رواں برس کے لیے طب کے نوبل انعام کا اعلان کر دیا گیا ہے۔ یہ انعام خلیوں میں مختلف مادوں کی درست منتقلی کے لیے مشترکہ طور پر جیمز روتھمین، رینڈی شیکمین اور تھوماس زُوڈہوف کو دینے کا فیصلہ کیا گیا ہے۔

برطانوی محقق رونلڈ رَوس نے پتہ لگایا تھا کہ مچھر ملیریا کا باعث بنتے ہیں۔ آج بھی سالانہ 300 ملین لوگ اس بیماری کا شکار ہو جاتے ہیں جن میں سے تین ملین موت کے منہ میں چلے جاتے ہیں۔ تاہم رَوس کی تحقیق کی بدولت اس مرض کے علاج کی جانب پیش رفت ممکن ہوئی۔

سوئس ماہرِ طب پال ہیرمان میولر نے پتہ لگایا تھا کہ کیمیائی مادہ ڈی ڈی ٹی حشرات کو مارتا ہے لیکن جانوروں کو نقصان نہیں پہنچاتا۔ اس دریافت پر ڈی ڈی ٹی دنیا میں سب سے زیادہ استعمال ہونے والی کیڑے مار دوا بن گئی تھی۔ بعد ازاں اسے ماحول بالخصوص پرندوں کے لیے خطرناک قرار دیا گیا۔ تاہم مچھروں کے خلاف اسے اب بھی استعمال کیا جاتا ہے۔

تپ دِق کے باعث جرثومے کا پتہ رابرٹ کوخ نے چلایا تھا۔ تپ دِق یا ٹی بی آج بھی دنیا بھر میں وبائی مرض کے طور پر جانا جاتا ہے تاہم اس کا علاج ممکن ہے جو وقت لیتا ہے۔

فرانسیسی سرجن الیکسی کارَیل نے خون کی نالیوں اور پورے کے پورے اعضا کی پیوند کاری میں کامیابی حاصل کی۔ انہوں نے خون کی پھٹی ہوئی نالیوں کو جوڑنے کی تکنیک اور اعضا کو اسٹور کرنے کا طریقہ بھی دریافت کیا۔ آج دنیا پھر میں ڈاکٹر سالانہ ایک لاکھ اعضا کی پیوند کاری کرتے ہیں۔

ہالینڈ کے ڈاکٹر وِلَیم آئنتھوفن نے الیکٹرو کارڈیو گرام یا ای سی جی کا طریقہ تشکیل دینے کے بعد اسے اس حد تک ترقی دی کہ وہ جدید طب میں دل کی دھڑکن جانچنے اور دیگر امراضِ قلب کے لیے وسیع پیمانے پر استعمال کیا جانے لگا۔

آسٹریا کے ماہرِ طب کارل لانڈشٹائنر نے دریافت کیا تھا کہ دو اقسام کے خون کو ملانے سے اکثر لوتھڑے بن جاتے ہیں۔ بعد ازاں انہوں نے خون کی مختلف اقسام (اے، بی، اور او) کو اس کی وجہ قرار دیا۔ بعد میں ان کے ساتھیوں نے خون کے ایک اور گروپ اے بی کا پتہ بھی لگا لیا۔ اس پیش رفت سے خون کا محفوظ انتقال ممکن ہوا۔

اینٹی بائیوٹکس ادویات دریافت کرنے والے اور بنانے والوں کو تین نوبل انعام دیے گئے ہیں۔ ان میں سے ایک پنسلین دریافت کرنے والے الیگزینڈر فلیمنگ (1945ء) کو دیا گیا۔ اینٹی بائیوٹکس آج بھی وسیع پیمانے پر استعمال ہونے والی ادویات ہیں جو اکثر جان بچانے میں معاون ہوتی ہیں۔

جرمن فزیشن وَیرنر فورسمان نے اپنے دو ساتھیوں کی مدد سے گھٹنے یا ہاتھ کی شریانوں کے راستے دل تک ایک نالی بھیجنے کا طریقہ دریافت کیا۔ انہوں نے پہلی مرتبہ یہ تجربہ خود پر کیا۔

انسانی جسم کو اندر سے دیکھنا ہو تو اس کے لیے پہلے صرف ایکس ریز کا طریقہ استعمال ہوتا تھا۔ اب مزید طریقے بھی دریافت کر لیے گئے ہیں جن میں سی ٹی اور ایم آر آئی شامل ہیں۔

جرمن سینٹر فار کینسر ریسرچ کے ہارالڈ سُئر ہاؤزَن کی تحقیق سے پتہ چلا کہ انسانی رسولی کا وائرس سروائیکل کینسر کا باعث بن سکتا ہے۔ اس دریافت سے وائرس کے خلاف ویکسین بنانے میں مدد ملی۔

رابرٹ ایڈورڈز نے ٹیسٹ ٹیوب کے ذریعے بچوں کی پیدائش کے طریقے کو واضح طور پر ترقی دی۔ اس طریقے سے پہلا بچہ 1978ء میں انگلینڈ میں پیدا ہوا تھا۔ In-vitro کہلانے والا یہ طریقہ اب مزید جدت اختیار کر چکا ہے۔ اب تک دنیا بھر میں اس طریقے سے پانچ ملین سے زائد ٹیسٹ ٹیوب بچے پیدا ہو چکے ہیں۔