آسٹریا کے چانسلر سیباستیان کرس نے اس تناظر میں’ویلٹ آم زونٹاگ‘ کو انٹرویو دیتے ہوئے مزید کہا کہ یورپ کی بیرونی سرحدوں کے نگران ادارے ’فرونٹیکس‘ کو تاہم اس حوالے سے ایک نیا مینڈیٹ چاہیے ہو گا، ’’اس نئے مینڈیٹ میں ان ممالک کی رضامندی بھی شامل ہو گی، جن میں سرحدی محافظین کو تعینات کیا جانا ہو گا۔‘‘
آسٹریا کے چانسلر کے بقول، ’’اس کا مقصد یہ ہے کہ انسانوں کا کاروبار کرنے والوں کے غلیظ طریقہ تجارت کو ختم کیا جائے اور ان کے لیے مشکلات پیدا کی جائیں تاکہ یورپ آنے کے خواہش مند افراد سے بھری کشیتاں بحیرہ روم کا سفر شروع نہ کر سکیں‘‘۔
سیباستیان کرس کے مطابق فرونٹیکس کو چاہیے کہ وہ غیر قانونی مہاجرین کو بیرونی سرحدوں پر روکے، ’’مثالی طور پر تو ایسا ہونا کہ ابتدائی دیکھ بھال کے بعد فرونٹیکس فوری طور پر ان مہاجرین کو ان کے آبائی وطن روانہ کرے یا پھر انہیں کسی ٹرانزٹ ملک بھیج دیا جائے‘‘۔
اس سال اکتیس اکتوبر تک ڈیڑھ لاکھ سے زائد انسان کشتیوں میں سوار ہو کر بحیرہ روم کے راستوں کے ذریعے یورپ پہنچے، اور 3 ہزار افراد ہلاک یا لاپتہ بھی ہوئے۔ ان سمندری راستوں پر سفر کرنے والے پناہ گزینوں کا تعلق کن ممالک سے ہے؟
تصویر: Reuters/A. Konstantinidisیو این ایچ سی آر کے اعداد و شمار کے مطابق اس برس اکتوبر کے آخر تک بحیرہ روم کے ذریعے اٹلی، یونان اور اسپین پہنچنے والے ڈیڑھ لاکھ تارکین وطن میں سے بارہ فیصد (یعنی قریب سترہ ہزار) پناہ گزینوں کا تعلق افریقی ملک نائجیریا سے تھا۔
خانہ جنگی کے شکار ملک شام سے تعلق رکھنے والے مہاجرین کی تعداد پچھلے دو برسوں کے مقابلے میں اس سال کافی کم رہی۔ اقوام متحدہ کے ادارہ برائے مہاجرین کے مطابق ساڑھے چودہ ہزار شامی باشندوں نے یورپ پہنچنے کے لیے سمندری راستے اختیار کیے۔
اس برس اب تک وسطی اور مغربی بحیرہ روم کے سمندری راستوں کے ذریعے یورپ کا رخ کرنے والے گیارہ ہزار چھ سو پناہ گزینوں کا تعلق مغربی افریقی ملک جمہوریہ گنی سے تھا۔
براعظم افریقہ ہی کے ایک اور ملک آئیوری کوسٹ کے گیارہ ہزار سے زائد شہریوں نے بھی اس برس بحیرہ روم کے سمندری راستوں کے ذریعے پناہ کی تلاش میں یورپ کا رخ کیا۔
جنوبی ایشیائی ملک بنگلہ دیش کے قریب نو ہزار شہری اس سال کے پہلے دس ماہ کے دوران خستہ حال کشتیوں کی مدد سے بحیرہ روم عبور کر کے یورپ پہنچے۔ مہاجرت پر نگاہ رکھنے والے ادارے بنگلہ دیشی شہریوں میں پائے جانے والے اس تازہ رجحان کو غیر متوقع قرار دے رہے ہیں۔
شمالی افریقی مسلم اکثریتی ملک مراکش کے ساحلوں سے ہزارہا انسانوں نے کشتیوں کی مدد سے یورپ کا رخ کیا، جن میں اس ملک کے اپنے پونے نو ہزار باشندے بھی شامل تھے۔
مشرق وسطیٰ کے جنگ زدہ ملک عراق کے باشندے اس برس بھی پناہ کی تلاش میں یورپ کا رخ کرتے دکھائی دیے۔ اقوام متحدہ کے اعداد و شمار کے مطابق رواں برس کے پہلے نو ماہ کے دوران چھ ہزار سے زائد عراقی شہریوں نے سمندری راستوں کے ذریعے یورپ کا رخ کیا۔
ان دونوں افریقی ممالک کے ہزاروں شہری گزشتہ برس بڑی تعداد میں سمندر عبور کر کے مختلف یورپی ممالک پہنچے تھے۔ اس برس ان کی تعداد میں کچھ کمی دیکھی گئی تاہم اریٹریا اور سینیگال سے بالترتیب ستاون سو اور چھپن سو انسانوں نے اس برس یہ خطرناک راستے اختیار کیے۔
بحیرہ روم کے پر خطر سمندری راستوں کے ذریعے اٹلی، یونان اور اسپین پہنچنے والے پاکستانی شہریوں کی تعداد اس برس کے پہلے نو ماہ کے دوران بتیس سو کے قریب رہی۔ گزشتہ دو برسوں کے دوران ایک لاکھ سے زائد پاکستانیوں نے مختلف یورپی ممالک میں پناہ کی درخواستیں دی تھیں۔
رواں برس کے دوران افغان شہریوں میں سمندری راستوں کے ذریعے یورپ پہنچنے کے رجحان میں نمایاں کمی دیکھی گئی۔ یو این ایچ سی آر کے مطابق اس برس اب تک 2770 افغان شہریوں نے یہ پر خطر بحری راستے اختیار کیے۔
یورپی یونین میں گزشتہ کئی مہینوں سے پناہ گزینوں کی تقسیم کے معاملے پر اختلاف رائے کے بارے میں کرس نے مزید کہا کہ مہاجرین کے بحران کا یہ کوئی دیرپا حل نہیں ہے، ’’میرے خیال میں آسٹریا یورپی یونین میں مہاجرین کی تقسیم کے حوالے سے کوٹے کے حق میں فیصلہ نہیں کرے گا اور خاص طور پر اگر اس میں گزشتہ برسوں کے دوران مہاجرین کی بڑے پیمانے پر آمد کے حوالے سے اعداد و شمار شامل نہیں کیے جاتے۔‘‘
کرس نے اپنے اس انٹرویو میں یورپی یونین کے داخلی مسائل کا تذکرہ کرتے ہوئے کہا، ’’مغرب اس تناظر میں مشرق پر تنقید کرتا ہے اور شمال جنوب کی شکایت کرتا ہے۔‘‘ ان کے بقول یورپی یونین میں اخلاقی اعتبار سے بارہا اس موضوع پر بات کی جاتی ہے لیکن ابھی تک کوئی نتیجہ نہیں نکل سکا۔
