صحت مند رہنے کا راز قیلولے اور خالص دودھ پینے میں مضمر
عابد حسین
22 ستمبر 2017
ماہرین نے قدرت کے عظیم ترین عطیات میں ایک صحت مند زندگی کو بھی خیال کیا ہے۔ معالجین کے مطابق صحت مند رہنے کے لیے بڑی مشقت کی ضرورت نہیں ہوتی، بس چند اصولوں پر عمل کرنا اہم خیال کیا گیا ہے۔
اشتہار
صحت مند زندگی گزارنے کے چند اصول ہیں، جن پر عمل پیرا ہونا کوئی مشکل نہیں ہے۔ ان میں سے چند ایک درج ذیل ہیں۔
دوپہر میں آرام
ماہر ڈاکٹروں اور اطباء کا اس پر اتفاق ہے کہ دوپہر میں سونے یا قیلولہ کرنا ایک کثیر الفائدہ عمل ہے۔ جنوبی یورپ میں دوپہر میں بستر پر دراز ہونا ایک قدیمی روایت ہے۔ اس مختصر دورانیے کی نیند کو ’پاور نیپ‘ (Power Nap) کہا جاتا ہے۔ ماہرین کے مطابق قیلولے سے بلڈ پریشر کے علاوہ ذہنی قوت میں اضافہ یقینی ہے۔ پاور نیپ یا طاقتور قیلولے کا دورانیہ کم سے کم بیس سے تیس منٹ یا زیادہ سے زیادہ ایک گھنٹہ ہونا چاہیے۔ چین میں بھی پاور نیپ کا بہت رواج ہے۔
برطانوی سائنسدانوں کا کہنا ہے کہ انہوں نے صتحمند رہنے کے راز کا حل تلاش کر لیا ہے اور یہ خالص مگر دیسی یا آرگینک دودھ پینے میں مخفی ہے۔ برطانیہ کی نیو کاسل یونیورسٹی کے ریسرچرز کا کہنا ہے کہ دیسی چارے اور کھاد پر پلے ہوئے جانوروں کا گوشت اور اُن سے حاصل ہونے والے دودھ کی غذائیت پچاس فیصد زیادہ ہوتی ہے۔ دیسی چارہ کھانے والی گایوں کے دودھ میں وٹامنز اور دوسرے عناصر کی موجودگی بھی عام میسر دودھ سے کہیں زیادہ ہوتی ہے۔
جسمانی حرکات و سکنات اور پٹیوں کا استعمال
جاپانی ایتھلیٹوں میں یہ رواج ہے کہ وہ مشق کے دوران اپنے جسم پر رنگ برنگی پٹیوں کو لپیٹ کر رکھتے ہیں۔ ماہرین کا خیال ہے کہ ایسی پٹیوں سے پہلے سے موجود درد میں آرام کے علاوہ کسی نئی چوٹ کا امکان کم ہو جاتا ہے۔ ان ٹیپوں کو کینیزیالوجی ٹیپ کہا جاتا ہے۔ کینیزیالوجی سے مراد حرکات و سکنات کی سائنس ہے۔ جاپان کے ہیلتھ کیئر ماہر یا کیرو معالج کینزو کیسے نے ان ٹیپوں کو بدن پر لپیٹنے کی تکنیک کو دریافت کیا تھا۔ ٹیپ کا لچک دار اور قدرے چپکنے والی ہونا ضروری ہے۔ مشہور کھلاڑیوں میں یہ ٹیپ انتہائی مقبول ہوتی جا رہی ہے کیونکہ ان کے استعمال سے اُنہیں لگنے والی چوٹوں میں کمی ہوئی ہے۔ عام معمول کی ورزش میں بھی نہایت اہم ہے اور ان پٹیوں کا استعمال اس دوران بھی کیا جا سکتا ہے کیونکہ یہ بالکل بے ضرر ہیں۔
صحت مند بالوں کے لیے دس تجاویز
ہر کوئی صحت مند اور چمکدار بالوں کی خواہش رکھتا ہے۔ بال کئی طرح کے ہوتے ہیں اور بالوں کا خیال رکھنا سود مند ثابت ہو سکتا ہے۔ دیکھیے بالوں کو صحت مند رکھنے کے لیے چند تجاویز۔
تصویر: Imago/Indiapicture
ایک اچھی بنیاد
خوبصورت بالوں کے لیے بالوں کے نیچے سر کی جلد کا صحت مند ہونا ضروری ہے۔ جلد تندرست نہ ہونے کے سبب بالوں میں خشکی کا سبب بنتی ہے۔ سر کی جلد کی مالش کرنے سے خون کی گردش بڑھتی ہے اور sebaceous glands کے باعث خشک بالوں کی حالت بہتر ہو جاتی ہے۔ تیل یا لوشن کے ساتھ مالش بھی سود مند ثابت ہوتی ہے۔
تصویر: Colourbox/Lars Zahner
ٹھیک طرح سے بال دھونا
