طالبان نے کہا ہے کہ اُن کے قبضے میں امریکی پروفبسر شدید علیل ہو چکے ہیں۔ اس پروفیسر کو کابل میں واقع ایک امریکی یونیورسٹی سے ملحقہ ایک رہائشی احاطے سے گزشتہ برس اگست میں اغوا کیا گیا تھا۔
امریکی پروفیسر کیون کنگ کے آسٹریلین ساتھی ٹموتھی ویکس بھی طالبان کی قید میں ہیںتصویر: picture-alliance/AP Photo
اشتہار
عسکریت پسند تنظیم طالبان کے ترجمان ذبیح اللہ مجاہد نے ایک بیان میں بتایا ہے کہ اُن کے قبضے میں امریکی پروفسر کیون کنگ شدید علیل ہو چکے ہیں۔ مجاہد نے اُن کی علالت کو خطرناک قرار دیا ہے۔ اس بیان میں یہ بھی بتایا گیا کہ پروفیسر کنگ کو علاج کی سہولت فراہم کی گئی ہے لیکن اِس سے انہیں افاقہ نہیں ہوا ہے۔
طالبان کے ترجمان کے مطابق امریکی پروفسر کو دل اور گردوں کے عوارض کا سامنا ہے اور اُن کے پاؤں غیر معمولی طور پر سُوج چکے ہیں۔ یہ بھی بتایا گیا کہ اُن کی حالت ہر دن گزرنے کے ساتھ خراب سے خراب تر ہوتی جا رہی ہے۔
کابل کی امریکی یونیورسٹی کے گرد تعمیر کی گئی حفاظتی دیوارتصویر: picture-alliance/dpa/J. Jalali
طالبان کے بیان کے مطابق کیون کنگ اپنی شدید علالت کی وجہ سے کبھی کبھار اپنے حواس کھو بیٹھتے ہیں اور اُن پر غشی کی کیفیت طاری ہو جاتی ہے۔ ذبیح اللہ مجاہد کے مطابق طالبان کے پاس روزمرہ کے علاج کی ادویات میسر ہیں لیکن یہ سہولیات انتہائی جدید نہیں کیونکہ وہ حالتِ جنگ میں ہیں۔
پروفسر کیون کنگ کو اگست سن 2016 کو گن پوائنٹ پر اُن کے آسٹریلین ساتھی ٹوتھی ویکس کے ہمراہ مسلح نقاب پوش افراد نے اغوا کیا تھا۔ اغوا کی یہ واردات اُس وقت رونما ہوئی تھی۔ جب دونوں اساتذہ یونیورسٹی سے واپس اپنے رہائشی کمپاؤنڈ پہنچے تھے۔
’پاکستان اب طالبان پر اثر و رسوخ کھو چکا ہے‘
04:27
This browser does not support the video element.
