عالمی آبادی رپورٹ: 2100ء تک زمین پر تقریباﹰ گیارہ ارب انسان
18 جون 2019
اقوام متحدہ کی طرف سے جاری کردہ عالمی آبادی سے متعلق رپورٹ میں اگلے آٹھ عشروں میں کم رفتار اضافے کی پیش گوئی کی گئی ہے۔ رپورٹ کے مطابق رواں صدی کے اختتام تک زمین پر اندازہﹰ تقریباﹰ گیارہ ارب انسان آباد ہوں گے۔
تصویر: Getty Images/B. Boro
اشتہار
اقوام متحدہ کی گزشتہ رپورٹ میں شامل کردہ تخمینوں میں بتایا گیا تھا کہ رواں صدی کے اختتام تک زمین پر انسانی آبادی 11 ارب سے زائد ہو جانا تھی۔ تازہ ترین رپورٹ میں تاہم کہا گیا ہے کہ آج سے 81 برس بعد سن 2100ء میں زمین پر مجموعی انسانی آبادی 10.9 ارب ہو گی۔
اس رپورٹ کے مطابق اس وقت انسانی آبادی کا مجموعہ 7.7 ارب بنتا ہے، جو سن 2050ء تک بڑھ کر 9.7 ارب ہو جائے گا۔ لیکن اس کے بعد کی نصف صدی میں ممکنہ طور پر زمین پر انسانی آبادی میں بہت تیز رفتار اضافہ نہیں ہو گا اور رواں صدی کے دوسرے نصف حصے میں یہ اضافہ صرف 1.2 ارب کے برابر رہے گا۔
اقوام متحدہ کی طرف سے جاری کردہ اس نئی ورلڈ پاپولیشن رپورٹ میں بتایا گیا ہے کہ سن 2100ء میں زمین پر انسانی آبادی سے متعلق گزشتہ اندازہ دو سال پہلے لگایا گیا تھا، جو 11.2 ارب بنتا تھا۔ اب لیکن اس نئی رپورٹ میں 10.9 ارب انسانوں کا تخمینہ لگایا گیا ہے، جس کا مطلب ہے کہ ماہرین کے خیال میں اب اس صدی کے اختتام پر زمین پر انسانی آبادی گزشتہ اندازوں سے 300 ملین یا 30 کروڑ کم ہی رہے گی۔
افریقہ کی آبادی میں اگلے آٹھ عشروں میں بھی بہت تیز رفتار اضافہ ہوتا رہے گاتصویر: Getty Images/AFP/S. Glinksi
افریقہ کی آبادی میں مسلسل اضافہ
اقوام متحدہ کے ماہرین نے اس کمی کی ایک بڑی وجہ یہ بتائی ہے کہ دنیا کے کئی ممالک، خاص کر ترقی یافتہ ریاستوں میں شرح پیدائش میں مسلسل کمی ہو رہی ہے جبکہ ترقی پذیر ممالک میں آبادی میں اضافہ آج بھی بہت زیادہ اور تیز رفتار ہے۔ یہی وجہ ہے کہ آئندہ آٹھ عشروں میں مختلف براعظموں میں انسانی آبادی میں تبدیلی کی شرح بھی مختلف رہے گی۔
اس بات کا ایک اہم پہلو یہ ہے کہ سب سے کم ترقی یافتہ براعظم افریقہ میں، جہاں آج بھی عام انسانوں کو بے تحاشا غربت کا سامنا ہے، آبادی میں اضافے کی شرح مسلسل زیادہ ہی رہے گی۔ خاص کر صحارا سے جنوب کی طرف واقع ریاستوں کی آبادی تو سن 2050ء تک ہی دوگنا ہو جائے گی۔
آبادی میں اضافہ اور نو بڑے ممالک
اقوام متحدہ کی اس رپورٹ کے مطابق دنیا میں انسانی آبادی میں اضافے میں سے نصف کے ذمے دار صرف نو ایسے بڑے ممالک ہیں، جن میں جنوبی ایشیا سے پاکستان اور بھارت بھی شامل ہیں۔ یہ نو ممالک بھارت، نائجیریا، پاکستان، کانگو، ایتھوپیا، تنزانیہ، انڈونیشیا، مصر اور امریکا ہیں۔
یورپ اور شمالی امریکا کی آبادی میں مجموعی اضافہ صرف دو فیصد کے برابر رہنے کی توقع ہےتصویر: picture-alliance/dpa/A. Burgi
دوسری طرف شمالی امریکا اور یورپ جیسے ترقی یافتہ براعظموں میں اس صدی کے اختتام تک آبادی میں اضافہ اتنا سست رفتار ہو گا کہ شرح پیدائش اور شرح انتقال کے فرق کو مدنظر رکھا جائے تو ان براعظموں کی 2100ء تک مجموعی آبادی میں صرف دو فیصد کا انتہائی معمولی اضافہ ہی ہو گا۔
