پاکستانی طالب علم شاداب رسول نے جینیئس اولمپیاڈ کے شعبہ ماحولیات میں چاندی کا یہ تمغہ چائے کی استعمال شدہ پتی کی مدد سے صنعتی فضلے سے آلودہ پانی کو قابل استعمال بنانے کے حوالے سے ان کے پراجیکٹ پر دیا گیا۔

سندھ کے شہر خیرپور سے تعلق رکھنے والے پندرہ سالہ شاداب رسول، پاک ترک انٹرنیشنل اسکول میں دسویں جماعت کے طالبعلم ہیں۔ ان کا یہ پراجیکٹ امریکا میں بین الاقوامی سطح پر ہائی اسکول کے طالبعلموں کے درمیان ہونے والے مقابلے GENIUS Olympiad میں شامل تھا۔ اس مقابلے کی مختلف کیٹگریز میں 50 ممالک کے 450 طالبعلموں نے شرکت کی اور اپنے پراجیکٹس پیش کیے۔ خیر پور سے شاداب رسول جبکہ ہری پور سے عبدالدائم وہ دو پاکستانی طالبعلم تھے جنہیں اس مقابلے میں شرکت کی دعوت دی گئی تھی۔ شاداب بتاتے ہیں، ’’ہم دونوں طالبعلموں کے علیحدہ پراجیکٹس تھے۔ ہم نے ججوں کے سامنے اپنی ریسرچ پیش کی۔ اگلے دن اس مقابلے کے نتائج کا اعلان ہوا جس کے مطابق مجھےEnvironmental Quality کے شعبے میں چاندی کا تمغہ دیا گیا۔‘‘

اپنے پراجیکٹ کی تفصیلات کے حوالے سے شاداب نے بتایا کہ انہوں نے چائے کی پتی کے ذریعے صعنتی فضلے میں موجود چار خطرناک دھاتوں کو کشید کرتے ہوئے ان کا خاتمہ کیا،’’میرے پراجیکٹ کا عنوان تھا “Removal of harmful pollutants from industrial waste water by the use of tea waste“ ۔ صعنتی فضلے میں چار خطرناک دھاتیں پائی جاتی ہیں جن میں نکل، کیڈمیئم، فینول اور لیڈ شامل ہیں۔ میں نے چائے کی پتی میں موجود بھاری دھاتوں کو جذب کرنے کی صلاحیت کو استعمال کرتے ہوئے ان کا خاتمہ کیا۔ جس کے بعد یہ پانی کاشتکاری کے لیے قابل استعمال بن جاتا ہے۔‘‘

شاداب کے مطابق ان کا متعارف کروایا گیا طریقہ کار نہ صرف نہایت مؤثر ہے بلکہ اس پر لاگت بھی کم آتی ہے، ’’ہم نے ٹی بیگ کا استعمال اسی لیے کیا تھا تاکہ اس پر خرچہ کم آئے۔ ورنہ دھاتیں ختم کرنے کے لیے میگنیٹک فیلڈ کے علاوہ اور بھی کئی طریقے ہیں تاہم وہ لاگت کے اعتبار سے خاصے مہنگے ہیں۔ ہم نے اسی لیے چائے کی پتی استعمال کی جس کے باعث یہ پراجیکٹ کم سرمائے میں مکمل ہو سکتا ہے۔‘‘

اس مقابلے میں تمغے حاصل کرنے والے طالبعلوں کو اسٹیٹ یونیورسٹی آف نیویارک کی جانب سے اسکالر شپ دینے کا اعلان بھی کیا گیا ہے جس کے بارے میں شاداب بتاتے ہیں، ’’ مجھے جو اسکالر شپ دی گئی ہے اس کے بارے میں پاکستانی میڈیا میں بہت بڑھا کر بتایا جا رہا ہے۔ مجھے جو اسکالر شپ دی گئی ہے وہ پچاس ہزار امریکی ڈالرز ہے جو کہ بیرون ملک تعلیم کے لیے ناکافی ہے۔ مجھے اس کے لیے SAT کے علاوہ ایک اور امتحان بھی پاس کرنا ہو گا ۔ اگر اس کا نتیجہ اچھا آیا تو اس کے بعد اسکالرشپ کی رقم میں اضافہ ہو جائے گا۔‘‘

شاداب کے مطابق وہ انٹر کے امتحانات کے بعد اسکالر شپ کے لیے امتحان دیں گے تاکہ مزید تعلیم حاصل کرتے ہوئے ملک اور قوم کا نام روشن کر سکیں۔

رپورٹ: عنبرین فاطمہ

ادارت: افسر اعوان