یہ کمپاؤنڈ افغان دارالحکومت کابل میں واقع ہے۔ افغان اور امریکی حکام کو یقین ہے کہ دونوں پروفیسروں کو حقانی نیٹ ورک سے وابستہ کسی عسکریت پسند گروپ کے جنگجوؤں نے قید کر رکھا ہے۔ اس کا بھی اعتراف کیا گیا ہے کہ ان پروفیسروں کی رہائی کی خاطر جو عسکری کوشش کی گئی تھی وہ ناکامی سے دوچار ہوئی تھی۔
کابل کی امریکن یونیورسٹی کے ان پروفیسروں کی ایک ویڈیو رواں برس کے اوائل میں جاری کی گئی تھی۔ اس ویڈیو میں کیونگ کنگ اور ٹموتھی ویکس نے اپنی اپنی حکومتوں سے استدعا کی تھی کہ ان کی رہائی کو افغانستان کی جیلوں میں پابند طالبان قیدیوں کو رہا کر کے ممکن بنایا جائے۔
حقانی نیٹ ورک کیا ہے؟
حقانی نیٹ ورک ایک افغان جنگجو گروہ ہے، جو افغانستان میں مقامی اور امریکی تحادی افواج کے خلاف حالت جنگ میں ہے۔ افغان حکام اور عالمی برادری اسے افغانستان میں فعال ایک انتہائی خطرناک عسکری گروہ قرار دیتے ہیں۔
تصویر: Getty Images/AFP/J. Tanveer
حقانی نیٹ ورک کب بنا؟
عشروں پہلے سوویت یونین کے دستوں کے خلاف لڑنے والے کمانڈر جلال الدین حقانی نے اس گروہ کی بنیاد رکھی تھی۔ افغان جنگ کے دوران اسّی کی دہائی میں اس گروہ کو امریکی حمایت بھی حاصل تھی۔ سن 1995 میں اس نیٹ ورک نے طالبان کے ساتھ اتحاد کر لیا تھا۔ 1996ء میں طالبان حقانی نیٹ ورک کی مدد سے ہی کابل پر قبضہ کرنے کے قابل ہوئے تھے۔ سن دو ہزار بارہ میں امریکا نے حقانی نیٹ ورک کو ایک دہشت گرد گروہ قرار دے دیا تھا۔
تصویر: AP
جلال الدین حقانی اور طالبان
طالبان کی حکومت میں جلال الدین حقانی کو قبائلی امور کا وزیر بنا دیا گیا تھا۔ امریکی اتحادی افواج کی کارروائی یعنی سن دو ہزار ایک تک وہ اسی منصب پر فائز رہے۔ امریکی اتحادی افواج نے سن دو ہزار ایک میں ہی طالبان کی خود ساختہ حکومت کا تختہ الٹ دیا تھا۔ ملا عمر کے بعد جلال الدین حقانی کو طالبان کا معتبر ترین رہنما تصور کیا جاتا ہے۔ حقانی کے اسامہ بن لادن سے بھی قریبی تعلقات تھے۔
تصویر: picture-alliance/dpa
جلال الدین حقانی کی نجی زندگی
سن 1939 میں افغان صوبے پکتیا میں پیدا ہونے والے جلال الدین حقانی نے پاکستان میں قائم دارالعلوم حقانیہ نامی مدرسے سے تعلیم حاصل کی۔ یہ وہی مدرسہ ہے، جس کے بارے میں کہا جاتا ہے کہ وہاں افغان طالبان کے ساتھ ہمدردی کا عنصر نمایاں ہے۔ جلال الدین حقانی نے دو شادیاں کیں۔ ان کی ایک اہلیہ کا تعلق متحدہ عرب امارات سے بتایا جاتا ہے۔ حقانی کو سنی خلیجی ممالک میں کافی عزت کی نگاہ سے دیکھا جاتا ہے۔
تصویر: Getty Images/AFP/Str
یہ نیٹ ورک ہے کہاں؟
حقانی نیٹ ورک کا کمانڈ سینٹر مبینہ طور پر پاکستانی قبائلی علاقے شمالی وزیرستان کے صدر مقام میران شاہ میں قائم ہے۔ امریکی اور افغان حکام کا کہنا ہے کہ اس گروہ کو پاکستانی فوج کی حمایت بھی حاصل ہے اور یہ افغانستان میں سرحد پار کارروائیاں بھی کرتا رہتا ہے۔ تاہم پاکستان یہ الزامات رد کرتا ہے۔ یہ نیٹ ورک افغانستان میں امریکی اور ملکی حکومت کے مفادات کو نشانہ بناتا ہے۔
