اسرائیل کو جنگی طیاروں کے پرزوں کی فراہمی روکنے کا مقدمہ
4 دسمبر 2023![The Peace Palace in The Hague (Netherlands), seat of the International Court of Justice.](https://static.dw.com/image/66827896_800.webp)
دی ہیگ سے موصولہ رپورٹوں کے مطابق نیدرلینڈز سے تعلق رکھنے والے انسانی حقوق کے وکلاء نے آج پیر چار دسمبر کو دی ہیگ میں سول کورٹ میں مقدمہ دائر کیا ہے جس میں اسرائیل کو لڑاکا طیاروں کے پرزوں کی برآمد کو روکنے کا مطالبہ کیا گیا۔ ان وکلاء کا کہنا ہے کہ اسرائیل کو جو پرزے فراہم کیے جا رہے ہیں اس کا استعمالاسرائیلی فوج غزہ پر حملوں میں کرے گی۔ انسانی حقوق کے لیے سرگرم تنظیموں نے الزام عائد کیا ہے کہ F-35 جیٹ طیاروں کے پرزوں کی ترسیل سے اسرائیل ممکنہ طور پر حماس کے ساتھ جنگ میں جنگی جرائم کا مرتکب ہو سکتا ہے اور نیدر لینڈز اسرائیل کو پُرزے فراہم کر کے ممکنہ طور پر ان جنگی جرائم میں ملوث ہو سکتا ہے۔
یہ وکلاء چاہتے ہیں کہ دی ہیگ کی ڈسٹرکٹ کورٹ ایک حکم امتناعی جاری کرے جس کے مطابق اسرائیل کو F-35 جنگی طیاروں کے پُرزوں کی برآمدات پر پابندی عائد کی جائے۔ خاتون وکیل لیزبتھ زیگ ویلڈ نے اپنے بیان میں کہا، ''ریاست کو فوری طور پر F-35 طیاروے کے پرزوں کی اسرائیل کو ترسیل روکنی چاہیے۔‘‘
سرکاری دستاویزات کا حوالہ دیتے ہوئے، خاتون وکیل نے کہا کہ ڈچ کسٹمز نے نیدرلینڈز کی حکومت سے دریافت کیا تھا کہ سات اکتوبر کو حماس کی طرف سے اسرائیل پر ہونے والے دہشت گردانہ حملوں کے بعد بھی کیا وہ اسرائیل کو F-35 طیاروں کے پرزوں کی برآمدات جاری رکھنا چاہتی ہے۔ ان کا مزید کہنا تھا، ''ڈچ ریاست کے لیے اقتصادی مفادات اور سفارتی ساکھ اس انتباہ سے زیادہ اہم نہیں ہو سکتے کہ لڑاکا طیارے جنگی قوانین کی سنگین خلاف ورزیوں میں حصہ ڈال سکتے ہیں۔‘‘
اُدھر نیدر لینڈز کے حکومتی وکیل ریمر ویلدھوئیس نے عدالت پر زور دیا کہ وہ اس سلسلے میں حکم امتناعی کو مسترد کردیں کیونکہ اگر ڈچ عدالت انسانی حقوق کے وکلاء کے مطالبے پر حکم امتناعی جاری کرتے ہوئے جنگی طیاروں کے پرزوں کی برآمدات پر پابندی عائد کر بھی دے تو، ''امریکہ یہ پرزے کسی اور جگہ سے اسرائیل کو پہنچاتا رہے گا۔‘‘
نیدر لینڈز کے حکومتی وکیل نے مزید کہا کہ اسرائیل کو اپنے دفاع کا حق حاصل ہے۔ انہوں نے کہا، ''اسرائیل کو خطے سے لاحق خطرات کا جواب دینے کے قابل ہونا چاہیے لیکن بلاشبہ، بین الاقوامی قانون کے دائرہ کار میں رہتے ہوئے۔‘‘
حکومتی وکیل کے بقول ڈچ حکومت کا خیال ہے کہ F-35 کے استعمال سے (بین الاقوامی قوانین کی) خلاف ورزی نہیں ہو سکتی اور فی الوقت ایسے مفروضات نہیں پیش کیے جا سکتے۔
نیدر لینڈز کے انسانی حقوق کے وکلاء کی طرف سے دائرکردہ اس مقدمے کا فیصلہ آئندہ دو ہفتوں کے اندر متوقع ہے اور اس پر اپیل بھی کی جا سکتی ہے۔
ک م/ا ب ا، ر ب (اے ایف پی)