’پرنس آف تھیوز‘ یا چوروں کا شہزادہ نامی فلم میں رابن ہُڈ کا کردار کیون کوسٹنر نے ادا کیا تھا۔ مورگن فری مین نے رابن ہڈ کے وفادار دوست کا کردار ادا کیا۔ سن 1991 میں بنی اس فلم کے ہدایتکار کیون رینالڈز تھے۔

قرون وسطیٰ کے مصنفین رابن ہُڈ کے قصے کہانیوں کو اپنی کتابوں میں بیان کر چکے ہیں۔ سب سے پہلی کتاب کا نام A Gest of Robyn Hode ہے۔ پندرہویں صدی کی اس طویل منظوم نظم میں 456 بند ہیں۔ اس کتاب کو رابن ہُڈ کے لیجنڈ کا سب سے اہم ماخذ قرار دیا جاتا ہے۔

فلم پروڈکشن ادارے ڈزنی نے اس لیجنڈری کردار کی کہانی کو سن 1973 میں جانور کے روپ میں پیش کیا۔ رابن ہُڈ کا کردار ایک چالاک لومڑی کی صورت میں فلم میں پیش کیا گیا۔ جبکہ رابن ہڈ کے وفادار دوست کو ایک ریچھ کی صورت میں پیش کیا گیا۔ ولن یا نوٹنگھم کے شیرف یا تھانیدار کے کردار کو ایک بھیڑیے کی صورت دی گئی۔

فوکس نامی فلم پروڈکشن ادارے کی تھری ڈی فلم میں رابن ہڈ سرخ بالوں والا ایک ہیرو تھا۔ اس سیریز کا نام ’رابن ہڈ، شیرووڈ کا شرارتی‘ تھا۔ چھ سال یا زائد عمر کے بچوں کے لیے یہ سیریز انتہائی مقبول ہوئی تھی۔ اس میں نوجوان رابن ہڈ کی مہمات کو پیش کیا گیا۔

رابن ہڈ کے قصے کے مطابق وہ اپنے ساتھیوں کے ہمراہ شاہ بلوط کے گھنے جنگلوں میں چھپا کرتا تھا۔ جنگل میں اُس کا پسندیدہ درخت سات سو سالہ پرانا شاہ بلوط کا بلند و بالا درخت تًھا۔ اس کو بقیہ درختوں کے مقابلے میں ’میجر اوک‘ کا نام دیا گیا۔ یہ نوٹنگھم علاقے کے قریبی شیرووڈ کے گھنے جنگلوں میں تھا۔

مختلف قصوں میں رابن ہڈ کی محبت میریان کو ایک شریف زادی اور بعض میں عام شہری کے طور پیش کیا گیا۔ کچھ میں میریان نوکرانی نامی خاتون کو لیفرڈ علاقے کی لیڈی میریان کے اعزاز سے پکارا گیا۔ پرانے قصوں میں بھی میریان کو ایک مضبوط کردار والی آزاد منش خاتون قرار دیا گیا۔ سن 1976 میں بنائی گئی فلم ’رابن اینڈ میریان‘ میں مرکزی کردار شین کونری اور آڈرے ہیپبرن نے ادا کیا تھا۔

رابن ہُڈ نامی فلموں میں ایک مزاحیہ فلم Robin Hood: Men in Tights سن 1993 میں بنائی گئی۔ یہ کیون کوسٹر کی فلم ’پرنس آف تھیوز‘ کا ایک مزاحیہ روپ تھا۔ اس کے جملوں میں بے ساختہ پن فلم بینوں کو ہنسنے پر مجبور کر دیتا تھا۔ اس فلم میں مزاح کا رنگ پیدا کرنے کے لیے چند مزاحیہ کردار بھی تخلیق کیے گئے تھے۔

بچے اور بڑوں کے لیے بنائی گئی فلموں اور ٹیلی وژن ڈرامہ سیریز کے علاوہ کومکس میں بھی رابن ہُڈ کو بہت پسند کیا گیا۔ کومکس میں فرانسیسی زبان میں لکھی گئی سیریز Robin des Bois کو سب سے زیادہ پسند کیا گیا۔ یہ سن 1970 کی دہائی میں لکھی گئی تھی۔ اس کا جرمن زبان میں بھی ترجمہ Robin Hood, der Herr der Wälder کے نام سے کیا گیا اور ایک سو حصوں پر مشتمل یہ سیریز جرمن قارئین میں بہت مقبول ہوئی تھی۔

سن 1952 میں رابن ہُڈ کے نام سے ایک یادگار تعمیر کی گئی۔ اس کو دیکھنے ہر سال سینکڑوں لوگ جاتے ہیں۔ یہ یادگار برطانیہ کے نوٹنگھم شہر کی حدود سے باہر ایک یادگاری مجسمے کے طور پر نصب کی گئی ہے۔ اس یادگار کا بنیادی مقصد رابن ہُڈ کو نوکر شاہی کے مخالف کے طور پر لیا گیا ہے۔

رابن ہُڈ کو عشروں سے سماجی انصاف کی علامت کے طور پر تسلیم کیا گیا ہے۔ وہ غربت کے خلاف جاری جدوجہد کے نمائندے کے طور پر بھی جانا جاتا ہے۔ اس لیجنڈری کردار کے نام پر کئی امدادی تنظیمیں اور ادارے بھی قائم کیے گئے ہیں۔ سن 2010 میں جرمن دارالحکومت برلن میں مظاہرین نے غربت میں کمی لانے کے لیے رابن ہُڈ ٹیکس کے نفاذ کا مطالبہ بھی کیا۔