نیوز ایجنسی روئٹرز کے مطابق ترک دارالحکومت انقرہ میں امریکی سفارت خانے کے ایک ترجمان نے بتایا کہ شامی اپوزیشن کو ہر قسم کی غیر مہلک امداد کی فراہمی کی معطلی کا فیصلہ اپوزیشن کی سپریم ملٹری کونسل کے ہیڈ کوارٹرز اور ذخیرہ گاہوں پر اسلامک فرنٹ کی فورسز کے حملے اور قبضے کے بعد کیا گیا ہے۔

خانہ جنگی کے شکار ملک شام میں اسلامک فرنٹ چھ بڑے باغی گروپ کے اتحاد کا نام ہے۔ اس فرنٹ کے فائٹرز نے گزشتہ جمعے اور ہفتے کی درمیانی رات ترکی کے ساتھ سرحد کے قریب فری سیریئن آرمی کے اڈوں پر قبضہ کر لیا تھا۔ شامی اپوزیشن نے اپنے یہ فوجی اڈے شام کی ترکی کے ساتھ شمال مغربی سرحد کے قریب باب الہوا نامی شامی علاقے میں قائم کر رکھے تھے۔

شامی اپوزیشن کے ان فوجی اڈوں پر اسلام پسندوں کے قبضے کے بعد ترکی نے مشترکہ سرحدی گزرگاہ کو اپنی طرف سے بند کر دیا۔ پھر مقامی کسٹمز حکام کی طرف سے یہ بھی کہا گیا کہ سرحدی گزرگاہ کے پار شامی علاقے میں جھڑپوں میں تیزی آ گئی تھی۔ تاہم ترک حکومتی ذرائع کی طرف سے اس کی ابھی تک باقاعدہ تصدیق نہیں کی گئی۔

نیوز ایجنسی روئٹرز نے اپنی رپورٹوں میں لکھا ہے کہ شام میں صدر بشار الاسد کی حکومت کے خلاف مارچ 2011ء میں پرامن احتجاجی مظاہروں کے ساتھ شروع ہونے والی جدوجہد کافی عرصے سے باقاعدہ خانہ جنگی بن چکی ہے۔ لیکن شامی باغیوں کی صدر اسد کو اقتدار سے علیحدہ کرنے کی کوششیں اس لیے کافی کمزور پڑ چکی ہیں کہ ان باغیوں کے مختلف دھڑوں کے مابین خونریز جھڑپیں اب معمول بن چکا ہے۔

انقرہ میں امریکی سفارت خانے کے ترجمان کے مطابق فری سیریئن آرمی کے اڈوں پر اسلامک فرنٹ کے فائٹرز کے قبضے کے بعد واشنگٹن نے ’شمالی شام میں اپوزیشن کو مہیا کی جانے والی غیر مہلک امداد کی ہر قسم کی سپلائی معطل‘ کر دی ہے۔ تاہم سفارت خانے کے ترجمان نے یہ بھی کہا کہ انسانی بنیادوں پر امداد کی فراہمی اس اقدام سے متاثر نہیں ہوئی کیونکہ یہ امداد بین الاقوامی اور غیر حکومتی تنظیموں کے ذریعے تقسیم کی جاتی ہے۔

روئٹرز کے مطابق باب الہوا میں ایف ایس اے کے فوجی اڈوں پر شامی باغیوں کے حریف دھڑے کے جنگجوؤں کے قبضے پر ابھی تک اپوزیشن کی فری سیریئن آرمی کی طرف سے کوئی تبصرہ نہیں کیا گیا۔