پاکستان میں مون سون کی بارشوں کا طوفانی سلسلہ جاری ہے۔ ملک کا دوسرا بڑا شہر لاہور بھی ان بارشوں کی وجہ سے اربن فلڈنگ کی زد میں ہے۔ تازہ ترین برساتی سلسلے کی وجہ سے لاہور کی سڑکیں بھی تالاب کا منظر پیش کرتی رہیں۔

لاہور میں ہونے والی شدید بارش کی وجہ سے کئی انڈر پاسز میں پانی کھڑا ہو گیا اور ٹریفک کی روانی متاثر ہوئی۔

بارش اتنی شدید تھی کہ نشیبی علاقوں میں پانی گھروں میں داخل ہو گیا اور سڑکیں اور گلیاں برساتی پانی سے بھر گئیں۔ بجلی کا کرنٹ لگ جانے کی وجہ سے متعدد افراد کو ہسپتالوں میں بھی داخل کرایا گیا ہے۔

لاہور کے علاقے تاجپورہ میں دو سو اڑتیس ملی میٹر بارش ہونے کی وجہ سے زندگی کے معمولات معطل ہو کر رہ گئے۔ اس علاقے کی مارکیٹوں میں پانی کھڑا ہونے کی وجہ سے کاروبار بری طرح متاثر ہوا۔

اربن فلڈنگ کا باعث بننے والی مون سون کی طوفانی بارشوں کی وجہ سے نشیبی علاقے زیر آب آ چکے ہیں اور لوگوں کی نقل و حرکت بھی متاثر ہو رہی ہے۔

قدرتی آفات سے نمٹنے کے سرکاری صوبائی ادارے پی ڈی ایم اے نے رواں ہفتے (اکیس سے چھبیس جولائی تک) لاہور میں شدید بارشوں کے حوالے سے الرٹ جاری کیا ہے اور تمام متعلقہ اداروں کو ضروری احتیاطی تدابیر اختیار کرنے کے لئے کہا ہے۔

لاہور اور اس کے گردونواح میں مزید بارشوں کی پشین گوئی کے باعث واسا کے عملے کو ہمہ وقت تیار رہنے اور متاثرہ علاقوں سے بارشی پانی کے جلد نکاس کو یقینی بنانے کی ہدایت کی گئی ہے۔

حالیہ سیلاب کے نتیجے میں پاکستانی صوبہٴ پنجاب میں اب تک کوئی 244 دیہات متاثر ہوئے ہیں۔ یہ تصویر پنجاب کے ضلع لیہ کی ہے، جہاں دیہاتی اپنا بچا کھچا سامان لے کر پانی میں سے گزرتے ہوئے کسی محفوظ مقام کی جانب جانے کی کوشش کر رہے ہیں۔

شدید بارشوں کے بعد لاہور کے کئی وسطی علاقوں میں سڑکیں ندی نالوں کا منظر پیش کر رہی ہیں۔ 23 جون 2015ء کی اس تصویر میں تین لڑکیاں لاہور کی ایک زیرِ آب سڑک میں سے راستہ بناتے ہوئے گزر رہی ہیں۔

دریاؤں میں طغیانی کے باعث ہزاروں ایکڑ زرعی اراضی پر کھڑی فصلیں تباہ ہو چکی ہیں جبکہ پانی کی تند و تیز لہریں کچے مکانات اور جھونپڑیوں کو اپنے ساتھ بہا کر لے گئی ہیں۔ قدرتی آفات سے نمٹنے کے سرکاری اداروں کی مدد اوّل تو پہنچے گی ہی نہیں اور پہنچی بھی تو بہت دیر سے پہنچے گی۔ ایسے میں لوگ اپنی مدد آپ کے تحت ہی اپنی جانیں اور اپنا مال اسباب بچانے کی کوشش کر رہے ہیں۔

