جمعرات کو پاکستانی طالبان باغیوں کی کالعدم تنظیم تحریک طالبان پاکستان کے ترجمان احسان اللہ احسان نے امریکی خبر رساں ادارے اے پی کو بتایا ہےکہ پاکستانی فورسز کے پندرہ مغوی اہلکاروں کو ہلاک کر دیا گیا ہے۔

پاکستانی طالبان نے بائیس دسمبر کو افغان سرحد سے ملحق ایک قبائلی علاقے میں واقع ایک سرحدی چوکی پر حملہ کر کے ان سکیورٹی فورسز کو یرغمال بنا لیا تھا۔ بتایا گیا ہے کہ یہ فرنٹئر کانسٹیبلری کے اہلکار تھے، جو سرحدی علاقے ٹانک کے نواح تعینات تھے۔

تحریک طالبان پاکستان کے ترجمان احسان اللہ احسان نے خبر ایجنسی اے پی کو ایک نامعلوم جگہ سے ٹیلی فون کر کے بتایا کہ ان سکیورٹی اہلکاروں کو ہلاک کر کے جمعرات کو ان کی لاشیں شمالی وزیرستان میں پھینک دی گئی ہیں۔ آزاد ذرائع سے ابھی اس دعوے کی تصدیق نہیں ہو سکی ہے۔

تشدد کے اس تازہ مبینہ واقعے سے اندازہ ہوتا ہے کہ پاکستان میں طالبان باغیوں کے سبھی دھڑے حکومت پاکستان سے مذاکرات کے لیے تیار نہیں ہیں۔ ایک اندازے کے مطابق پاکستان میں طالبان کے ایک سو سے زائد دھڑے متحرک ہیں۔

گزشتہ کچھ عرصے سے ایسی اطلاعات موصول ہورہی ہیں کہ پاکستانی خفیہ ادارے طالبان باغیوں سے مذاکرات کا سلسلہ جاری رکھے ہوئے ہیں تاہم اسی دوران طالبان باغیوں کی طرف سے ایسے دعوؤں کی تردید بھی کی جاتی رہی ہے۔

رپورٹ: عاطف بلوچ

ادارت: شادی خان سیف