شہزادہ ہیری کا افغانستان میں 25 افراد کو ہلاک کرنے کا انکشاف
6 جنوری 2023
برطانوی شہزادے ہیری نے انکشاف کیا ہے کہ افغانستان میں جنگ کے دوران انہوں نے 25 افراد کو ہلاک کیا تھا۔ لیکن ان ہلاکتوں پر انہیں نہ تو فخر ہے اور نہ ہی شرمندگی، کیونکہ حالات جنگ میں ایسا ہوتا رہتا ہے۔
تصویر: Marco Bertorello/AFP
اشتہار
برطانیہ کے شاہ چارلس سوم کے چھوٹے بیٹے شہزادہ ہیری کی خودنوشت "اسپیئر" کی اشاعت گوکہ اگلے ہفتے تک کے لیے موخر ہوگئی ہے لیکن اس کا ہسپانوی ترجمہ غلطی سے جمعرات کے روز بازار میں آ گیا۔ حالانکہ بعد میں اسپین میں اس کی کاپیاں دکانوں سے فوراً ہٹالی گئیں لیکن اس وقت تک یہ کتاب میڈیا کے ہاتھ لگ چکی تھی۔
شہزادہ ہیری کے "اسپیئر" کی اشاعت پر آئندہ منگل تک کے لیے روک لگا دی گئی ہے لیکن برطانوی اخبار 'گارڈیئن' کے امریکی ایڈیشن نے کتاب میں کیے گئے بعض 'دھماکہ خیز' انکشافات شائع کردیے ہیں۔
افغانستان میں 25 افراد کو ہلاک کیا
گارڈیئن کے مطابق ڈیوک آف سسیکس شہزادہ ہیری نے افغانستان میں دوجنگی محاذوں پر اپنی ڈیوٹی کے حوالے سے خودنوشت میں لکھا ہے، "بیشتر فوجیوں کو یہ علم نہیں ہوتا ہے کہ انہوں نے کتنے لوگوں کو ہلاک کیا۔ جنگی حالات میں آپ کو بالعموم اندھادھند فائرنگ کرنی پڑتی ہے۔ تاہم اپاچے اور لیپ ٹاپ کے اس دور میں، میں نے دو گھنٹے کی اپنی ڈیوٹی کے دوران جو کچھ کیا وہ سب کچھ ریکارڈ ہے۔ "
انہوں نے لکھا ہے،"میں قطعیت کے ساتھ یہ بتا سکتا ہوں کہ میں نے دشمن کے کتنے لوگ مارے۔ اور مجھے اس تعداد کے حوالے سے کوئی خوف نہیں ہے۔ مسلح افواج میں میں نے جو بہت ساری چیزیں سیکھیں، ان میں سے ایک اہم چیز یہ ہے کہ میں اپنے عمل کے لیے خود ذمہ دار ہوں۔"
شہزادہ ہیری لکھتے ہیں، "جہاں تک تعداد کا سوال ہے تو میں نے 25 افراد کو ہلاک کیا۔ یہ کوئی ایسی چیز نہیں ہے جو میرے لیے باعث فخر ہو لیکن اس پر مجھے کوئی ندامت بھی نہیں۔"
انہوں نے مزید لکھا ہے،"فطری بات ہے کہ نہ تو میں اس تعداد کو یاد رکھنا چاہتا ہوں اور نہ ہی اپنے فوجی کوائف میں اس کو درج کرنا چاہوں گا۔ لیکن میں یہ بھی چاہتا ہوں کہ ایک ایسی دنیا میں رہوں جو طالبان سے پاک ہو، جنگ سے پاک ہو۔ بہر حال حقائق تبدیل نہیں کیے جا سکتے۔"
شہزادہ ہیری نے الزام لگایا ہے کہ سن 2019 میں ان کے بڑے بھائی ولیم نے انہیں مکا مارا اور کالر سے پکڑ کر گھسیٹا تھاتصویر: Alkis Konstantinidis/AP/picture alliance
'شہزادہ ولیم نے مجھے مارا'
کتاب میں شہزادہ ولیم کے متعلق بھی انکشافات اور الزامات ہیں۔ شہزادہ ہیری نے الزام لگایا ہے کہ سن 2019 میں ان کے بڑے بھائی ولیم نے انہیں مکا مارا اور کالر سے پکڑ کر گھسیٹا تھا۔ انہوں نے میری بیوی کو بدتمیز اور خراب کہا۔