بارش کتنی ہی شدید ہو، زندگی کے معمولات تو چلتے ہی رہتے ہیں۔ یہ منظر کسی دور دراز کے دیہی علاقے کا نہیں ہے۔ یہ گدھا گاڑیاں پاکستان کے ترقی یافتہ شہروں میں شمار ہونے والے اور دوسرے بڑے شہر لاہور کی سڑکوں پر رواں دواں ہیں۔

اس تصویر میں صوبے خیبرپختونخوا کے ضلع چارسدہ کے عوام سیلاب زدہ علاقوں سے بچ کر نکلنے کی کوشش میں ہیں۔ ایک ہفتے تک جاری رہنے والی طوفانی بارشوں کے بعد جو سیلاب آیا ہے، اُس سے سب سے زیادہ متاثرہ علاقوں میں سے ایک اسی شمال مغربی صوبے کا ضلع چترال ہے، جہاں تین لاکھ افراد متاثر ہوئے ہیں۔ بدستور جاری بارشوں کی وجہ سے امدادی کاموں میں مشکلات پیش آ رہی ہیں۔

مون سون کے موسم میں ہر سال پاکستان میں درجنوں افراد موت کے منہ میں چلے جاتے ہیں۔ آسمان سے اتنا پانی برستا ہے کہ زمین برداشت نہیں کر سکتی۔ پانی کی لہریں ندی نالوں سے ہوتی ہوئی گھروں کے اندر تک پہنچ جاتی ہیں۔ یہ سیلابی لہریں کتنی ہی بڑی اور ہلاکت خیز آفت کیوں نہ ہوں، لوگ پانی میں سے ایسے گزرتے نظر آ رہے ہیں، جیسے یہ ایک معمول کی بات ہو، جو کہ ایک طرح سے ہے بھی۔

خیبر پختونخوا کے ضلع چترال میں تند و تیز طوفانی لہریں مکانات کے ساتھ ساتھ درجنوں پُل بھی اپنے ساتھ بہا کر لے گئی ہیں، جس کے بعد لاکھوں لوگ پھنس کر رہ گئے ہیں۔ ماہرین موسمیات کا کہنا ہے کہ ابھی بارشوں کا سلسلہ مزید کئی روز تک جاری رہے گا۔

پاکستانی صوبے خیبرپختونخوا کے دارالحکومت پشاور کی سڑکیں بھی اس بار شدید بارشوں کے بعد ندی نالوں کی شکل اختیار کر گئیں۔ ایک بس پانی کی لہروں کا مقابلہ کرتے ہوئے پشاور کی ایک سڑک گزر رہی ہے۔

پاکستانی حکام نے کہا ہے کہ حالیہ سیلاب کی وجہ سے پچاس لاکھ سے زائد افراد متاثر ہو سکتے ہیں۔ بارشوں اور سیلاب کی وجہ سے صوبہ پنجاب اور پاکستان کے زیر انتظام کشمیر میں اب تک 270 افراد ہلاک ہو چکے ہیں۔ سیلاب سے 20 لاکھ افراد پہلے ہی متاثر ہو چکے ہیں جب کہ وزیر خزانہ اسحاق ڈار کے مطابق مزید 30 لاکھ کے متاثر ہونے کا خدشہ ہے۔

پاکستانی دارالحکومت اسلام آباد کے مضافات میں فوج کا ایک ہیلی کاپٹر ایک گھر کی چھت پر موجود لوگوں کو محفوظ مقام پر منتقل کرنے کی کارروائی میں مصروف نظر آ رہا ہے۔ بارشوں کے باعث لاتعداد دیہات زیرِ آب آ چکے ہیں جبکہ متعدد مکانات زمیں بوس ہو چکے ہیں۔

