تازہ حملے کی وجوہات کے بارے میں متضاد رپورٹیں سامنے آئی ہیں۔ چند سرکاری اہلکاروں کے مطابق یہ دھماکہ سڑک کے کنارے نصب بم کے پھٹنے کی وجہ سے ہوا جبکہ بعض عینی شاہدین کے مطابق ایک خود کش حملہ آور رضاکاروں کا روپ دھارے ہوئے وہاں موجود تھا اور زائرین کو پینے کے لیے جوس فراہم کر رہا تھا۔ ہلاک شدگان میں گیارہ پولیس اہلکار بھی شامل ہیں۔

صوبہ بصرہ کے شعبہ صحت کے سربراہ ڈاکٹر ریاض عبد الامیر کے مطابق اس حملے میں 53 افراد ہلاک جبکہ 130 سے زائد افراد زخمی ہوئے ہیں۔ ہفتے کے روز یہ دھماکہ اربعین کے موقع پر ہوا۔ اربعین کا مطلب چہلم ہے اور یہ واقعہء کربلا کی یاد میں عاشورہ کے 40 ویں دن منایا جاتا ہے۔ اس دن شیعہ زائرین کی بڑی تعداد عراق میں مقدس مقامات کی زیارت کے لیے پہنچتی ہے۔

عراق میں گزشتہ پندرہ روز کے دوران شیعہ کمیونٹی پر ہونے والے مختلف بم دھماکوں میں 145 سے زائد افراد مارے جا چکے ہیں۔

عراق سے امریکی افواج کے مکمل انخلاء کے بعد پرتشدد واقعات میں اضافہ دیکھا گیا ہے۔ امریکی فوجیوں کی واپسی کے دو دن بعد ہی یہ سلسلہ شروع ہو گیا تھا۔ اس تناظر میں امریکی نائب صدر جو بائیڈن نے وزیر اعظم نوری المالکی اور اپوزیشن کے مابین مفاہمت پر زور بھی دیا تھا۔

عراق کے شیعہ اور سنی دھڑوں کے مابین اختلافات میں اُس وقت شدت آئی، جب وزیر اعظم نوری المالکی نے امریکی فوجی دستوں کے انخلاء کے بعد سنّی نائب صدر طارق الہاشمی کی گرفتاری کے احکامات جاری کر دیے۔ نائب صدر الہاشمی پر ڈَیتھ اسکواڈ منظم کرنے کے الزامات ہیں۔

حکومت میں شامل مختلف سیاسی عناصر کے درمیان انتہا درجے کی بد اعتمادی پائی جاتی ہے اور المالکی کی مخلوط حکومت بقا کے خطرے سے دوچار دکھائی دیتی ہے۔

عراق میں سنی فرقے اور سکیولر نظریات کی نمائندہ جماعت العراقیہ کے رہنما ایاد علاوی کا ایک امریکی ٹیلی وژن کو انٹرویو دیتے ہوئے کہنا تھا، ’’ملک کی مجموعی صورتحال انتہائی پریشان کن ہے۔ فرقہ واریت ملک میں واپس آ رہی ہے۔‘‘ ان کا مزید کہنا تھا کہ عراق اپنی تاریخ کے مشکل ترین مرحلے سے گزر رہا ہے۔

رپورٹ: امتیاز احمد

ادارت: شادی خان سیف