آئندہ انتخابات کے لیے ایس پی ڈی پارٹی کے نامزد اُمیدوار کو اپنی آمدنی کے حوالے سے تنقید کا سامنا تھا۔ بالخصوص لیکچرز کے ذریعے حاصل ہونے والی ان کی اضافی انکم جرمنی میں ارکانِ پارلیمنٹ کی آمدنی میں شفافیت کے موضوع پر ہونے والی بحث کا مرکز بنی ہوئی تھی۔

تاہم اب وہ اپنی آمدنی کی تفصیلات جاری کرنے پر تیار ہو گئے ہیں۔ وہ 2009ء میں انگیلا میرکل کی کابینہ میں وزیر خزانہ تھے اور اس وقت بھی جرمن پارلیمنٹ کے رکن ہیں جبکہ ان کی سالانہ آمدنی 95 ہزار 520 یورو ہے۔ تاہم گزشتہ تین برس کے دوران وہ نجی کمپنیوں، بالخصوص بینکوں اور انشورنس کمپنیوں کی جانب سے مالیاتی موضوعات پر لیکچر دینے کی دعوتیں قبول کرتے رہے اور اس مد میں انہیں ماہانہ سات ہزار یورو سے زائد کی رقوم حاصل ہوتی رہیں۔

جرمنی میں ارکان پارلیمنٹ کی جانب سے اضافی آمدنی کے ذرائع رکھنا غیرقانونی نہیں ہے تاہم انہیں ایسی آمدنی کے بارے میں پارلیمانی صدر کو مطلع کرنا ہوتا ہے۔

بالخصوص قدامت پسند جماعتوں کی جانب سے یہ مطالبہ رہا ہے کہ شٹائن بروک اپنی اضافی آمدنی کی مکمل تفصیلات جاری کریں، حالانکہ ان پر ایسا کرنے کی قانونی ذمہ داری عائد نہیں ہوتی۔

قبل ازیں انہوں نے ایسی کوئی بھی تفصیلات فراہم کرنے سے یہ کہتے ہوئے انکار کر دیا تھا کہ سیاسی مخالفین انہیں نشانہ بنا رہے ہیں۔

تاہم اب انہوں نے کثیر الاشاعت اخبار بِلڈ سے بات چیت میں کہا ہے کہ وہ لیکچرز سے حاصل ہونے والی آمدنی کی تفصیلات جاری کر دیں گے۔

انہوں نے یہ بات اس معاملے پر اپنے خلاف تنقید کے ردِ عمل میں کہی۔ ناقدین کا کہنا تھا کہ انہیں وزیر خزانہ ہونے کی وجہ سے یہ آمدنی حاصل کرنے کے مواقع ملے۔

شٹائن بروک یورپی بینکوں پر سخت کنٹرول کے مطالبے بھی کرتے رہے ہیں۔ اس حوالے سے چانسلر انگیلا میرکل کی اتحادی پارٹی سی ایس یو کے سربراہ ہورسٹ زیہوفیر نے کہا تھا کہ بینکوں کی مکمل شفافیت کا مطالبہ کرنے والوں سے جب اپنے بارے میں ایسا کرنے کے لیے کہا جائے تو انہیں حیران نہیں ہونا چاہیے۔

لبرل ڈیموکریٹ ایف ڈی پی کے رائنر بروڈرلے کا کہنا ہے: ’’یہ صرف قانونی معاملہ نہیں ہے۔ اگر کوئی شخص سالانہ 80 تقریریں کرتا ہے، جن کی تیاری کے لیے اسے وقت بھی درکار ہوتا ہے تو آپ حیران ہوں گے کہ وہ شخص اپنی باقاعدہ ملازمت کے لیے وقت کیسے نکالتا ہے۔‘‘

ng / aba (dpa, Reuters)