لاہور سے 160 کلومیٹر شمال مغرب کی طرف واقع شہر چنیوٹ کے قریب ایک رضاکار سیلاب میں پھنسے ہوئے ایک بچے کو محفوظ مقام پر پہنچا رہا ہے۔ دریائے چناب اور دریائے راوی میں اونچے درجے کا سیلاب آنے کے باعث سینکڑوں دیہات زیرِ آب آ چکے ہیں۔

گوجرانوالہ ڈویژن اور آس پاس کے علاقوں میں سیلاب نے اتنی تباہی مچا رکھی ہے کہ کئی مقامات پر پانی مکانات کی چھتوں کے اوپر سے ہو کر گزر رہا ہے۔ اس تصویر میں پاکستان صوبہٴ پنجاب میں گوجرانوالہ کے قریب وزیر آباد کے مقام پر ایک مسجد پانی میں ڈوبی ہوئی نظر آ رہی ہے۔

ہر سال کی طرح اس سال بھی مون سون کی شدید بارشوں نے لاہور کو اٹلی کے مشہور شہر وینس کی طرح بنا دیا ہے، جہاں لوگ تار کول کی سڑکوں کی بجائے نہروں میں کشتیوں کے ذریعے ایک سے دوسری جگہ آتے جاتے ہیں۔ لاہور میں نکاسیٴ آب کا نظام بری طرح سے مفلوج ہو کر رہ گیا ہے۔

اس بار مون سون کی بارشیں اتنی شدت کے ساتھ ہوئی ہیں کہ جہاں درجنوں دیہات زیرِ آب آ گئے ہیں، وہاں شہروں میں بھی بے شمار مقامات پر پانی گھروں کے اندر داخل ہو گیا ہے۔ اس تصویر میں راولپنڈی میں ایک گھر کے باسی اپنے گھر سے بالٹیوں کے ذریعے پانی باہر پھینک رہے ہیں۔

لاہور کے بے بس شہری ایک طرف سے پانی گھروں سے باہر پھینکتے ہیں، دوسری جانب سے گھر پھر پانی سے بھر جاتے ہیں۔ گھروں کے باہر بھی ہر طرف پانی ہی پانی ہے۔ گھروں کے اندر سے باہر پھینکے جانے والے پانی سے سڑکوں اور گلیوں میں کھڑے پانی کی سطح اور بھی بلند ہو جاتی ہے لیکن شہری بے چارے بھی کیا کریں۔ آسمان سے برستے اور گلیوں میں کھڑے پانی سے بے پناہ مالی نقصان بھی ہو رہا ہے۔

لاہور کی کئی سڑکوں اور گلیوں میں چار چار فٹ پانی کھڑا ہے۔ ان حالات میں موٹر سائیکل یا کار کے ذریعے سفر کرنا محال ہو چکا ہے۔ ایسے میں لوگ ایک سے دوسری جگہ آنے کے لیے ایک بار پھر تانگے اور ریڑھے استعمال کر رہے ہیں۔

لاہور کی سڑکوں پر ہر طرف پانی ہی پانی نظر آ رہا ہے۔ بتایا گیا ہے کہ شاہ جمال کے علاقے میں لوگ کشتیوں کے ذریعے ایک سے دوسری جگہ آ جا رہے ہیں۔ دریائے چناب، دریائے راوی اور دریائے ستلج میں اونچے درجے کا سیلاب ہے اور کئی نہروں میں شگاف پڑ جانے سے درجنوں دیہات زیرِ آب آ چکے ہیں۔

لاہور میں کئی خستہ حال مکانوں کی چھتیں گرنے سے متعدد ہلاکتیں بھی ہوئی ہیں۔ سڑکوں اور گلیوں میں کھڑے پانی کی وجہ سے لوگ اپنے گھروں میں محصور ہو کر رہ گئے ہیں یا پھر اُنہیں ایک سے دوسری جگہ جانے کے لیے کئی کئی فٹ پانی میں سے گزر کر جانا پڑتا ہے، جیسے کہ اس تصویر میں نظر آ رہا ہے۔

