اسلام آباد سے ملنے والی رپورٹوں میں بتایا گیا ہے کہ اس طالبہ کا نام حنا خان ہے۔ خبر ایجنسی ڈی پی اے نے لکھا ہے کہ شمال مغربی پاکستان میں ضلع سوات کی رہنے والی اس ٹین ایجر طالبہ کا دعویٰ ہے کہ اس کا نام عسکریت پسندوں کی ہٹ لسٹ پر ہے۔

پاکستانی وزیر داخلہ رحمان ملک نے اسلام آباد میں صحافیوں کو بتایا کہ اب یہ نوجوان طالبہ اسلام آباد میں ہے جہاں اس کی حفاظت کے لیے سکیورٹی انتظامات سخت کیے جا چکے ہیں۔

پاکستان میں دو ہفتے پہلے ملالہ یوسف زئی کی طرف سے لڑکیوں کے لیے تعلیم کے حق میں اور طالبان پر تنقید کرتے ہوئے کئی بیانات سامنے آ چکے ہیں۔ پاکستانی طالبان نے کئی مرتبہ دھمکی دی تھی کہ بہت مشہور ہو جانے والی اس لڑکی نے اگر اپنا رویہ نہ بدلا تو اسے قتل کر دیا جائے گا۔ پھر نو اکتوبر کو طالبان کے ایک مسلح حملے میں ملالہ اور اس کی چند ساتھی طالبات زخمی بھی ہو گئی تھیں۔ ملالہ کو ایک گولی سر میں بھی لگی تھی۔ ملالہ اس وقت برطانیہ کے ایک ہسپتال میں زیر علاج ہے۔

ملالہ کی طرح سوات سے ہی تعلق رکھنے والی حنا خان کے بارے میں پاکستانی وزیر داخلہ رحمان ملک نے صحافیوں کو مزید کوئی تفصیلات نہیں بتائیں۔ ڈی پی اے کے مطابق اس کا مقصد یہ ہے کہ اس پاکستانی طالبہ کی زندگی کو مزید خطرے میں نہ ڈالا جائے۔

حنا خان بھی ملالہ یوسف زئی کی طرح ماضی میں لڑکیوں کی تعلیم کے حق میں واضح بیان دیتی رہی ہے۔ حنا خان نے یہ بیانات قریب تین سال پہلے دینا شروع کیے تھے جب سوات میں طالبان کی مسلح کارروائیاں زوروں پر تھیں۔

حنا خان کی زندگی کو لاحق ممکنہ خطرات کا پاکستانی میڈیا میں بھی کئی مرتبہ ذکر سننے میں آ چکا ہے۔ پاکستان کے انگریزی اخبار ’ڈان‘ نے حال ہی میں اپنی ویب سائٹ پر لکھا تھا کہ حنا خان کا خاندان اب اسلام آباد منتقل ہو چکا ہے اور اس خاندان کو اپنی سلامتی کے بارے میں گہری تشویش لاحق ہے۔ روزنامہ ’ڈان‘ نے اپنی آن لائن اشاعت میں حنا خان کے ان خدشات کی نشاندہی بھی کی تھی کہ اس نوجوان طالبہ کو اسلام آباد تک میں ملنے والی طالبان کی نئی دھمکیوں کے بعد وہ پاکستانی دارالحکومت میں بھی تعلیم کے لیے اسکول نہیں جا سکے گی۔

ڈی پی اے کے مطابق یہ واضح نہیں ہے کہ حنا خان کی عمر کتنی ہے۔ لیکن روزنامہ ’ڈان‘ کے مطابق وہ گیارہویں جماعت کی طالبہ ہے۔ DPA نے لکھا ہے کہ اس کا مطلب یہ ہے کہ حنا خان کی عمر کم از کم بھی 16 سال ہو گی۔

(ij / mm (DPA