انسانوں کی اوسط متوقع عمر میں بھی اضافہ
تازہ ترین ورلڈ پاپولیشن رپورٹ کے مطابق زمین پر انسانی آبادی میں اوسط متوقع عمر میں بھی مسلسل اضافہ ہوتا جا رہا ہے۔ آج زمین پر کوئی بھی عام انسان اوسطاﹰ 72.6 سال تک زندہ رہتا ہے، جو 1990ء کے مقابلے میں آٹھ سال زیادہ ہے۔ سن 2050ء تک یہی انفرادی اوسط متوقع عمر مزید اضافے کے ساتھ 77.1 سال ہو جائے گی۔
رپورٹ کے مطابق آج دنیا میں ہر گیارہویں انسان کی عمر 65 برس سے زیادہ ہے۔ 2050ء تک ہر چھٹا انسان 65 سال سے زیادہ کی عمر کا ہو گا۔ اس کے علاوہ 2018ء میں دنیا میں 80 سال سے زائد عمر کے انسانوں کی مجموعی تعداد 143 ملین تھی، جو اگلے تین عشروں میں تین گنا ہو کر 426 ملین ہو جائے گی۔
م م / ع ا / ڈی پی اے، یو این
سن 2030 میں پاکستانی شہروں کی متوقع آبادی
اقوام متحدہ کی ایک تازہ رپورٹ کے مطابق سن 2047 میں پاکستان کے دیہی اور شہری علاقوں میں آباد انسانوں کی تعداد برابر ہو جائے گی۔ اس پکچر گیلری میں دیکھیے بارہ برس بعد پاکستانی شہروں کی آبادی کتنی ہو گی۔
تصویر: picture-alliance/dpa
1- کراچی
کراچی قیام پاکستان کے بعد سے اب تک آبادی کے لحاظ سے ملک کا سب سے بڑا شہر ہے۔ سن 2018 میں کراچی کی آبادی ایک کروڑ چون لاکھ ہے جو سن 2030 تک دو کروڑ بتیس لاکھ ہو جائے گی۔ اقوام متحدہ کے مطابق تب کراچی آبادی کے اعتبار سے دنیا کا تیرہواں سب سے بڑا شہر بھی ہو گا۔
تصویر: Reuters/A. Soomro
2- لاہور
پاکستانی صوبہ پنجاب کا دارالحکومت لاہور ایک کروڑ سترہ لاکھ نفوس کے ساتھ ملک کا دوسرا بڑا شہر ہے۔ سن 2030 تک لاہور کی آبادی قریب دو کروڑ ہو جائے گی۔ پچاس کی دہائی میں لاہور کے شہریوں کی تعداد آٹھ لاکھ چھتیس ہزار تھی اور وہ تب بھی پاکستان کا دوسرا بڑا شہر تھا۔
تصویر: Getty Images/AFP/A. Qureshi
3- فیصل آباد
فیصل آباد پاکستان کا تیسرا بڑا شہر ہے اور بارہ برس بعد بھی آبادی کے اعتبار سے یہ اسی نمبر پر رہے گا۔ تاہم فیصل آباد کی موجودہ آبادی 3.3 ملین ہے جو اقوام متحدہ کی رپورٹ کے مطابق سن 2030 تک قریب پانچ ملین ہو جائے گی۔
تصویر: Reuters/C. Firouz
4- پشاور
پاکستان کے صوبہ خیبر پختونخوا کے دارالحکومت پشاور کی موجودہ آبادی بھی دو ملین سے کچھ زائد ہے اور اس وقت یہ ملک کا چھٹا بڑا شہر بھی ہے۔ تاہم سن 2030 میں اس شہر کی آبادی قریب تینتیس لاکھ نفوس پر مشتمل ہو گی اور یہ ملک کا چوتھا بڑا شہر بن جائے گا۔
تصویر: DW/F. Khan
5- گوجرانوالہ
سن 1950 میں گوجرانوالہ ایک لاکھ اٹھارہ ہزار کی آبادی کے ساتھ پاکستان کا نواں سب سے بڑا شہر تھا تاہم اب یہاں دو ملین سے زائد لوگ بستے ہیں ۔ اقوام متحدہ کے اندازوں کے مطابق بارہ برس بعد اس شہر کی آبادی بتیس لاکھ چونسٹھ ہزار تک پہنچ جائے گی اور یہ ملک کا پانچواں بڑا شہر ہو گا۔
تصویر: FAROOQ NAEEM/AFP/Getty Images
6- راولپینڈی
