امریکی صدر کا علاج کرنے والے ڈاکٹروں کا کہنا ہے کہ کورونا وائرس کا علاج کرارہے ڈونلڈ ٹرمپ کی حالت میں اگر سدھار ہوتا ہے تو انہیں ہسپتال سے جلد ہی رخصت مل جائے گی۔
اشتہار
کورونا وائرس کے علاج کے لیے ہسپتال میں داخل کیے جانے کے بعد صدر ٹرمپ پہلی مرتبہ عوام کے سامنے آئے اور ان کا شکریہ ادا کیا لیکن طبی ماہرین نے ان کے اس عمل سے طبی عملے کے افراد کی صحت کو خطرے میں ڈالنے کے لیے ان پر سخت نکتہ چینی کی ہے۔
امریکی صدر ٹرمپ نے قبل ازیں ایک ویڈیو پوسٹ کیا جس میں ڈاکٹر وں کا شکریہ ادا کرتے ہوئے اسے 'بہت بڑی خبر‘ قرار دیا۔ اپنے حامیوں کا بھی شکریہ ادا کرتے ہوئے انہوں نے کہا کہ وہ ان سے ملنے جلد ہی پہنچنے والے ہیں۔ جس کے تھوڑی دیر بعد ہی ٹرمپ والٹر ریڈ نیشنل ملٹری میڈیکل سینٹر، جہاں وہ زیر علاج ہیں، کے باہر موجود تھے۔
صدر ٹرمپ پر نکتہ چینی
صدر ٹرمپ کے حامی انہیں دیکھ کر حیران رہ گئے۔ دوسری طرف طبی ماہرین نے 74سالہ صدر کے اس طرح ہسپتال سے باہر آنے پر نکتہ چینی کرتے ہوئے کہا کہ انہوں نے طبی عملے کی صحت کو خطر ے میں ڈال دیا۔ والٹر ریڈ ہسپتال کے ڈاکٹر جیمز فلپس نے اپنے ٹوئیٹ میں کہا، ”یہ غیر ذمہ داری ناقابل یقین ہے۔‘‘
میڈیا کا کہنا ہے کہ صدر ٹرمپ کے ہسپتال سے باہر نکلنے کے حوالے سے انہیں آگاہ نہیں کیا گیا لیکن وائٹ ہاوس کے ترجمان جڈ ڈیر نے کہا کہ صدر ٹرمپ کا دورہ ڈاکٹر وں سے منظور شدہ اور تمام حفاظتی اقدامات کو مدنظر رکھتے ہوئے کیا گیا تھا۔
ٹرمپ کی صحت کی صورتحال کے بارے میں غلط فہمی
اتوار چار اکتوبر کو ڈاکٹروں نے وائٹ ہاؤس کو بتایا تھاکہ صدر ٹرمپ کی حالت'مسلسل بہتر ہو رہی ہے‘۔ تاہم انہیں جمعہ کے روز کچھ سنگین علامتیں ظاہر ہوئی تھیں۔ اس پریس کانفرنس کو صدر ٹرمپ کی صحت کے حوالے سے متضاد بیانات سے پیداہونے والی غلط فہمیوں کو دور کرنے کی کوشش کے طورپر دیکھا جارہا ہے۔
صدر ٹرمپ کی میڈیکل ٹیم کے ایک رکن ڈاکٹر شان کونلی نے تسلیم کیا کہ صدر ٹرمپ کی صحت کے حوالے سے بعض غلط فہمیاں پیدا ہوگئی تھیں تاہم ٹیسٹ کے نتائج توقع کے مطابق ہیں اور کوئی بڑی طبی پریشانی سامنے نہیں آئی ہے۔
پریس کانفرنس سے خطاب کرتے ہوئے ڈاکٹر کونلی کا کہنا تھا کہ گزشتہ روز صدر ٹرمپ کے خون میں آکسیجن کی سطح 93 فیصد سے نیچے گر گئی تھی اور انھیں سانس پھولنے کی شکایت پیدا ہوئی جس کے بعد انھیں ڈیکسامیتھاسون دی گئی۔ تاہم ڈاکٹر کونلی نے کہا کہ اب ان کے خون میں آکسیجن کی سطح 98 فیصد ہے اورکوئی بڑی طبی تشویش کی بات نہیں ہے۔
ٹرمپ کی میڈیکل ٹیم کے ایک اور رکن ڈاکٹر شان ڈولی نے بھی کہا کہ صدر کی حالت کافی بہتر ہے۔ انہوں نے صدر ٹرمپ کا یہ جملہ نقل کیا ”میں ایسا محسوس کررہا ہوں کہ آج (پیرکو) ہسپتال سے واپس جاسکتا ہوں۔"
