پاکستانی وزارت خارجہ کے ترجمان محمد فیصل نے آج ہفتہ وار پریس بریفنگ کے دوران کہا ہے کہ ڈاکٹر شکیل آفریدی جس نے سن 2011 میں  اسامہ بن لادن تک پہنچنے میں امریکا کی مدد کی تھی، پاکستان واشنگٹن کے ساتھ اسے رہا کرنے کی کوئی ڈیل نہیں کر رہا ہے۔

پاکستان کی جانب سے یہ بیان اس وقت سامنے آیا ہے جب حال ہی میں پاکستانی انتظامیہ نے شکیل آفریدی کو پشاور سے کسی نامعلوم مقام پر منتقل کیا ہے۔ اس منتقلی کے بعد ایسی افواہیں سر گرم تھیں کہ شاید پاکستان آفریدی کو امریکا کے حوالے کرنے کا ارادہ رکھتا ہے۔

 اس حوالے سے ڈی ڈبلیو سے گفتگو کرتے ہوئے پاکستانی صحافی اعزاز سید نے کہا،’’ یہ حیرت کی بات نہیں ہونی چاہیے، ابھی نہیں لیکن کچھ عرصے میں ہی سہی پاکستان شکیل آفریدی کو امریکا کے حوالے کر دے گا۔‘‘

اعزاز کے مطابق  آفریدی کا خاندان پُر امید ہے کہ اُنہیں بیرون ملک بھیج دیا جائے گا لیکن وہ اس حوالے سے کسی سے بات چیت نہیں کر رہے۔

شکیل آفریدی کا کیس، جسے بھلایا جا چکا ہے

ڈاکٹرشکیل آفریدی نا معلوم مقام پر منتقل

شکیل آفریدی سن 2012  سے جیل میں قید ہیں۔ عدالت نے انہیں عسکریت پسندوں کے ساتھ روابط کے جرم میں 33 سال کی قید سنائی تھی۔ آفریدی کو با ظابطہ طور پر کبھی اسامہ بن لادن کو ڈھونڈنے میں امریکی خفیہ ایجنسی سی آئی اے کی مدد کرنے پر سزا نہیں سنائی گئی۔ مئی 2011 میں امریکی بحریہ کے کمانڈروں نے پاکستان کے شہر ایبٹ آباد میں داخل ہو کر اسامہ بن لادن کو ہلاک کر دیا تھا۔ واشگٹن  شکیل آفریدی کی رہائی کا مطالبہ کرتا رہا ہے لیکن اسلام آباد کی رائے میں انہوں نے ملک کے قانون کی خلاف ورزی کی تھی۔