ہفتہ سولہ اپریل کو آنے والے زلزلے کے نتیجے میں کم از کم بتیس افراد کے ہلاک ہونے کی تصدیق کی گئی ہے جبکہ ہلاکتوں میں اضافے کا خدشہ بھی ہے۔

طبی حکام نے بتایا ہے کہ اس زلزلے کی تباہی کاری کی وجہ سے کم ازکم دو ہزار افراد زخمی ہوئے ہیں۔ اس زلزلے کی وجہ سے جمعہ اور ہفتے کی درمیانی شب لوگوں گھروں سے باہر نکل آئے اور رات انہوں نے کھلے آسمان تلے بسر کی۔

تازہ زلزلے سے کوماموٹو شہر اور دوسرے قریبی علاقوں کی کئی عمارتوں میں دراڑیں پڑ گئی ہیں۔ کئی مکانات پوری طرح منہدم بھی ہوئے ہیں۔ متاثرین نے اسکولوں، جمنازیمز اور ہوٹلوں کے اندرونی حصوں میں پناہ لے رکھی ہے۔ ہزاروں افراد کو عارضی رہائشوں کی ضرورت ہے۔

ٹوکیو حکومت نے اپنے جنوب مغربی علاقے میں امدادی کارروائیوں میں مصروف فوجیوں کی تعداد بیس ہزار کر دی ہے تا کہ وہ ہر قسم کی سرگرمیوں میں شریک ہو سکیں۔

کوماموٹو کے پہاڑی علاقے منامیاسو میں ایک بہت بڑی لینڈ سلائیڈنگ کی بھی تصدیق کر دی گئی ہے۔ اِس کے علاوہ دو اور مقامات پر بھی مٹی کے انتہائی بڑے تودے گرے ہیں۔ پہاڑی حصوں سے مٹی اور پتھروں کے گرنے سے سڑکیں بند ہو گئی ہیں۔

مسلسل بارش اور خراب موسم کی وجہ سے امدادی کارروائیوں میں شدید مشکلات کا سامنا ہے۔ جاپانی میڈیا کے مطابق دو لاکھ مکانوں کی بجلی کی سپلائی منقطع ہو گئی ہے اور اِس کے ساتھ پینے کے صاف پانی کا نظام بھی بےکار ہو کر رہ گیا ہے۔

ہفتے کو آنے والے زلزلے سے کوماموٹو شہر میں چار سو سالہ قدیمی تاریخی قلعے کو شدید نقصان پہنچا ہے۔ جاپانی وزیراعظم شینزو آبے نے ہلاکتوں پر افسوس کے علاوہ اس تازہ زلزلے میں بھاری نقصان کا خدشہ ظاہر کیا ہے۔

جمعرات کے روز جاپانی جزیرے کیاُشو پر آنے والے زلزلے کی شدت 6.5 تھی۔ اِس زلزلے کی لپیٹ میں دس افراد کی موت واقع ہوئی تھی۔ ہفتے کی صبح ایک اور زلزلے نے مزید خوف پیدا کر دیا۔

ان دونوں زلزلوں کی وجہ سے جاپان کا سب سے بڑا اور فعال آتش فشاں پہاڑ ماؤنٹ آسو بھی پھٹ پڑا ہے اور اِس کے دہانے سے گہرا سیاہ رنگت والا دھواں نکلنا شروع ہو گیا ہے۔ ماؤنٹ آسو کیاُشو جزیرے پر واقع ہے۔

جاپان میں ان تازہ زلزلوں کی وجہ سے ہونے والی تباہی کا اندازہ لگایا جا رہا ہے۔ وزیر اعظم شینزو آبے نے کہا ہے کہ تمام متاثرین کو فوری مدد پہنچائی جائے گی۔ انہوں نے اپیل کی ہے کہ اس قدرتی آفت سے حوصلے پست نہیں ہونا چاہییں۔