لیکن بعض دیگرماہرین جن کا صدر ٹرمپ کے علاج سے کوئی تعلق نہیں ہے، کا کہنا ہے کہ انہیں اس بات کے شواہد ملے ہیں کہ صدر ٹرمپ کا معاملہ شدید نوعیت کا ہے۔ صدر کو ڈیکسا میتھاسون دی جا رہی ہے جو کووڈ سے بری طرح متاثر ہونے والے افراد کو دی جاتی ہے۔ اس کے علاوہ انہیں اینٹی وائرل ریمڈیسویر دوا بھی دی جا رہی ہے۔
دلچسپ سفر اور حقیقی اسکول
قبل ازیں صدر ٹرمپ نے اپنے ٹوئٹ میں لکھا کہ یہ بہت دلچسپ سفر ہے۔ ”میں نے کووڈ 19کے بارے میں حقیقی اسکول میں آکر سیکھا ہے۔ یہ حقیقی اسکول ہے۔ یہ ویسا نہیں کہ چلو کتابیں پڑھیں اور مجھے سمجھ آگئی ہے۔ یہ بہت دلچسپ ہے۔"
خیال رہے کہ امریکی صدر کی ایک سینئر مشیر میں کورونا وائرس کی تشخیص کے بعد صدر ٹرمپ اور ان کی اہلیہ میلانیا ٹرمپ کے ٹیسٹ کرائے گئے تھے اور ان کے نتائج بھی مثبت آنے کے بعد صدر ٹرمپ کو ہسپتال میں داخل کرایا گیا تھا۔
صدر ٹرمپ ایسے وقت میں کورونا وائرس سے متاثر ہوئے ہیں جب صدارتی انتخابات میں ایک ماہ سے بھی کم وقت رہ گیا ہے۔
ج ا / ا ب ا (اے ایف پی، ایف پی، روئٹرز)
کورونا وائرس کی لپیٹ میں آنے والی معروف شخصیات
ہالی وُوڈ سے بالی وُوڈ تک، کئی اہم فلمی شخصیات کورونا وائرس کی لپیٹ میں آچکی ہیں۔ ان کے علاوہ کئی نامی سیاستدانوں کو بھی کووڈ انیس کی بیماری نے اپنی گرفت میں لیا۔
تصویر: picture-alliance/dpa/Sputnik/E. Chesnokova
رابرٹ پیٹینسن
چونتیس سالہ اداکار رابرٹ پیٹینسن نے فلم ’ٹوائلائٹ‘ میں ایک ایسے خونخوار مردے کا کردار ادا کیا تھا، جو رات کو باہر نکلتا تھا۔ وہ ’بیٹمین‘ کی شوٹنگ میں مصروف تھے کہ ان کا کورونا ٹیسٹ مثبت آ گیا۔ فلم بیٹمین میں پہلے بین ایفلیک کو کاسٹ کیا گیا تھا۔
تصویر: picture-alliance/dpa/Sputnik/E. Chesnokova
ڈوائن جانسن: دا راک
امریکا کے مشہور ریسلر یا پہلوان ’دا راک‘ کا اصلی نام ڈوائن جانسن ہے۔ وہ ہالی وُوڈ کی فلموں میں اداکاری کے جوہر دکھاتے ہیں۔ ان کو بیوی اور دو بیٹیوں سمیت کورونا وائرس نے گرفت میں لے لیا تھا۔ اب سبھی اس بیماری کے چنگل سے نکل آئے ہیں۔ انہوں نے لوگوں کو تلقین کی ہے کہ ماسک پہن کر رہیں کیونکہ اسی میں بہتری ہے۔
تصویر: picture-alliance/AP Photo/R. Shotwell
فٹ بالر نیمار
مشہور و معروف برازیلی فٹ بالر نیمار، فرانسیسی فٹ بال کلب پیرس سینٹ جرمین کی جانب سے کھیلتے ہیں۔ کلب کے تین کھلاڑیوں کے دو ستمبر سن 2020 کو کورونا ٹیسٹ مثبت آئے تھے۔ کلب کے کھلاڑیوں میں اس بیماری کی وبا پھوٹنے کو ٹیم کے ہسپانوی تفریحی جزیرے ابیٹسا کے دورے کا نتیجہ قرار دیا گیا ہے۔ نیمار کے ساتھ ان کے بیٹے کا بھی کورونا ٹیسٹ مثبت آیا ہے۔
تصویر: Getty Images/AFP/D. Ramos
سلویو برلسکونی
تراسی سالہ اطالوی سیاستدان اور سابق وزیر اعظم سلویو برلسکونی کا کورونا ٹیسٹ مثبت آیا ہے۔ اس کا اعلان ان کی سیاسی جماعت نے دو ستمبر سن 2020 کو کیا۔ ان کے دو بیٹے اور تیس سالہ خاتون دوست کے بھی ٹیسٹ مثبت آئے ہیں۔ وہ سارڈینا کی ساحلی پٹی پر چھٹیاں گزارنے گئے ہوئے تھے۔
