امریکہ پاکستانی فوج کے ترجمان کے بیان سے متفق
15 اپریل 2022![USA Ned Price](https://static.dw.com/image/60926733_800.webp)
امریکی محکمہ خارجہ کے ترجمان نیڈ پرائس نے کہا ہے کہ وہ پاکستانی فوج کے اس بیان سے اتفاق کرتے ہیں جس میں کہا گیا ہے کہ عمران خان کی حکومت کے خلاف "سازش" میں امریکہ کے ملوث ہونے کے شواہد نہیں ہیں۔
جمعے کے روز معمول کی پریس بریفنگ میں جب امریکی وزارت خارجہ کے ترجمان سے پوچھا گیا کہ پاکستان فوج کے ترجمان نے کہا ہے کہ عمران خان کی حکومت کے خاتمے کی دھمکی یا سازش میں امریکہ کے ملوث ہونے کے شواہد نہیں ملے ہیں، اس پر آ پ کیا کہیں گے؟ تو اس کے جواب میں نیڈ پرائس نے کہا،"ہم ان سے اتفاق کرتے ہیں۔"
جب نیڈ پرائس سے کہا گیا کہ پاکستان کے سابق وزیر اعظم عمران خان اپنے دعوے پر قائم ہیں اور اب بھی امریکہ پر ہی الزام عائد کررہے ہیں تو انہوں نے کہا،"اس حوالے سے ہمارا پیغام واضح ہے۔"
عمران خان کا دعویٰ
نیڈ پرائس نے مزید کہا،"ان الزامات میں کوئی حقیقت نہیں ہے۔ ہم آئینی اور جمہوری اقدار، جن میں انسانی حقوق بھی شامل ہیں، کی پرامن پاسداری کی حمایت کرتے ہیں۔" انہوں نے ایک بار پھر زور دیتے ہوئے کہا،"ہم پاکستان یا دنیا میں کہیں بھی کسی ایک سیاسی جماعت پر دوسری کو ترجیح نہیں دیتے۔"
یاد رہے کہ پاکستانی فوج کے ترجمان میجر جنرل بابر افتخار نے جمعرا ت کو پریس کانفرنس کے دوران کہا تھا کہ قومی سلامتی کمیٹی کے اعلامیے میں کسی "سازش" کا ذکر نہیں ہے۔
واضح رہے کہ عمران خان گزشتہ کئی روز سے امریکہ میں تعینات پاکستانی سفیر کی جانب سے لکھے گئے ایک خط کا ذکر کرتے رہے ہیں۔ عمران خان کا دعویٰ رہا ہے کہ ان کی حکومت گرانے کے لیے سازش امریکہ نے تیار کی تھی اور اسی سازش کے تحت اپوزیشن ان کے خلاف عدم اعتماد کی تحریک لائی تھی۔
پاکستان کے ساتھ تعاون جاری رکھنے کا وعدہ
امریکی وزارت خارجہ کے ترجمان کا کہنا تھا کہ امریکہ پاکستان میں امن اور خوشحالی کے فروغ کے لیے پاکستان کی حکومت کے ساتھ مل کر کام جاری رکھے گا۔
نیڈ پرائس نے کہا کہ امریکہ اورپاکستان کے تعلقات گزشتہ 75برس سے اہم رہے ہیں اور "واشنگٹن اسلام آباد کے ساتھ مل کر پاکستان اور خطے میں امن و ترقی کے لیے کام کرنے کو تیار ہے۔"
انہوں نے کہا کہ پاکستان کے ساتھ تعلقات کی خواہش کے تحت ہی امریکہ نے نو منتخب وزیر اعظم شہباز شریف کی نئی حکومت کے قیام کے بعد انہیں مبارک باد کا پیغام بھیجا۔
نیڈ پرائس کا کہنا تھا،"ہم پاکستان میں امن اور خوشحالی کے فروغ کے لیے پاکستان کی حکومت کے ساتھ مل کر کام جاری رکھیں گے، اور اسی نیت سے ہم نے وزیراعظم شہباز شریف کو پاکستان کی پارلیمان کی جانب سے منتخب کیے جانے پر مبارکباد دی۔"
ج ا / ص ز (ایجنسیاں)