ایک نئے قانونی مسودے کے مطابق جرمن شہریت حاصل کرنے والے کسی غیر ملکی کے بارے میں حکام کو اگر یہ معلوم ہو جائے کہ اس نے اپنی حقیقی شناخت سے متعلق غلط بیانی کی تھی تو شہریت دیے جانے کے دس برس بعد بھی ایسے شخص کا جرمن پاسپورٹ معطل کیا جا سکے گا۔

وفاقی جرمن وزارت داخلہ، ملکی شہریت سے متعلق قوانین میں تبدیلی کا یہ مسودہ رواں برس موسم خزاں کے اوائل میں ملکی پارلیمان میں پیش کرنے کا منصوبہ رکھتی ہے۔ جرمن نیوز ایجنسی ڈی پی اے سے گفتگو کرتے ہوئے وزارت داخلہ کے سیکرٹری ہیلموٹ ٹائشمان کا کہنا تھا کہ ملکی شہریت کے قوانین میں اصلاحات جرمنی کی وفاقی ریاستوں کا ایک دیرینہ مطالبہ تھا۔

موجودہ قوانین کے تحت حکام اگر غیر ملکی افراد کو جرمن شہریت ملنے کے پانچ برس کے اندر اندر یہ جان پائیں کہ انہوں نے اپنی حقیقی شناخت کے بارے میں غلط بیانی کی تھی تو ہی ان کا جرمن پاسپورٹ معطل کیا جا سکتا تھا۔ تاہم پانچ سال کی مدت کے بعد حقیقت سامنے آنے کے بعد ایسے افراد کے خلاف کارروائی ممکن نہیں تھی۔

گزشتہ برس وفاقی وزارت داخلہ نے سولہ وفاقی صوبوں کے حکام سے ایسے افراد کے بارے میں اعداد و شمار طلب کیے جن کی حقیقی شہریت کے بارے میں انہیں جرمن پاسپورٹ دیے جانے کے پانچ برس بعد علم ہوا تھا۔ ٹائشمان کے مطابق سبھی وفاقی ریاستوں سے اعداد و شمار جمع نہیں کیے جا سکے تھے لیکن پھر بھی ایسے ڈھائی سو کیس سامنے آئے۔

گزشتہ بیس برسوں کے دوران جرمن عدالتوں میں بھی ایسے سینکڑوں مقدمے چلائے گئے جن میں سے زیادہ تر میں ایسے ترک باشندے ملوث پائے گئے جنہوں نے خود کو لبنانی شہری ظاہر کر کے جرمن شہریت حاصل کی تھی۔ سن 2008 میں ایسے ہی ایک مقدمے کے فیصلے میں جرمنی کی ایک انتظامی عدالت نے لکھا تھا کہ شہریت ملنے کے پانچ برس بعد اپنی اصل شہریت چھپانے والے شخص کے خلاف کارروائی نہیں کی جا سکتی۔

وفاقی وزارت داخلہ کے مطابق اس ضمن میں حقائق جاننے کے لیے پانچ سال کی حد ناکافی تھی اسی لیے اسے بڑھا کر دس برس کیا جا رہا ہے تاہم ٹائشمان کا یہ بھی کہنا تھا کہ غیر معینہ مدت عملی طور پر ممکن نہیں ہے۔

ش ح / ا ب ا (ڈی پی اے)