہدیداروں کے اس مشترکہ بیان میں کہا گیا ہے، ’ایک ایسے موقع پر جب شامی عوام بدترین تکلیف اور مسائل کا شکار ہیں، ان کے ملک کی شاندار ثقافتی جگہیں بھی اس خانہ جنگی سے شدید متاثر ہورہی ہیں۔‘

بیان میں مزید کہا گیا ہے، ’ثقافتی مقامات کو ایک منظم طریقے سے لوٹا جا رہا ہے اور ان اہم قدیمی اشیاء کو غیرقانونی طریقے سے بیچے جانے کا سلسلہ بھی غیرمعمولی حد تک جاری ہے۔‘

اقوام متحدہ نے تاجروں اور سیاحوں سے کہا ہے کہ وہ شام سے تعلق رکھنے والے ایسے قدیمی اشیاء کو خریدنے سے اجتناب برتیں۔

’ہم تمام ممالک اور فنون سے تعلق رکھنے والی اشیاء کی تجارت کرنے والے اداروں کے ساتھ ساتھ افراد اور سیاحوں سے بھی اپیل کرتے ہیں کہ قدیم شامی اشیاء کی خریداری سے پرہیز کریں اور کچھ بھی خریدنے سے قبل اس کے ماخذ کے بارے میں تحقیق کریں، کیوں کہ یہ اشیاء ممکنہ طور پر غیرقانونی طریقے سے شام سے اسمگل ہو رہی ہیں۔‘‘