عرب اسپرنگ سے متاثر ہو کر شام کے شہر درعا سے شروع ہونے والا حکومت مخالف احتجاج حکومتی کارروائی کا نشانہ کیا بنا کہ احتجاج اور مظاہروں کی فضا بتدریج سارے ملک میں پھیل گئی۔ پھر یہ احتجاج ایک خونی مزاحمتی تحریک کی صورت اختیار کر گئی۔ گزشتہ چار خونی برسوں کے بعد اب شام حکومتی فوج، انتہا پسند مسلح جہادی گروپوں اور کرد جنگجؤں کا جنگی میدان بن چکا ہے۔ شام مکمل تباہی و بربادی کا شکار ہے۔ لوگوں کو اندرون ملک جہاں بے گھری کا سامنا ہے وہیں لاکھوں شامی ہمسائے ملکوں میں پناہ گزینوں کی زندگی بسر کرنے پر مجبور ہیں۔

شام کے حالات و واقعات پر نگاہ رکھنے والے ادارے سیرین آبزرویٹری فار ہیومن رائٹس کے مطابق اب تک اِس جنگ میں دو لاکھ پندرہ ہزار سے زائد انسان مارے جا چکے ہیں۔ گزشتہ چار برسوں میں ہلاکتوں کی کل تعداد کا ایک تہائی حصہ شہریوں کی ہلاکت پر مشتمل ہے۔ ہلاک ہونے والوں میں دس ہزار سے زائد بچے بھی شامل ہیں۔ آبزرویٹری نے اپنی خصوصی رپورٹ میں واضح کیا کہ شام اِس وقت بے گھر افراد اور ہلاک شدگان کے لواحقین کا ملک بھ چکا ہے اور اِس ملک کی تباہی و بربادی کو روکنے میں انٹرنیشنل کمیونٹی مؤثر کردار ادا کرنے میں ناکام ہو گئی ہے۔

برطانوی شہر لندن میں قائم سیرین آبزرویٹری برائے ہیومن رائٹس نے یہ بھی واضح کیا ہے کہ بشار اسد حکومت کی جیلوں میں کم از کم تیرہ ہزار افراد کو ٹارچر کر کے بھی ہلاک کیا گیا ہے۔ ابھی بھی ہزاروں افراد مختلف جیلوں میں مقید ہیں۔ آبزرویٹری کے مطابق شامی تنازعے میں ہلاکتوں کی تعداد بیان شدہ تعداد سے کہیں زیادہ ہو سکتی ہے کیونکہ ہزارہا لاپتہ افراد کی کوئی خبر نہیں ہے۔ سن 2013 میں اسد حکومت نے کیمیاوی ہتھیاروں کو بھی استعمال کیا تھا۔ لاکھوں انسانوں کی ہلاکت اور ملک میں خانہ جنگی جیسے حالات کے باوجود شام کی علوی اقلیت سے تعلق رکھنے والے صدر بشار الاسد بدستور اقتدار سے چمٹے ہوئے ہیں۔ عالمی برادری اور شامی اپوزیشن مسلسل اُن کے مستعفی ہونے کا مطالبہ کرتی چلی آ رہی ہے۔ ایسے خدشات بھی سامنے آئے ہیں کہ اگر اسد حکومت آج کل کے حالات میں ختم ہو جاتی ہے تو امکاناً شام پر مسلمان جہادی غلبہ حاصل کر سکتے ہیں۔

اقوام متحدہ کے پناہ گزینوں کے ادارے UNHCR نےکہا ہے کہ شام اِس وقت، موجودہ دور میں انسانی ہمدردی کی ہنگامی امداد کا مستحق علاقہ بن چکا ہے۔ اِس ادارے کے مطابق چالیس لاکھ افراد اپنی جانیں بچانے کے لیے ملک سے راہِ فرار اختیار کر چُکے ہیں۔ شام کے اندر جنگی حالات کا سامنا کرنے والے شہروں، قصبات اور دیہات سے قریب ستر لاکھ لوگ بےگھری کا شکار ہیں۔ اقوام متحدہ کے ادارے نے کہا ہے کہ شام کی ساٹھ فیصد آبادی جہاں غربت کا شکار ہے وہیں سارے ملک کا بنیادی انتظامی ڈھانچہ ٹوٹ پھوٹ کا شکار ہو کر رہ گیا ہے۔ ہسپتال اور اسکول اپنی شناخت کھو بیٹھے ہیں۔ ماہرین اقتصادیات کے مطابق شامی کرنسی خانہ جنگی کے بعد کوئی وقعت نہیں رکھتی اور معیشت تیس برس پیچھے چلی گئی ہے۔