سیلاب کی خبریں آتے ہی پاکستانی فوج کے دستے اُن علاقوں میں روانہ کر دیے گئے، جہاں سیلاب کی وجہ سے تباہ کاریوں کے خدشات تھے۔ اس تصویر میں اسلام آباد کے نواح میں فوج کا ایک ہیلی کاپٹر امدادی آپریشن کے دوران اڑتا نظر آ رہا ہے۔

شدید بارشوں کے بعد سڑکیں زیرِ آب آ جانے کے بعد ٹرانسپورٹ کے تمام مشینی ذرائع، جن میں موٹر انجن استعال ہوتا ہے، جواب دے چکے ہیں۔ اس تصویر میں بھی لاہور شہر میں ایک رکشہ کا انجن بند ہو جانے کے بعد اُسے دھنکہ لگا کر سٹارٹ کرنے کی کوشش کی جا رہی ہے۔

لاہور شہر کا ایک اور منظر، جس میں ایک سڑک میں دھنس جانے والے ایک ٹرک کو باہر نکالنے کی کوشش کی جا رہی ہہے۔ لاہور میں تعمیر کیے جانے والے کئی ایک انڈر پاس بھی پانی کی نکاسی کا مناسب انتظام نہ ہونے کے باعث پیراکی کے تالابوں کی سی شکل اختیار کر چکے ہیں۔

لاہور شہر کی سڑکیں دریا بن چکی ہیں۔ ایسے میں لوگ ایک سے دوسری جگہ آنے جانے کے لیے پھونک پھونک کر قدم رکھتے ہیں کیونکہ کسی بھی جگہ آپ کا پاؤں پھسل سکتا ہے اور آپ کسی گہرے کھڈے یا کسی مین ہول میں گر کر ڈوب سکتے ہیں۔

لاہور کی ایک گلی میں ایک شخص خود کو بارش سے بچانے کے لیے ایک پوسٹر سر پر رکھے چلا جا رہا ہے۔ ماہرینِ موسمیات کا کہنا ہے کہ ابھی کچھ اور روز تک اسی طرح سے ملک کے تمام علاقوں میں بارشیں جاری رہیں گی۔ پاکستان کے زیر انتظام کشمیر میں کئی مقامات پر زمینی تودے گرنے سے بھی متعدد مکانات تباہ ہوئے ہیں اور جانی نقصان بھی ہوا ہے۔

راولپنڈی کے قریب سیلاب سے متاثرہ ایک علاقے میں کچھ شہری اپنے تباہ شدہ مکانات کے ملبے کے ڈھیر کے پاس کھڑے خود کو غالباً یہ یقین دلانے کی کوشش کر رہے ہیں کہ اب وہ بے گھر ہو چکے ہیں اور موسم بہتر ہونے پر اُنہیں اپنے اپنے گھر نئے سرے سے تعمیر کرنا پڑیں گے۔

لاہور میں سرخ رنگ کی چھتری تھامے یہ بچی اپنے والد کی کمر پر بیٹھ کر بارش کے پانی میں سے اپنا راستہ بناتے ہوئے گزر رہی ہے۔ لاہور شہر کی حالت بد انتظامی کا منہ بولتا ثبوت ہے۔ ایک ایسے وقت میں جب ملک پہلے ہی ایک بڑے سیاسی بحران کی لپیٹ میں تھا، آسمان سے برستے پانی نے ملک کو ایک اور بڑی آفت سے دوچار کر دیا ہے۔

لاہور کی زیرِ آب گلیوں میں لوگوں کو اپنی اَشیائے ضرورت کے حصول کے لیے مجبوراً گھروں سے باہر بھی نکلنا پڑتا ہے اور پانی کی بے لگام موجوں میں سے اپنا رستہ بنانا پڑتا ہے۔ ایک شخص اپنے بچے کو گود میں اٹھائے پانی میں سے گزر رہا ہے۔