پاکستانی وزیر اعظم عمران خان نے منگل کے دن اپنے آفیشل ٹوئٹر اکاؤنٹ پر بھارتی قومی کرکٹ ٹیم کے کپتان ویراٹ کوہلی اور ان کی ٹیم کو مبارکباد دی ہے۔ انہوں نے لکھا کہ اکہتر برسوں میں پہلی مرتبہ کسی برصغیر کی ٹیم نے آسٹریلوی کرکٹ ٹیم کو اسی کے ملک میں ٹیسٹ سیریز میں مات دی ہے، جس پر وہ بھارتی ٹیم کو مبارکباد دیتے ہیں۔
بھارتی کرکٹ ٹیم نے پہلی مرتبہ آسٹریلیا میں کسی ٹیسٹ سیریز میں کامیابی حاصل کی ہے۔ ویراٹ کوہلی کے مطابق یہ جیت ان کے کیریئر کا سب سے زیادہ بڑا کارنامہ ہے اور وہ اس پر فخر محسوس کر رہے ہیں۔
پاکستانی قومی کرکٹ ٹیم کے سابق ٹیسٹ کپتان عمران خان کی طرف سے بھارتی قومی ٹیم کے لیے مبارکبادی پیغام کو انتہائی مثبت انداز میں لیا جا رہا ہے۔ سوشل میڈیا کے کئی صارفین نے اسے عمران خان کی فراخدالی سے تعبیر کرتے ہوئے دونوں روایتی حریف ممالک کے مابین دوستی کے ایک نئے باب سے بھی تعبیر کر دیا ہے۔
سدھرینے کلکرنی نے عمران خان کے اس ٹوئٹ پر تبصرہ کرتے ہوئے کہا کہ اس مبارکبادی پیغام سے انہوں نے بہت سے بھارتیوں کے دل جیت لیے ہیں۔ انہوں نے مزید کہا کہ یہ اچھا اشارہ ہے۔ کئی بھارتی شہریوں نے یہ بھی کہا ہے کہ موقع ہے کہ دونوں ممالک دوستی کے لیے قدم آگے بڑھائیں۔
پاکستانی صارف کاشف علی نے وزیرا عظم عمران خان سے اپیل کی ہے کہ وہ پاکستانی قومی کرکٹ ٹیم کی صورتحال بہتر بنانے کی کوشش کریں تاکہ پاکستانی ٹیم کو بھی اسی طرح مبارکباد دی جا سکے۔ کئی دیگر صارفین نے بھی اسی طرح کے خیالات کا اظہار کیا ہے۔
عمران خان کی طرف سے اس ٹوئٹ کے بعد نہ صرف بھارتی بلکہ پاکستانی میڈیا نے بھی اس کی بھرپور انداز میں کوریج کی ہے۔ پاکستان کے مایہ ناز سابق فاسٹ بولر شعیب اختر نے بھی اپنی ایک ٹوئٹ میں بھارتی کرکٹ ٹیم کو آسٹریلیا میں جیتنے پر مبارکباد دی ہے۔ بھارت میں وزیر اعظم اور صدر کے علاوہ تمام شعبہ ہائے زندگی سے تعلق رکھنے والی مشہور شخصیات نے بھی اس بھارتی کامیابی کو تاریخی قرار دیتے ہوئے خوشی کا اظہار کیا ہے۔
’کیپٹن کول‘ مہندر سنگھ دھونی نے محدود اوورز کے کرکٹ فارمیٹ میں بھی کپتان کی ذمہ داری چھوڑنے کا اعلان کر دیا ہے۔ اس موقع پر تذکرہ کرتے ہیں، بھارت کے کامیاب ترین ٹیسٹ کپتان 35 سالہ دھونی کے کیریئر کی کچھ کامیابیوں کا۔
تصویر: APنو سال تک بھارتی کرکٹ ٹیم کی قیادت کرنے والے دھونی نے ٹیم کو کئی ٹرافیاں جتوائیں۔ تاہم جنوری میں ہونے والی انگلینڈ سیریز میں اب وہ ویراٹ کوہلی کی کپتانی میں بطور وکٹ کیپر بلے باز کھیلیں گے۔
وکٹ کیپر بلے باز مہندر سنگھ دھونی بنیادی طور پر جھاڑکھنڈ سے ہیں۔ وہیں رانچی شہر میں 7 جولائی سن 1981 کو ان کا جنم ہوا تھا۔
’ماہی‘ کے نام سے پکارے جانے والے اس کرکٹر نے سن 2005 میں سری لنکا کے خلاف کھیل کر اپنے ٹیسٹ کیریئر کا آغاز کیا تھا۔ چنئی میں کھیلے گئے اس میچ میں بارش نے رکاوٹ ڈال دی تھی۔ اس میچ میں دھونی نے 30 رنز کی انفرادی اننگز کھیلی تھی۔
دھونی نے بھارت کے لیے اب تک 90 ٹیسٹ میچ کھیلے ہیں۔ ان میں انہوں نے قریب 38 کی اوسط سے کل 4876 رنز بنائے، جن میں چھ سنچریاں اور 33 نصف سنچریاں بھی شامل ہیں۔
دھونی نے ٹیسٹ میچوں میں اب تک وکٹ کے پیچھے 256 کیچ پکڑے جبکہ 38 کھلاڑیوں کو سٹمپ آؤٹ بھی کیا۔ اسی لیے وہ بھارتی کرکٹ کے سب سے زیادہ کامیاب وکٹ کیپر مانے جاتے ہیں۔
وکٹ کیپر بلے باز کے طور پر دھونی نے اپنا پہلا ایک روزہ میچ بنگلہ دیش کے خلاف سن 2004 میں کھیلا۔ اس میچ میں دھونی پہلی ہی گیند پر رن آؤٹ ہو گئے تھے۔
سن 2007 میں دھونی کو راجیو گاندھی کھیل رتن سے نوازا گیا جو کہ بھارت میں کھیلوں کا سب سے بڑا انعام ہے۔
اب تک دھونی نے 283 ون ڈے میچ کھیلے ہیں، جن میں انہوں نے 9110 رنز بنائے ہیں۔ ان کا اسٹرائیک ریٹ 88 سے بھی زیادہ ہے۔ اس فارمیٹ میں دھونی نے 9 سنچریاں اور 61 نصف سنچریاں بھی بنائی ہیں۔
دھونی 73 ٹی ٹوئنٹی انٹرنیشنل بھی کھیل چکے ہیں۔ ان کی کپتانی میں ہی بھارت نے سن 2007 میں منعقدہ پہلا ٹوئنٹی ٹوئنٹی ورلڈ کپ جیتا تھا۔ اس میچ میں بھارت نے پاکستان کو فائنل میں شکست دے دی تھی۔
سال 2011 میں دھونی کی کپتانی میں ہی بھارتی ٹیم نے عالمی ورلڈ کپ جیتا تھا۔ دھونی کی قیادت میں ہی دسمبر سن 2009 سے لے کر 18 ماہ تک بھارتی کرکٹ ٹیم دنیا کی نمبر ایک ٹیسٹ ٹیم بنی رہی تھی۔
دھونی نے کمائی کے معاملے میں ماسٹر بلاسٹر سچن تندولکر کو بھی پیچھے چھوڑ دیا ہے۔ پرائیویسی پسند کرنے والے دھونی سب سے زیادہ رقوم کمانے والے بھارتی کھلاڑی ہیں۔