شہزادہ ہیری نے شاہی روایات پر بھی سوالات اٹھائے ہیں۔ انہوں نے سوال کیا ہے کہ شاہی اور اشرافیہ کی روایات کے مطابق پہلا بیٹا ہی اعزازات، طاقت اور خوش قسمتی کا وارث کیوں ہوتا ہے؟
انہوں نے لکھا ہے کہ شاہی روایات میں دوسرا بیٹا فالتو ہوتا ہے، جس کی وجہ سے جھگڑے ہوتے ہیں۔ شہزادہ ولیم نے وارث ہونے کا تاثر دیا اور مجھے فالتو ہونا پسند نہیں تھا۔
شہزادہ ہیری کے "اسپیئر" کی اشاعت پر آئندہ منگل تک کے لیے روک لگا دی گئی ہےتصویر: Random House Group/AP Photo/picture alliance
شہزادہ ہیری سن 2020 میں اپنی شاہی ذمہ داریوں سے دست بردار ہوگئے تھے اور ان دنوں امریکہ کے کیلفورنیا میں اپنی بیوی میگھن کے ساتھ رہ رہے ہیں۔
شہزادہ ہیری نے لکھا، "ولیم نے میری توہین کی اور کہا کہ وہ میری مدد کر رہا ہے۔ میں نے کہا یہ کیسی مدد ہے اور کیا واقعی تم مدد کرنے میں سنجیدہ ہو۔ میرے اس تبصرے پر بھائی غصے میں آگیا اور میرے پیچھے کچن میں بھی پہنچ گیا۔ میں نے کچن میں غصہ ٹھنڈا کرنے کے لئے ولیم کو پانی کا گلاس دیا اور کہا کہ تم سے اس حالت میں بات نہیں کرسکتا۔ میں نے جھگڑے کا اپنی بیوی میگھن کو نہیں بتایا لیکن تھراپسٹ فوری بلوانا پڑا۔ بعد میں میگھن نے میرے جسم پر خراشیں اور زخم دیکھے تو افسردہ ہو گئی۔"
شہزادہ ہیری نے اپنی زندگی اور شاہی خاندان کے حوالے سے برطانیہ کے آئی ٹی وی چینل کو ایک انٹرویو بھی دیا ہے جو رواں ہفتے نشر ہوگا۔
شہزادہ ہیری اور میگھن میرکل کی عشق کہانی
شہزادہ ہیری اور امریکی اداکارہ میگھن میرکل آج شادی کے بندھن میں بندھ گئے ہیں۔ ان کے عشق کی کہانی سبھی جاننا چاہتے ہیں۔
تصویر: Reuters
ایک مسکراتا جوڑا
شہزادہ ہیری اور مریکل کی ایک تصویر پہلی بار ستمبر 2017 میں سامنے آئی تھی، جس میں دونوں نے ایک دوسرے کا ہاتھ پکڑ رکھا تھا۔ یہ واقعہ ٹورونٹو میں ویل چیئر ٹینس مقابلے میں شرکت کا تھا۔ ہیری ہی نے زخمی فوجیوں کے لیے ان کھیلوں کا آغاز کیا تھا۔
تصویر: Reuters/D. Sagolj
نوجوان ہیری
شہزادہ چارلس اور شہزادی ڈیانا کے سب سے چھوٹے بیٹے پرنس ہینری آف ویلز، جو پرنس ہیری کے نام سے معروف ہیں، سن 1984 میں پیدا ہوئے۔ ان کا بچپن اپنے والدین کی علیحدگی اور پھر والدہ کی ناگہانی موت سے متاثر ہوا۔ یہ تصویر سن 1995 کی ہے، جس میں شہزادہ ہیری اپنی والدہ کے ساتھ ہیں اور ہیری کے بھائی پرنس ویلیم والدہ کے ساتھ موجود ہیں۔
تصویر: Johny Eggitt/AFP/Getty Images
شہزادی ڈیانا کے بعد
سن 1997 میں ایک کار حادثے میں شہزادی ڈیانا ہلاک ہو گئیں۔ اس وقت ہیری کی عمر فقط بارہ برس تھی جب کہ ان کے بھائی پرنس ویلیم پندرہ سال کے تھے۔ اس تصویر میں دونوں شہزادے اپنی والدہ کے تابوت کے ساتھ ہیں۔ اس واقعے نے شہزادہ ہیری کو بے حد متاثر کیا۔
