ایک سینیئر پولیس افسر سہیل سکھیرا نے خبر رساں ادارے اے پی کو بتایا کہ عمران خان کی رہائش گاہ کے باہر ناجائز تجاوزات ہٹائی گئیں۔ انہوں نے بتایا کہ اس دوران عمران خان کے حامیوں نے پولیس اہلکاروں پر پتھراؤ کیا اور پیٹرول بم پھینکے جب کہ عمارت کی چھت سے ایک شخص نے پولیس پر فائرنگ بھی کی۔

عمران خان کے وارنٹ گرفتاری منسوخ، تیس مارچ کو عدالت میں طلب

کیا عمران خان مفاہمت کی راہ اپنائیں گے؟

سکھیرا کا کہنا تھا کہ عمران خان کی رہائش گاہ کے مرکزی دروازے تک جانے والے راستے پر کنکریٹ کے بلاک، خیمے اور دیگر رکاوٹیں موجود تھیں، جنہیں ہٹایا گیا۔

یہ آپریشن اس وقت کیا گیا، جب عمران خان لاہور میں زمان پارک کے علاقے میں واقع اپنی اس رہائش گاہ میں موجود نہیں تھے۔ عمران خان گزشتہ روز اسلام آباد میں ایک عدالت میں مقدمے کی سماعت کے لیے پیشی پر گئے ہوئے تھے۔ اس مقدمے کی سماعت مقامی عدالت نے تیس مارچ تک ملتوی کر دی ہے۔

عمران خان کی عدالتی پیشی کے موقع پر بھی جوڈیشل کمپلیکس کے باہر پی ٹی آئی کے کارکنان اور پولیس کے درمیان جھڑپیں ہوئیں۔

دوسری جانب عمران خان نے الزام عائد کیا ہے کہ ان کی رہائش گاہ پر چھاپے کے دوران پولیس نے غیرقانونی طور پر توڑ پھوڑ کی۔ پی ٹی آئی کی جانب سے پولیس پر عمران خان کے ملازمین کو تشدد کا نشانہ بنانے کا الزام بھی عائد کیا گیا ہے۔

دریں اثناء پاکستانی وزیر داخلہ رانا ثنااللہ نے کہا ہے کہ پولیس کو عمران خان کی رہائش گاہ سے غیرقانونی ہتھیار اور گولیاں ملی ہیں اور شبہ ہے کہ اس عمارت سے مزید ہتھیار اور دیگر اسلحہ برآمد ہو سکتا ہے، اس لیے پولیس اس عمارت کی تفصیلی تلاشی لے گی۔

ع ت، ع س (اے پی)