عید کے بعد پاکستانی شہریوں میں پیٹ کی بیماریوں میں اضافہ
4 جولائی 2023![Eid celebration in Pakistan](https://static.dw.com/image/62417947_800.webp)
ملک کے سب سے بڑے شہر کراچی میں ایک جانب اگر انتظامیہ کی غفلت اور لاپروائی کے باعث جگہ جگہ گندگی اور غلاظت کے ڈھیر بیماریوں کا باعث بنے تو دوسری جانب شہریوں کو خود اپنی بداحتیاطی کی وجہ سے بھی مختلف ہسپتالوں کو رخ کرنا پڑ گیا۔ صوبہ سندھ کے سرکاری ہسپتالوں کے اعداد و شمار کے مطابق رواں سال عیدالاضحٰی کے فوری بعد عام شہریوں میں زہر خورانی یا فوڈ پوائزننگ کے کیسوں میں بہت زیادہ اضافہ دیکھنے میں آیا ہے۔
عید کے دنوں میں کتنے مریض ہسپتالوں میں لائے گئے؟
گزشتہ تین روز کے دوران صرف سول ہسپتال کراچی میں ہی 1700 سے زائد فوڈ پوائزننگ کے کیس رپورٹ ہوئے۔ ہسپتال انتظامیہ کے مطابق عید کے دوسرے روز 400، تیسرے روز 600 جبکہ گزشتہ روز 670 سے زائد ایسے کیسز رپورٹ ہوئے اور تمام مریضوں کی عمریں 12 سال سے زائد تھیں۔
فوڈ پوائزننگ سے زیادہ متاثر کون ہوئے؟
ڈاکٹر عبد السمیع نے ڈی ڈبلیو سے گفتگو کرتے ہوئے بتایا کہ قربانی کے گوشت کے بے جا استعمال اور جگہ جگہ جانوروں کی آلائشوں کی موجودگی سے بہت چھوٹے بچوں کو چھوڑ کر تقریباﹰ ہر عمر کے شہری متاثر ہوئے۔ انہوں نے کہا کہ عام حالات میں فوڈ پوائزننگ ہو جائے، تو قے اور اسہال کی وجہ سے ہونے والی پانی کی کمی کو مریض پانی پی کر خود بھی پورا کر سکتے ہیں اور ڈی ہائی ڈریشن کوئی بڑا مسئلہ نہیں رہتا۔ تاہم حاملہ خواتین میں حمل کے باعث جسم میں رونما ہونےوالی میٹابولک اور دوسری تبدیلیوں کی وجہ سے فوڈ پوائزننگ کا خطرہ زیادہ بڑھ جاتا ہے اور اگر ایسا ہو جائے تو اس کا جسمانی ردعمل خطرناک بھی ہو سکتا ہے۔
کچا پکا گوشت کھانے کے نقصانات
طبی امور کے ماہر ڈاکٹرندیم عالم نے ڈی ڈبلیو کو بتایا کہ قدرے کچا یا کم پکا ہوا گوشت کھانے سے بھی کئی طرح کی بیماریوں کا خطرہ پیدا ہو جاتا ہے۔ اس لیے گوشت صرف اسی وقت کھانا چاہیے جب وہ اچھی طرح پکا ہوا ہو۔ انہوں نے کہا کہ گوشت کی بنی ہوئی ایسی ڈشیں جو اچھی طرح پکائی نہ گئی ہوں، ان کے کھانے سے بھی فوڈ پوائزننگ کا سامنا کر نا پڑ سکتا ہے۔
نظام ہضم کی بیماریوں کی ایک وجہ آلودہ پانی بھی
ماہر امراض اطفال ڈاکٹر ثاقب انصاری کا کہنا ہے کہ ہر سال عيدالاضحیٰ کے موقع پر نظام ہضم کی مختلف بیماریاں اور آنتوں ميں انفيکشن کی غیر معمولی شرح اب معمول بن چکی ہیں۔
کراچی ميں بچوں اور بڑوں ميں گيسٹرو بیماریاں پھيلنے کی ایک بڑی وجہ پينے کے پانی ميں پائی جانے والی آلودگی بھی ہے۔ ڈاکٹر ثاقب انصاری کے مطابق شہر ميں پینے کے پانی کی فراہمی کا نظام برسوں پرانا ہے، جس کی وجہ سے اس پانی میں زیر زمین آلودگی بھی شامل ہو جاتی ہے اور یہی بات معدے اور آنتوں کے کئی طرح کے امراض کا سبب بنتی ہے۔
ان کا کہنا تھا کہ عام شہری اگر پانی ابال کر استعمال کریں تو کئی بیماریوں سے محفوظ رہ سکتے ہیں۔
دوسری طرف چھوٹے بچوں کے لیے فوڈ پوائزننگ اس لیے خطرناک ہو سکتی ہے کہ ان کا جسمانی مدافعتی نظام ابھی پوری طرح بہت مضبوط نہیں ہوا ہوتا اور فوری علاج نہ ہونے کی صورت میں کم سن مریضوں کی حالت بگڑ بھی سکتی ہے۔
میئر مرتضیٰ وہاب کا موقف
کراچی کے نومنتخب میئر مرتضیٰ وہاب صوبائی دارالحکومت میں صفائی کی موجودہ صورت حال کو تسلی بخش قرار دیتے ہیں۔ انہوں نے ڈی ڈبلیو کے ساتھ گفتگو کرتے ہوہے کہا کہ یہ تاثر درست نہيں کہ عيدالاضحیٰ کے موقع پر قربانی کے جانوروں کی جسمانی آلائشوں سے پھیلنے والی گندگی کی وجہ سے شہریوں میں فوڈ پوائزننگ کے واقعات ميں اضافہ ہوا ہے۔
کراچی کا میئر: کیا جمہوری عمل کو پھر روندھ دیا گیا؟
مرتضیٰ وہاب کا کہنا تھا کہ شہر میں صفائی ستھرائی کے مثالی اقدامات کیے گئے اور اس عمل کو تمام اداروں نے اپنی بروقت محنت سے یقینی بنایا۔ کراچی کے میئر نے یہ بھی کہا کہ سندھ کی صوبائی حکومت اور شہر کی بلدیاتی انتظامیہ مل کر کراچی کے حالات میں بہتری کی بھرپور کوششیں کر رہی ہیں۔