یہ ’سوشل بائٹ ولیج‘ ہے۔ گزشتہ کئی برسوں سے یہاں بے گھر افراد کی مدد کی جا رہی ہے۔ اس منصوبے میں تعاون فراہم کرنے والے کھانے پینے کی اشیاء پہلے ہی مہیا کر دیتے ہیں، جنہیں بعد میں یہاں رہنے والے بے گھر افراد میں بانٹ دیا جاتا ہے۔

’سوشل بائٹ ولیج‘ کا مقصد صرف یہ نہیں کہ بے گھر افراد کوصرف کھانا پینا فراہم کیا جائے بلکہ ایک مقصد انہیں چھت مہیا کرنا بھی ہے۔ اس گاؤں میں بیس افراد رہ رہے ہیں۔ یہ گھر چھوٹے اور انتہائی پائیدار ہیں۔

ان چھوٹے گھروں میں ایک ہی کمرہ ڈرائنگ اور ڈائننگ روم ہے۔ اس میں ایک چھوٹا سے باورچی خانہ بھی ہے۔ اسی طرح دوسرے کمرے میں غسل خانہ ہے۔ یہ بہت پر تعیش تو نہیں مگر سڑکوں پر راتیں بسر کرنے سے بہت بہتر ہے۔

یہ تمام گھر لکڑی سے بنائے گئے ہیں۔ لکڑی کے ساتھ ساتھ پچیس سینٹی میٹر موٹائی والی انسولیشن بھی لگائی گئی ہے تاکہ سردی سے بچا جا سکے۔

ان گھروں میں خواب گاہ بہت زیادہ فاصلے پر نہیں ہے۔ اس کمرے کو کم جگہ استعمال کرتے انتہائی آرام دہ بنایا گیا ہے۔ بے گھر افراد طویل عرصے تک یہاں قیام نہیں کر سکتے۔

بے گھر افراد کو رہنے میں جتنا بھی مزہ آ رہا ہو، اٹھارہ ماہ سے زیادہ یہاں کوئی قیام نہیں کر سکتا۔ اس دوران ’سوشل بائٹ ولیج‘ کے کارکن ان بے گھر افراد کی مدد کرتے ہیں تاکہ وہ اپنی زندگی دوبارہ شروع کرنے کے قابل ہو سکیں۔

’سوشل بائٹ ولیج‘ کے کارکن ان کو بھی تعاون فراہم کرتے ہیں، جو ماضی میں بے گھر افراد کے اس گاؤں کا حصہ رہ چکے ہوں۔ انہیں روزگار کی تلاش اور روز مرہ زندگی کے حوالے سے اہم معلومات مہیا کی جاتی ہیں۔ اس تصویر میں دکھائی دینے والے دونوں افراد ماضی میں بے گھر تھے اور اب ’سوشل بائٹ ولیج‘ منصوبے کے لیے کام کر رہے ہیں۔

جوش لٹل جون بے گھر ہونے کی حالت کے خاتمے کے لیے جنگ کا اعلان کر چکے ہیں۔ وہ اس منصوبے کے شریک بانی بھی ہیں۔ شاید یہ منصوبہ اسکاٹ لینڈ کے دیگر حصوں کے لیے بھی ایک مثال بن جائے یا پھر دنیا کے دیگر ممالک میں بھی اسی طرح کے منصوبے شروع کر دیے جائیں۔

یہ تصویر جرمن وفاقی ریاست اور شہر بریمن کے غریب ترین سمجھے جانے والے علاقے کی ہے۔ بریمن میں ہر پانچویں شخص کو غربت کے خطرات لاحق ہیں۔ جرمنی میں غریب اسے تصور کیا جاتا ہے جس کی ماہانہ آمدنی درمیانے درجے کے جرمن شہریوں کی اوسط آمدنی سے ساٹھ فیصد سے کم ہو۔

بریمن میں تین ایسی غیر سرکاری تنظیمیں بھی سرگرم ہیں جنہوں نے غربت اور بھوک کے خلاف جنگ شروع کر رکھی ہے۔ یہ ادارے سپر مارکیٹوں اور بیکریوں سے بچا ہوا کھانا اور اشیائے ضرورت جمع کر کے ضرورت مند افراد میں تقسیم کرتے ہیں۔ ایسی ایک تنظیم ہر روز قریب سوا سو افراد کو کھانا مہیا کرتی ہے۔

