بھارت کے اپوزیشن سیاستدانوں نے باوردی خاتون پولیس افسر کے ساتھ اداکار شاہ رخ خان کے ڈانس کو پولیس وردی کے وقار کے منافی قرار دیا ہے۔ بھارت کی اپوزیشن پارٹی کانگریس کے ریاست مغربی بنگال کے سربراہ اَدہِر رنجن چوہدری کا کہنا ہے کہ رقص کا یہ انداز باعثِ شرم ہے اور پولیس وردی کی کُھلم کُھلا تذلیل ہے کہ ایک باوردی پولیس افسر اسٹیج پر رقص کرتی پھرے۔ بھارتی اخبار ٹائمز آف انڈیا کے مطابق رقص کے دوران جب سب انسپکٹر سامپا ہلدار کو شاہ رُخ خان نے اپنی بانہوں اٹھایا تو وہ زور زور سے قہقے لگا رہی تھیں۔

شاہ رُخ خان بھارتی ریاست مغربی بنگال کے برانڈ ایمبیسڈر ہیں۔ وہ بھارت میں عام طور پر کنگ خان کےنام سے بھی جانے جاتے ہیں۔ تقریب میں انہوں نے جس وقت مغربی بنگال کی خاتون سب انسپکٹر سامپا ہلدار کے ساتھ رقص شروع کیا تو اُس وقت ریاست مغربی بنگال کی وزیراعلیٰ ممتا بینر جی بھی موجود تھیں۔ یہ تقریب کولکتہ پولیس کے سالانہ ثقافتی پروگرام کا حصہ تھی۔ یہ رنگا رنگ ثقافتی تقریب کولکتہ کے نیتاجی انڈور اسٹیڈیم میں منعقد کی گئی تھی۔

جس گانے پر شاہ رُخ خان نے سب انسپکٹر سامپا ہلدار کے ساتھ رقص کیا وہ مشہور فلم ’جب تک ہے جان‘ سے لیا گیا تھا۔ انڈین کانگریس کے ریاستی صدر اَدہِر رنجن چوہدری نے اس صورت حال اور ریاستی وزیر اعلیٰ پر تنقید کرتے ہوئے کہا کہ بھارت کا دستور اِس کی اجازت نہیں دیتا کہ کوئی بھی باوردی اہلکار ڈانس کرتا پھرے۔ کانگریس کے رہنما کے مطابق خاتون پولیس افسر کو اسٹیج پر ڈانس کرنے کی اجازت دینے پر وزیراعلیٰ ممتا بینر جی نے بھارتی دستور کی خلاف ورزی کی ہے۔

خاتون پولیس افسر کے ڈانس پر بھارتی پولیس کے سابق افسران نے بھی تنقید کی ہے۔ کولکتہ پولیس کے سابق کمشنر نروپم سوم کے مطابق خاتون پولیس افسر نے وردی میں ڈانس کر کے وردی کے وقار کو تارتار کر دیا ہے۔ سوم کے مطابق انہوں نے کمشنری کے اپنے دور میں کسی پولیس اہلکار کو وردی میں ڈانس کرنے کی اجازت نہیں دی تھی۔ نروپم سوم کے مطابق اگر خاتون پولیس افسر کو ڈانس ہی کرنا تھا تو وہ عام کپڑوں میں کرتی تو کسی کو اعتراض نہ ہوتا۔ ایک اور سابق پولیس افسر سمیر گنگو پادائے کا بھی کہنا ہے کہ پولیس قوانین بھی وردی میں ڈانس کی ممانعت کرتے ہیں۔