جاپانی وزیراعظم شینزو آبے نے امریکی ذرائع ابلاغ کو ٹوکیو اور واشنگٹن حکام کے مابین ہونے والے اُن نئے دفاعی قوانین کے بارے میں مزید تفصیلات سے آگاہ کیا، جس پر وہ اپنے تین روزہ امریکی دورے کے دوران حکام سے بات چیت کریں گے۔ تاہم اس صورتحال میں یہ بالکل واضح ہے کہ واشنگٹن کے لیے امریکا کے علاوہ ایشیا میں بھی اُس کے عسکری مفادات کے لیے یہ دفاعی پالیسیاں انتہائی اہم ہیں۔ اخبار واشنگٹن پوسٹ نے ایک امریکی اہلکار کا نام مخفی رکھتے ہوئے حوالہ دیا ہے ’’یہ یقیناً ایک بہت ہی بڑی بات ہے‘‘۔

ذرائع ابلاغ کی رپورٹوں کے مطابق ان نئے دفاعی قوانین کے بعد جاپان کوجغرافیائی لحاظ سے ایک بڑے علاقے میں فوجی کارروائیاں کرنے کی اجازت مل جائے گی۔ اس طرح جاپان امریکی افواج کے ساتھ تعاون کے حوالے سے پہلے سے بہتر پوزیشن میں بھی ہو گا۔ تاہم دوسری عالمی جنگ کے بعد طے پانے والے اس سمجھوتے میں کی جانے والی ان تبدیلوں کی جاپان کے دونوں ایوانوں سے منظوری لازمی ہے۔

واشنٹگن ہیریٹج فاؤنڈیشن کے بروس کلنگنر کہتے ہیں کہ امریکا ایک عرصے سے دفاعی پالیسیوں میں زیادہ موثر کردار ادا کرنے کے لیے اپنے ساتھی ملک جاپان پر زور ڈالتا رہا ہے، صرف اُس کے اپنے دفاع کے لیے نہیں بلکہ خطے اور عالمی سطح پر اس شعبے میں ہونے والی تبدیلیوں کی وجہ سے بھی۔ واشنگٹنر ولسن نامی تھنک ٹینک سے وابستہ شیہوکو گوٹو کہتے ہیں کہ امریکا اس وجہ سے بھی جاپان سے بھرپور کردار ادا کرنے کا مطالبہ کر رہا ہے کیونکہ وہ خود مشرق وسطی، یورپ اور روس کے خلاف بھی مصروف ہے۔ ’’امریکی کے پاس بہت زیادہ وسائل اور طاقت باقی نہیں بچی ہے‘‘۔

چین اور جاپان بحیرہ جنوبی چین کی حدود پر ایک دوسرے کے مخالف ہیں اور یہ دونوں ممالک چند جزائر پر بھی اپنی ملکیت کا دعوی کرتے ہیں۔ اس کے علاوہ بھی کئی دیگر معاملات ہیں، جن کی وجہ سے ان دونوں ممالک کے مابین حالات اکثر کشیدہ بھی رہتے ہیں۔ جاپان اور امریکا کی اس قربت کی وجہ سے چینی حکومت کو بھی منصوبہ سازی کرنی پڑ گئی۔ ان کا مطالبہ بالکل واضح ہے’’امریکا کو مہربانی فرما کر اس تنازعے میں دخل اندانی نہیں کرنی چاہیے۔‘‘ شیہوکو گوٹو کہتے ہیں بیجنگ کے طرز عمل کو دیکھتے ہوئے یہ کہا جا سکتا ہے کہ چین خطے میں کسی اور کی حکمرانی تسلیم نہیں کرے گا اور وہ خطے کی واحد طاقت رہنا چاہتا ہے۔