انتہا پسند سنی عسکریت پسندوں کی نئی کارروائیوں کے تناظر میں عراقی وزیر اعظم نوری المالکی نے ملکی ایئر فورس کو حکم دیا ہے کہ وہ انتہا پسند اسلامک اسٹیٹ کے ساتھ برسرپیکار کرد فورسز کی مدد کرتے ہوئے عسکریت پسندوں کو نشانہ بنائے۔ امریکا کی تربیت یافتہ عراقی فوج اسلامک اسٹیٹ کے جنگجوؤں کے سامنے کسی بڑی مزاحمت کا مظاہرہ کرنے میں ناکام ہو چکی ہے اور اب کردوں کی خصوصی گوریلا فورس پیش مرگا سے توقع کی جا رہی ہے کہ وہ سنی عسکریت پسندوں کی پيش قدمی کو روکنے میں کوئی غیر معمولی کارکردگی دکھائے۔

عراقی فوج کے ترجمان قاسم عطا کا کہنا ہے کہ فوج کی جنرل کمان نے فضائیہ کو حکم جاری کر دیا ہے کہ وہ کرد فوج کی مدد و معاونت کے لیے چوکس رہے تاکہ کسی بھی درخواست پر اسلامک اسٹیٹ کے دہشت گردوں کو فوری طور پر نشانہ بنانے کے سلسلے کو شروع کیا جا سکے۔ مبصرین کے مطابق ماضی میں نوری المالکی کرد خود مختار علاقے کی سیاسی قیادت سے نالاں تھے اور اب اُس ناراضی کو پسِ پشت ڈالتے ہوئے سنی عسکریت پسندوں کی پیشقدمی روکنے کے لیے کردوں کی فضائی مدد کے لیے تیار ہو گئے ہیں۔

دو روز قبل کرد فوج کو سنی عسکریت پسندوں سے بڑی شکست کھانا پڑی تھی۔ اسلامک اسٹیٹ کے لشکریوں نے مُوصل ڈیم اور اِس کے قُرب میں واقع اہم شہر وانا پر قبضہ کرنے کے علاوہ سنجر نامی کرد قصبے پر بھی غلبہ حاصل کر لیا تھا۔ مُوصل ڈیم عراق کا سب سے بڑا ڈیم ہے۔ اس کے علاوہ ایک آئل فیلڈ بھی سنی عسکریت پسندوں کے ہاتھ لگ گئی ہے۔ یہ پانچويں آئل فیلڈ ہے جو سنی عسکریت پسندوں کے قبضے میں آئی ہے اور امکاناً وہ اِن تیل کے کنووں سے خام تیل کو فروخت کر کے اپنی عسکری کارروائیوں کو تقویت دینے کی کوشش کر سکتے ہیں۔

دوسری جانب کرد گوریلا تنظیم پیش مرگا کی جانب سے اعلان کیا گیا ہے کہ اُس کی جوابی کارروائی سے مُوصل ڈیم کے علاقے سے سنی عسکریت پسندوں کو پسپا کر دیا گیا ہے۔ اب ڈیم کا انتظام و انصرام اِس وقت پیش مرگا کے جوانوں کے ہاتھ میں ہے۔ اس بیان کی آزاد ذرائع سے تصدیق نہیں ہو سکی ہے۔ یہ ضرور طے ہے کہ ابھی تک کرد فوج کی جانب سے مؤثر جوابی کارروائی کا انتظار کیا جا رہا ہے۔ اِس دوران ایک اعلیٰ کرد اہلکار نے امریکا سے اپیل کی ہے کہ وہ انہیں اسلحہ فراہم کرے تاکہ دہشت گردی کے خلاف جنگ کا سلسلہ بھرپور انداز میں شروع کیا جا سکے۔ اِس درخواست میں ٹینکوں اور بھاری توپ خانے کی فراہمی شامل ہے۔