تصویر: Getty Images/AFP/J. Tanveer
سراج الدین حقانی بطور سربراہ
اپنی علالت کے باعث جلال الدین حقانی نے اپنے شدت پسند نیٹ ورک کی قیادت اپنے بیٹے سراج الدین حقانی کو سونپ دی تھی۔ سراج الدین افغان طالبان کا نائب کمانڈر بھی ہے۔ سن دو ہزار پندرہ میں ایسی اطلاعات موصول ہوئی تھیں کہ جلال الدین حقانی انتقال کر گئے تھے تاہم طالبان اور حقانی خاندان نے ان خبروں کی تردید کر دی تھی۔
تصویر: picture-alliance/dpa
سراج الدین حقانی کون ہے؟
حقانی نیٹ ورک کے موجودہ کمانڈر سراج الدین حقانی نے اپنا بچپن میران شاہ میں بسر کیا۔ کہا جاتا ہے کہ اس نے پشاور کے نواح میں واقع حقانیہ مدرسہ سے تعلیم حاصل کی ۔ یہ بھی کہا جاتا ہے کہ سراج الدین جنگی امور کا ماہر بھی ہے۔ یہ تاثر بھی عام ہے کہ سراج الدین اپنے والد جلال الدین کے مقابلے میں زیادہ انتہا پسندانہ نظریات کا مالک ہے۔
تصویر: picture-alliance/dpa
انس حقانی بطور قیدی
جلال الدین حقانی کے متعدد بیٹوں میں سے ایک کا نام انس حقانی ہے، جو ان کی متحدہ عرب امارات سے تعلق رکھنے والی بیوی سے پیدا ہوا تھا۔ انس حقانی اس وقت افغان حکومت کی قید میں ہے اور اسے ایک مقامی عدالت نے سزائے موت سنا رکھی ہے۔ حقانی نیٹ ورک نے خبردار کر رکھا ہے کہ اگر انس کو سنائی گئی سزا پر عمل درآمد کیا گیا، تو اس کے سنگین نتائج برآمد ہوں گے۔
تصویر: picture-alliance/AP Photo/National Directorate of Security
یہ گروہ ہے کتنا بڑا؟
مختلف اندازوں کے مطابق اس گروہ کے جنگجوؤں کی مجموعی تعداد تین تا دس ہزار بنتی ہے۔ یہ بھی کہا جاتا ہے کہ اس گروہ کی زیادہ فنڈنگ خلیجی ممالک کی طرف سے کی جاتی ہے۔ اس کے علاوہ یہ نیٹ ورک مختلف مجرمانہ کارروائیوں سے بھی اپنے لیے مالی وسائل جمع کرتا ہے، جن میں اغوا برائے تاوان اور لوٹ مار بھی شامل ہیں۔
تصویر: Getty Images/AFP/J. Tanveer
حقانی نیٹ ورک اور دیگر شدت پسند گروہ
حقانی نیٹ ورک کے افغان طالبان کے ساتھ روابط تو واضح ہیں لیکن یہ جنگجو گروہ مختلف دیگر دہشت گرد گروپوں سے بھی دوستانہ تعلقات رکھتا ہے۔ ان میں القاعدہ نیٹ ورک، تحریک طالبان پاکستان، ازبکستان کی اسلامی تحریک اور پاکستان میں قائم ممنوعہ لشکر طیبہ جیسی تنظیمیں بھی شامل ہیں۔ جلال الدین حقانی کے اسامہ بن لادن سے تعلقات تو تھے ہی لیکن وہ القاعدہ کے موجودہ سربراہ ایمن الظواہری سے بھی روابط رکھتے ہیں۔
تصویر: picture-alliance/dpa/Ausaf Newspaper
پاکستان سے راوبط
امریکی اور افغان حکومتوں کا دعویٰ ہے کہ حقانی نیٹ ورک کو پاکستانی فوج کی خفیہ ایجنسی آئی ایس آئی کی مدد حاصل ہے۔ تاہم پاکستانی حکومت اور فوج دونوں اس الزام کو مسترد کرتے ہیں۔ واشنگٹن حکومت کا اصرار ہے کہ پاکستانی حکومت کو ملکی قبائلی علاقے شمالی وزیرستان میں قائم اس دہشت گرد نیٹ ورک کے خلاف مؤثر کارروائی کرنا چاہیے۔