تصویر: Adam Butler/AFP/Getty Images
زخم کے اندمال کا لمبا وقت
رواں سال کے آغاز پر پرنس ہیری نے اعتراف کیا کہ اسے اپنی پوری زندگی اس ذہنی صدمے سے کتنا لڑنا پڑا۔ ڈیلی ٹیلی گراف سے اپنے ایک انٹرویو میں انہوں نے کہا کہ کئی مواقع پر وہ اس مقام پر تھے، جہاں ذہن مکمل طور پر مفلوج ہو جاتا ہے۔
تصویر: Thomas Coex/AFP/Getty Images
پلے بوائے شہزادہ بڑا ہو گیا
شہزادہ ہیری میں اپنی والدہ کی طرح لوگوں سے ملنے ملانے اور ان سے جڑ جانے کی خاصیت ہے۔ وہ کئی بار مختلف حسین خواتین کے ساتھ دیکھے گئے اور انہیں ایک طویل عرصے تک ’پلے بوائے‘ تک پکارا جاتا رہا۔ نیوز ویک سے بات چیت میں ایک بار شہزادہ ہیری نے کہا تھا کہ وہ شاہی خاندان سے دور بھاگتے ہیں۔
تصویر: Chris Jackson/Getty Images
فوج ایک پناہ گاہ
سن 2005ء میں ایک پارٹی میں متنازعہ نشان سواستیکا والی تصاویر نے شور مچا دیا اور اسی سال وہ فوج میں چلے گئے۔ وہ برطانوی فورسز کے لیے دس سال تک کام کرتے رہے۔ ان کا کہنا ہے کہ لوگوں کی توجہ سے ہٹنے کے اعتبار سے فوج بہترین پناہ گاہ تھی۔
تصویر: John Stillwell/AFP/Getty Images
معروف شہزادہ
فوجی سروس کے دوران انہوں نے دو مرتبہ افغانستان میں اپنی ذمہ داریاں انجام دیں۔ اس طرح پرنس ہیری اپنے ملک ہی میں نہیں دنیا بھر میں مشہور ہو گئے۔ وہ عوامی سطح پر مختلف موضوعات پر کھلے الفاظ میں بات کرتے رہے اور یہی ان کی مقبولیت کی وجہ بنا۔
تصویر: picture-alliance/AP Photo/K. Wigglesworth
میگھن میرکل
برطانوی لوگوں کو تو میگھن میرکل کا علم تک نہیں تھا، تاہم گزشتہ برس اکتوبر سے برطانوی اخبارات میں مسلسل وہ دکھائی دے رہی تھیں۔ میرکل سن 1981 میں امریکی شہر لاس اینجلس میں پیدا ہوئی اور ایک ٹی وی پروگرام میں وہ وکیل کے بہ طور دکھائی دیتی تھیں۔
تصویر: picture-alliance/empics/D. Lawson
میرکل کی پہلی شادی
میگھن میرکل کی پہلی شادی ایک فلم پروڈیوسر سے ہوئی، جو 2010 سے 2013 تک چلی۔ میرکل کا اپنا ایک لائف اسٹائل بلاگ بھی تھا، جو انہوں نے کچھ عرصہ قبل بند کیا۔ اس بلاگ میں وہ خود کو آزاد قرار دیا کرتی تھیں۔
تصویر: picture-alliance/AP Invision/J. Strauss
ملکہ الزبیتھ کی آشیرباد
بیکنگھم پیلس کی جانب سے ایک بیان میں کہا گیا ہے کہ ملکہ برطانیہ شہزادہ ہیری اور میگھن میرکل کی خوشیوں کے لیے دعاگو ہیں۔ یہ بات اہم ہے کہ روایتی طور پر شاہی خاندان کے کسی بھی فرد کی شادی کے لیے ملکہ کی اجازت ضروری ہے۔ تاہم ملکہ کی آشیرباد یہ بتا رہی ہے کہ برطانوی شاہی خاندان کی روایات بھی بدل رہی ہیں، کیوں کہ کسی طلاق یافتہ فرد سے شاہی فرد کی شادی کچھ عرصہ پہلے تو سوچی بھی نہیں جا سکتی تھی۔