امريکی دارالحکومت واشنگٹن سے موصولہ نيوز ايجنسی اے ايف پی کی رپورٹوں کے مطابق ملٹری ترجمان ريئر ايڈمرل جان کربی نے بتايا کہ پير کے روز جنوبی صوماليہ ميں ساکوو کے علاقے ميں کيے جانے والے اس حملے ميں ايک ہدف کو نشانہ بنايا گيا۔ تاہم اپنے بيان ميں کربی نے يہ نہيں بتايا کہ حملے ميں کس جنگجو کو نشانہ بنايا گيا۔

امريکی فوج کے ترجمان نے کہا ہے کہ اس وقت موجود اطلاعات کے مطابق حملے ميں کسی سويلين يا جائے وقوعہ کے آس پاس موجود کسی ديگر شخص کی ہلاکت کے حوالے سے کوئی اطلاع موجود نہيں۔ ان کے بقول اس وقت کارروائی کے نتائج کا جائزہ ليا جا رہا ہے اور جب بھی ديگر تفصيلات سامنے آئيں گی، ان کے بارے ميں مطلع کر ديا جائے گا۔

اگر امريکا کی اس فضائی کارروائی ميں الشباب مليشيا کے کسی سينئر رکن کی ہلاکت کی تصديق ہو جاتی ہے، تو يہ اس مليشيا کے ليے تازہ ترين دھچکا ثابت ہو گا۔ رواں برس ستمبر ميں اس گروپ کا قائد احمد عبدی جودان ايک اور امريکی حملے ميں مارا گيا تھا۔ پھر ابھی پچھلے ہفتے کے روز يعنی ستائيس دسمبر کو اس گروپ کے انٹيليجنس چيف زکريہ اسماعيل احمد ہرسی نے خود کو صومالی فورسز کے حوالے کر ديا تھا۔ دہشت گرد نيٹ ورک القاعدہ سے روابط رکھنے والے گروپ الشباب کے سينئر رکن ہرسی کے سر کی قيمت امريکا نے تين ملين ڈالر مقرر کر رکھی تھی۔

دوسری جانب حاليہ ناکاميوں کے باوجود الشباب بھی اپنی کارروائياں جاری رکھے ہوئے ہے۔ پچھلے جمعرات ہی کے روز اس گروپ کے جنگجوؤں نے صوماليہ کے دارالحکومت موغاديشو کے ہوائی اڈے پر افريقی يونين کے ہيڈکواٹرز پر دھاوا بول ديا، جس کے نتيجے ميں تين فوجی اور ايک سويلين ہلاک ہو گیا تھا۔

يہ امر اہم ہے کہ افريقی يونين نے اپنے قريب بائيس ہزار فوجی صوماليہ ميں تعينات کر رکھے ہيں، جو الشباب مليشيا کے خلاف برسرپيکار ہيں۔ اگرچہ يہ امن دستے دارالحکومت سے جنگجوؤں کو دھکيلنے ميں کامياب رہے ہيں تاہم ملک کے کئی وسطی اور جنوبی حصوں پر اب بھی الشباب ہی کا قبضہ ہے۔

اس گروپ نے اپنے حاليہ حملوں ميں اہم سرکاری اور سکيورٹی سے متعلق تنصيبات کو نشانہ بنايا ہے، جس کا مقصد بظاہر يہی ہے کہ صومالی حکام اور افريقی يونين کے ايسے دعووں کو غلط ثابت کيا جائے کہ وہ الشباب کے خلاف جنگ جيت رہے ہيں۔

صوماليہ ميں امريکا کا کوئی فوجی تعينات نہيں ہے البتہ واشنگٹن حکومت افريقی يونين اور عالمی برادری کی تسليم کردہ ماغاديشو حکومت کی حمايت کرتی ہے اور کبھی کبھار خصوصی دستوں يا فضائی حملوں کی مدد سے مخصوص اہداف کو نشانہ بناتی ہے۔