عراقی دارالحکومت بغداد ميں بدھ پندرہ جنوری کے دن متعدد سويلين اہداف پر نو کار بم حملے کيے گئے، جِن ميں اب تک مجموعی طور پر 37 افراد کی ہلاکت کا بتایا گیا ہے۔ نيوز ايجنسی اے ايف پی کے ايک رپورٹر کے مطابق اِن ميں سے ايک کار بم دھماکا شعب نامی علاقے کی ايک منڈی ميں کيا گيا، جو اُس وقت لوگوں سے بھری ہوئی تھی۔ ايک اور حملہ ثنا نامی سڑک پر واقع ايک ہوٹل کے باہر کيا گيا۔ يہ دھماکے شيعہ اکثريتی علاقوں يا ايسے علاقوں ميں کيے گئے، جہاں تمام فرقوں کے لوگ آباد ہيں لیکن ان میں اکثریت شیعوں کی ہے۔

مقامی پوليس کا کہنا ہے کہ بغداد ميں ہلاکتوں کی تعداد اِس سے بھی کافی زيادہ ہو سکتی تھی۔ پوليس اہلکاروں کے مطابق اُنہوں نے چار ايسے مشتبہ خود کش بمباروں کو حراست ميں لے ليا ہے، جِن کا تعلق مبينہ طور پر عرب رياستوں سے ہے۔ پولیس نے ان مبینہ خود کش حملہ آوروں کی قومیتیں ظاہر نہیں کی ہیں۔ اِن چاروں مشتبہ خود کش حملہ آوروں کو مختلف شيعہ علاقوں سے گرفتار کيا گيا تاہم اِن کے بارے ميں تفصيلات جاری نہيں کی گئی ہيں۔ پوليس نے بارود سے لدی کئی گاڑيوں کو بھی اپنے قبضے میں لیا ہے۔

دريں اثناء پندرہ جنوری کو ہی بغداد کے شمال ميں واقع صوبہ ديالا ميں بہروز نامی علاقے ميں ايک جنازے کو خود کش حملے کا نشانہ بنايا گيا، جِس ميں سولہ افراد ہلاک اور بيس ديگر زخمی ہو گئے۔ يہ جنازہ صہوا نامی ايک سنی قبائلی مليشيا کے ايک رکن کا تھا۔ اس گروپ نے اپنے مقامی ساتھيوں کے ساتھ عليحدگی اختيار کرتے ہوئے سن 2006 سے امريکی افواج کا ساتھ دينا شروع کر ديا تھا۔ اِسی ليے ديگر سنی شدت پسند گروہ صہوا کے ارکان کو باغی مانتے ہوئے، انہيں حملوں کا نشانہ بناتے ہيں۔ یہ نوری المالکی حکومت کی حامی بھی ہے۔

مرکزی شمالی شہر موصل اور اُس کے نواح ميں متعدد پر تشدد واقعات ميں کم از کم تيرہ افراد ہلاک ہوئے، جِن ميں سے نو فوجی تھے۔ دارالحکومت سے اسی کلوميٹر شمال ميں واقع مقداديہ نامی شہر ميں بھی اينٹيں بنانے والی ايک فيکٹری کے سات ملازمين کو گولياں مار کر ہلاک کر ديا گيا۔ اگرچہ عراق کے مختلف حصوں ميں بدھ کے روز ہونے والے خون خرابے کی کسی گروہ نے ذمہ داری قبول نہيں کی ہے تاہم عام طور پر القاعدہ سے منسلک ’اسلامک اسٹيٹ آف عراق اينڈ شام‘ سے تعلق رکھنے والے سنی جنگجو ايسے حملے کرتے ہيں۔

دوسری جانب عراقی فوج کے کمانڈوز نے فضائیہ کی مدد سے فلوجہ شہر کے قریب واقع صقلاویہ نامی قصبے پر حملہ کر کے اُس پر قبضہ کر لیا ہے۔ عراقی فوج کے اس بھاری آپریشن کے باعث سنی انتہا پسند مقبوضہ قصبے سے پسپائی اختیار کر گئے۔ صقلاویہ کا قصبہ فلوجہ شہر کے شمال میں ہے۔ فلوجہ پر پہلے ہی القاعدہ سے وابستگی رکھنے والے سنی انتہا پسند قابض ہیں۔ دوسری جانب فلوجہ اور رمادی سے سویلینز کی نقل مکانی جاری ہے۔

عراقی وزير اعظم نوری المالکی نے القاعدہ اور اس سے منسلک گروپوں کے خلاف بين الاقوامی کارروائی کی اپيل کی ہے۔ المالکی نے دہشت گردوں کے ساتھ کسی بھی قسم کی بات چيت کو خارج از امکان قرار ديا ہے۔ وزیر اعظم نوری المالکی نے متنبہ کیا ہے کہ صوبے الانبار میں القاعدہ کے خلاف جنگ آسان نہیں لہذا عراقی افواج کو پوری جانفشانی سے مقبوضہ علاقوں کو بازیاب کروانا ہے۔