جرمن شہر ایسن میں ایک نجی تنظیم نے غیر ملکی افراد کو مفت خوراک مہیا نہ کرنے کا فیصلہ کیا تھا جس پر شدید تنقید سامنے آنے کے بعد انہیں فیصلہ تبدیل کرنا پڑا۔ بریمن میں سرگرم تنظیموں کا تاہم کہنا ہے کہ وہ ہر رنگ اور نسل سے تعلق رکھنے والے غریب افراد کی مدد کرتے ہیں۔

اسی سالہ ویرنر ڈوزے رضاکارانہ طور پر غریبوں کو خوراک مہیا کرنے والی تنظیم بریمنر ٹافل کے لیے کام کرتے ہیں۔ کئی افراد ایک یورو فی گھنٹہ اجرت کے عوض اور بہت سے رضاکار طالب علم بھی ’غربت کے خلاف جنگ‘ کا حصہ ہیں۔

مشرقی جرمنی میں ہالے شہر کی رونقیں قابل دید تھیں لیکن اب ہالے نوئے اسٹڈ کا علاقہ ویرانی کا منظر پیش کرتا ہے۔ ہالے میں بے روزگاری کی شرح بھی زیادہ ہے اور روزگار ملنے کے امکانات بھی کم ہیں۔

ہالے میں محروم ترین طبقے کی مدد کے لیے انہیں کم داموں پر اشیائے خورد و نوش اور کپڑے فراہم کیے جاتے ہیں۔ ان ’سوشل مارکیٹوں‘ میں محروم ترین طبقے سے تعلق رکھنے والے بچوں اور معمر افراد کو ترجیحی بنیادوں پر یہ اشیا فراہم کی جاتی ہیں لیکن غریب ترین جرمن شہر ہالے میں ضرورت مندوں کی تعداد بڑھتی جا رہی ہے۔

یہ تصویر ایک ایسے اسٹور کی ہے جہاں گھر کی اشیا سستے داموں فراہم کی جاتی ہیں۔ اسٹور کے ملازم کا کہنا ہے کہ خریداروں کی اکثریت غیر ملکیوں اور مہاجرین کی ہوتی ہے۔ ان کے بقول غریب جرمن شہری شاید استعمال شدہ اشیا خریدنے میں شرمندگی محسوس کرتے ہیں۔

جرمنی میں قریب ایک ملین بچے غربت کا شکار ہیں۔ ایسے بچے نہ تو سالگرہ کی تقریبات منا پاتے ہیں، نہ کھیلوں کے کلبوں کا رخ کر سکتے ہیں۔ اعداد و شمار کے مطابق جرمنی میں ہر ساتواں بچہ حکومت کی فراہم کردہ سماجی امداد کا محتاج ہے۔

’شنٹے اوسٹ‘ نامی ایک تنظیم چھ سے پندرہ برس عمر کے پچاس بچوں کو اسکول کے بعد کھانا مہیا کرتی ہے۔ ادارے کی ڈائریکٹر بیٹینا شاپر کہتی ہیں کہ کئی بچے ایسے ہیں جنہیں ایک وقت کے لیے بھی گرم کھانا دستیاب نہیں ہوتا۔ اس تنظیم کی خواہش ہے کہ کوئی بچہ گھر بھوکا نہ جائے۔

بیٹینا شاپر کا کہنا ہے کہ ضرورت مند بچوں کی تعداد بڑھتی جا رہی ہے جن میں مہاجر بچوں کی بڑی تعداد بھی شامل ہے۔ ان کی تنظیم بچوں کو کھانا مہیا کرنے کے علاوہ ہوم ورک اور روز مرہ کے کاموں میں بھی معاونت فراہم کرتی ہے۔ دانت صاف کرنے کا درست طریقہ بھی سکھایا جاتا ہے۔

ایک اندازے کے مطابق قریب چھ ہزار بے گھر افراد برلن کی سڑکوں پر سونے پر مجبور ہیں۔ جرمن دارالحکومت کے ساٹھ فیصد بے گھر افراد غیر ملکی ہیں اور ان کی اکثریت کا تعلق مشرقی یورپی ممالک سے ہے۔

ایک حادثے میں یورگ کی ایک ٹانگ ضائع ہو گئی تھی اور وہ گزشتہ چھ برس سے بے گھر ہے۔ یورگ کا کہنا ہے کہ برلن میں بے گھر افراد کی تعداد بڑھنے کے ساتھ ساتھ ایسے افراد میں آپسی مقابلہ بھی بڑھ رہا ہے۔ تعمیر کے فن میں مہارت رکھنے والے اڑتیس سالہ یوگ کی خواہش ہے کہ کسی دن وہ دوبارہ ڈرم بجانے کے قابل ہو پائے۔