اکیس لاکھ چھپن ہزار کی آبادی کے ساتھ راولپنڈی پاکستان کا چوتھا بڑا شہر ہے۔ بارہ برس بعد راولپنڈی کی آبادی تین ملین سے زائد ہو جائے گی لیکن تب یہ ملک کا چھٹا بڑا شہر ہو گا۔ 1950ء میں راولپنڈی کی آبادی دو لاکھ تینتیس ہزار تھی اور تب آبادی کے اعتبار سے یہ ملک کا تیسرا بڑا شہر تھا۔
تصویر: picture-alliance/Zumapress/PPI
7- ملتان
ملتان جنوبی پنجاب کا سب سے بڑا اور ملک کا ساتواں بڑا شہر ہے جس کی موجودہ آبادی قریب دو ملین ہے۔ اقوام متحدہ کی رپورٹ کے مطابق سن 2030 میں ملتان کی آبادی قریب انتیس لاکھ ہو جائے گی۔
تصویر: Getty Images/AFP/SS Mirza
8- حیدر آباد
صوبہ سندھ کا دوسرا بڑا شہر حیدر آباد سترہ لاکھ بیاسی ہزار نفوس کے ساتھ اس برس ملک کا آٹھواں بڑا شہر ہے۔ سن 2030 تک اس شہر کی آبادی چھبیس لاکھ تیس ہزار ہو جائے گی اور وہ تب بھی ملک کا آٹھواں بڑا شہر ہی ہو گا۔
تصویر: Imago/Zumapress
9- اسلام آباد
وفاقی دارالحکومت اسلام آباد کی موجودہ آبادی ایک ملین سے زائد ہے تاہم اگلے بارہ برسوں میں سولہ لاکھ بہتر ہزار نفوس کے ساتھ یہ شہر ملک کا نواں بڑا شہر بن جائے گا۔ رواں صدی کے آغاز میں اسلام آباد کے شہریوں کی تعداد پانچ لاکھ انہتر ہزار تھی۔
تصویر: picture alliance/dpa/M.Reza
10- کوئٹہ
بلوچستان کے دارالحکومت کوئٹہ کی آبادی رواں برس ہی ایک ملین سے تجاوز کر چکی ہے۔ بارہ برس بعد کوئٹہ کی آبادی سولہ لاکھ سے تجاوز کر جائے گی۔ جب کہ سن 1950 میں کوئٹہ کی آبادی 83 ہزار تھی۔
تصویر: shal.afghan
11- بہاولپور
پاکستانی صوبہ پنجاب کے جنوبی شہر بہاولپور کی آبادی بھی اگلے چند برسوں میں ایک ملین سے زیادہ ہو جائے گی اور سن 2030 تک یہاں کی آبادی بارہ لاکھ چھیالیس ہزار نفوس تک پہنچ جائے گی۔ رواں برس کی آبادی سات لاکھ چھیانوے ہزار ہے جب کہ 1950 میں بہاولپور کی آبادی محض بیالیس ہزار تھی۔
تصویر: picture-alliance/dpa
12- سیالکوٹ
صوبہ پنجاب ہی کے شہر سیالکوٹ کی آبادی بھی اگلے بارہ برسوں میں ایک ملین سے زائد ہو جائے گی۔ اس برس تک سیالکوٹ چھ لاکھ چھہتر ہزار نفوس کے ساتھ ملک کا تیرہواں بڑا شہر ہے۔ 1950ء میں سیالکوٹ کی آبادی ایک لاکھ پچپن ہزار تھی۔
تصویر: Reuters
13- سرگودھا
اقوام متحدہ کی رپورٹ کے مطابق پاکستانی صوبہ پنجاب کی آبادی بھی سن 2030 میں ایک ملین سے کچھ کم (نو لاکھ نوے ہزار) تک پہنچ جائے گی۔ اس برس یعنی 2018ء میں سرگودھا کی آبادی چھ لاکھ 77 ہزار ہے اور یہ ملک کا بارہواں بڑا شہر ہے۔ سن 1950 میں یہاں صرف چوہتر ہزار شہری مقیم تھے۔
تصویر: Reuters/Stringer
14- لاڑکانہ
صوبہ سندھ ہی کے شہر لاڑکانہ کی موجودہ آبادی پانچ لاکھ چھ ہزار نفوس پر مشتمل ہے جو اب سے بارہ برس بعد سات لاکھ بیاسی ہزار تک پہنچ جائے گی۔ 1950 میں لاڑکانہ کی آبادی محض تینتیس ہزار تھی۔
تصویر: AP
15- سکھر
سن 2030 میں پاکستان کے صوبہ سندھ میں واقع شہر سکھر کی آبادی سات لاکھ ساٹھ ہزار تک پہنچ جائے گی۔ سن 1950 میں اس شہر کی آبادی محض چھہتر ہزار نفوس پر مشتمل تھی جب کہ رواں برس سکھر کی آبادی پانچ لاکھ چودہ ہزار ہے۔