بال دھونے سے قبل کنگھی کرنا بھی مفید ہوتا ہے۔ اس سے بال صاف ہوتے ہیں اور شیمپو کم استعمال ہوتا ہے۔ شیمپو لگانے کے بعد بالوں کو اچھی طرح سے دھونا چاہیے تاکہ شیمپو مکمل طور پر نکل جائے۔ زیادہ گرم پانی استعمال کرنا بالوں کے لیے نقصان دہ ثابت ہو سکتا ہے۔ ٹھنڈے پانے میں تھوڑا سا لیموں کا جوس ڈال کر بال دھونے سے بھی بال صحت مند اور چمکدار ہو جاتے ہیں۔
تصویر: Colourbox/Frédéric Cirou/ AltoPress/MAXPPP
کنڈیشنر، فائدہ مند ہے یا نہیں؟
بال دھونے کے بعد کنڈیشنر استعمال کرنا اچھا عمل ہے۔ کنڈیشنر بالوں پر ایک ہلکی سی تہہ بنا دیتا ہے جس سے بال محفوظ رکھنے میں مدد ملتی ہے اور کنگھی کرنے میں بھی آسانی رہتی ہے۔ کنڈیشنر استعمال کرنے کے بعد گیلے بالوں میں اچھی طرح لیکن احتیاط سے کنگھی کیجیے۔
تصویر: Colourbox/"Frédéric Cirou
بال خشک کرنا
گیلے بالوں کو تولیے سے خشک کرنا بالوں کے لیے اچھا نہیں ہے۔ اسی طرح گیلے بالوں کو تولیے سے لپیٹنا بھی نقصان دہ ثابت ہوتا ہے۔ زیادہ گرم ہیئر ڈرائیر سے بال خشک کرنا بھی مفید نہیں ہے۔ اس لیے یا تو بالوں کو قدرتی طور پر خشک ہونے دیجیے یا پھر ہیئر ڈرائیر کو کم ترین درجہ حرارت پر رکھ کر استعمال کریں۔
تصویر: Colourbox
مالش کرنا
بالوں اور سر کی جلد کی اچھی طرح سے مالش (ڈیپ کنڈیشننگ) کرنا بالوں کو صحت مند بنانے میں مددگار ثابت ہوتا ہے۔ مختلف پودوں کے تیل خشک بالوں کے مفید ثابت ہوتے ہیں۔ لیکن آپ اپنا کنڈیشنر بھی بنا سکتے ہیں۔ مَگرناشپاتی (اواکاڈو) میں دو چمچ سورج مکھی کے پھول کا تیل اور تھوڑا سا لیموں شامل کر کے گاڑھا پیسٹ بنا لیں اور اسے استعمال کریں۔
تصویر: Colourbox
بالوں کے ٹوٹے سرے
بالوں کے ٹوٹنے کی کئی وجوہات ہیں۔ دھوپ، خشک ہوا اور گرم ہیئر ڈرائیر سروں کے ٹوٹنے کا سبب بنتے ہیں اور احتیاط کرنے سے بچاؤ ممکن ہے۔
تصویر: Colourbox/Lars Zahner
کنگھی کرنے کا طریقہ
کنگھی کرنے کے لیے اچھا برش بہت اہم ہے۔ قدرتی ریشوں سے بنے برش استعمال کرنا زیادہ سود مند ثابت ہوتا ہے۔ اچھی طرح کنگھی کرنے سے سر کی جلد میں موجود قدرتی تیل کو یکساں طور پر پھیلانے میں مدد ملتی ہے۔ سخت اور نوکیلی کنگھی استعمال کرنے سے سر کی جلد متاثر ہوتی ہے۔ کنگھی کو صاف رکھنا بھی ضروری ہے۔
تصویر: Colourbox
بال رنگنا
تقریباﹰ سبھی رنگوں میں کیمیکل موجود ہوتے ہیں۔ زیادہ دیر تک رہنے والے رنگ بالوں کی جڑوں تک پہنچتے ہیں اس لیے انہیں استعمال کرنا بالوں کے لیے اچھا نہیں ہے۔ اگر مہندی استعمال کی ہو تو اس پر مستقل رنگ استعمال کرنے سے گریز کیجیے۔
تصویر: Colourbox
متوازن خوراک
صحت مند بالوں کے لیے اچھی خوراک بھی ناگزیر ہے۔ جسم میں منرلز اور وٹامنز کی کمی کا اثر بالوں میں بھی نمایاں طور پر دکھائی دیتا ہے۔ سبزیاں، مچھلی، دودھ، سویا اور گندم درکار منرلز اور وٹامنز کی کمی ختم کرنے کے لیے از حد ضروری ہیں۔
تصویر: Colourbox
صحت مند طرز زندگی
مسلسل اور شدید ذہنی دباؤ سے کورٹیزول بھی بڑھ جاتا ہے جس کا براہ راست اثر بالوں پر بھی رونما ہوتا ہے۔ محقیقن اس کی وجوہات ابھی تک نہیں جان پائے لیکن جب تک تحقیق مزید معلومات فراہم نہیں کرتی، ورزش اور آرام کیجیے، اس سے اسٹریس کم کرنے میں مدد ملتی ہے۔ اچھی طرز زندگی کے ثمرات آپ کو تندرست بالوں کی صورت میں بھی ملیں گے۔