تصویر: picture-alliance/dpa/D. Vojinovic
یُوسین بولٹ
تیز رفتار دوڑنے کے مقابلے میں لیجنڈ کا درجہ رکھنے والے یوسین بولٹ بھی کورونا وائرس کی لپیٹ میں آ چکے ہیں۔ ان کا وائرس ٹیسٹ ان کی چونتیسویں سالگرہ کی آؤٹ ڈور پارٹی کے بعد سامنے آیا۔ اس پارٹی میں مہمانوں نے ماسک نہیں پہن رکھے تھے۔ وہ ایک سو میٹر اور دو سو میٹر کی دوڑ میں ریکارڈ رکھتے ہیں۔
تصویر: Reuters/M. Childs
انٹونیو بینڈراس
ہسپانوی اداکار انٹونیو بینڈراس کو اپنی ساٹھویں سالگرہ پر حیران کن انداز میں کورونا وائرس کا سامنا کرنا پڑ گیا۔ انہیں اپنی سالگرہ کا دن آئسولیشن یا قرنطینہ میں گزارنا پڑا۔ رواں برس کے مہینے اگست کے وسط میں ان کا ٹیسٹ مثبت آیا تھا۔ اب وہ صحتیاب ہو چکے ہیں۔
تصویر: picture-alliance/Captital Pictures
امیتابھ بچن اور خاندان
بھارت فلمی صنعت بالی وُوڈ کے لیجنڈری اداکار امیتابھ بچن اور ان کا تقریباً سارا خاندان ہی جولائی میں کورونا وائرس کی گرفت میں آ گیا تھا۔ ان کے بیٹے ابھیشیک بچن، اداکارہ بہو اور سابقہ مس ورلڈ ایشوریا رائے کے ساتھ پوتی آرادیا کے کورونا ٹیسٹ مثبت آنے پر، ان کو ہسپتال داخل کر دیا گیا تھا۔ اب سبھی رُو بہ صحت ہو چکے ہیں۔ ان کی بیوی جیا بچن کا ٹیسٹ منفی آیا تھا۔
تصویر: AFP/Getty Images/S. Jaiswal
جائیر بولسونارو
برازیل کے صدر جائیر بولسونارو کورونا وائرس کی وبا کو محض نزلہ زکام قرار دیتے رہے ہیں اور پھر جولائی سن 2020 میں ان کو کورونا وائرس نے آن دبوچا۔ انہیں کورونا وبا اور دیگر احتیاطی تدابیر کو نظرانداز کرنے پر ملک اور بیرون ملک شدید تنقید کا سامنا رہا۔ ان کے بیٹے اور بیوی کے بھی ٹیسٹ مثبت آئے تھے۔
تصویر: picture-alliance/dpa/E. Peres
ٹام ہینکس
امریکی فلمی صنعت ہالی وُوڈ کے مشہور اداکار ٹام ہینکس اور ان کی گلوکارہ و اداکارہ بیوی ریٹا ولسن کے کورونا ٹیسٹ بھی مثبت آ چکے ہیں۔ وہ اس وبا کی لپیٹ میں آنے والی ابتدائی مشہور شخصیات میں سے تھے۔ ہینکس اور ان کی بیوی کو آسٹریلیا کے دورے کے دوران وائرس نے جکڑ لیا تھا۔ اب وہ صحت یاب ہو کر واپس امریکا لوٹ چکے ہیں۔
تصویر: picture-alliance/AP/Invision/J. Strauss
صوفی گریگوئر ٹروڈو
کینیڈا کے وزیر اعظم جسٹن ٹروڈو کی اہلیہ صوفی ٹروڈو کا ٹیسٹ برطانوی دورہ مکمل کرنے کے بعد وطن واپس پہنچنے پر مثبت آیا تھا۔ بیوی کا ٹیسٹ مثبت آنے کے بعد کینیڈین وزیر اعظم نے خود کو دو ہفتوں کے لیے قرنطینہ کر لیا تھا۔
تصویر: Reuters/P. Doyle
بورس جانسن
برطانوی وزیر اعظم بورس جانسن بھی رواں برس مارچ میں کورونا کی گرفت میں آ گئے تھے۔ ان کی طبیعت زیادہ خراب ہونے پر انہیں ہنگامی طور پر ہسپتال منتقل کر دیا گیا تھا۔ وہ ایک ہفتہ ہسپتال میں داخل رہے تھے۔ ہسپتال میں انہیں آکسیجن فراہم کی گئی اور معالجین مسلسل ان کی علالت پر نگاہ رکھے ہوئے تھے۔