خبر رساں ادارے ایسوسی ایٹڈ پریس نے پاکستانی سکیورٹی حکام کے حوالے سے بتایا ہے کہ مسلح عسکری پسندوں نے افغان سرحد کے قریب پاکستان کے شمال مغربی قبائلی علاقے میں ایک فوجی گاڑی کو نشانہ بنایا جس کے نتیجے میں سات فوجی اہلکار مارے گئے جبکہ حملہ آور اس حملے کے بعد واپس افغانستان فرار ہو گئے۔

دو پاکستانی سکیورٹی اہلکاروں نے ایسوسی ایٹڈ پریس کو بتایا کہ یہ حملہ اتوار کے روز شمالی وزیرستان میں کیا گیا۔ ان اہلکاروں نے نام ظاہر نہ کرنے کی شرط پر یہ اطلاع اس خبر رساں ادارے کو دی کیونکہ انہیں میڈیا سے گفتگو کرنے کا اختیار نہیں۔

اس حملے کے کئی گھنٹے بعد پاکستانی طالبان کے ترجمان محمد خراسانی نے ایک بیان جاری کیا جس میں اس حملے کی ذمہ داری قبول کی گئی ہے۔

پاکستانی فوج گزشتہ کئی برسوں میں پاکستان کے قبائلی علاقوں سے عسکریت پسندوں کے خاتمے کے لیے ملٹری آپریشن جاری رکھے ہوئے ہے۔ اس آپریشن کے نتیجے میں جنوبی اور شمالی وزیرستان کے 90 فیصد سے زائد علاقے کو شدت پسندوں سے پاک کیا جا چکا ہے تاہم اب بھی وہاں کبھی کبھار عسکریت پسندوں کی طرف سے ایسی کارروائیاں ہوتی رہتی ہیں۔

پاکستانی فوج افغانستان کے ساتھ ملنے والی سرحد پر باڑ بھی تعمیر کر رہی ہے تاکہ عسکریت پسندوں کی پاکستان اور افغانستان میں آمد ورفت کا سلسلہ روکا جا سکے۔

ا ب ا / ع ت (ایسوسی ایٹڈ پریس)