جرمن اور فرانسیسی وزرائے دفاع نے مل کر انتہائی جدید جنگی طیارہ بنانے کے پراجیکٹ کو حتمی شکل دے دی ہے۔ اس کا اعلان جرمن وزیر دفاع انے گریٹ کرامپ کارین باؤر نے اپنے ہم منصب کے ساتھ منگل کو فرانسیسی دارالحکومت پیرس میں ایک ملاقات کے بعد کیا۔

نیا ایرانی لڑاکا طیارہ ’قاہر‘ اگلے ہفتے متعارف کرایا جائے گا

حل طلب معاملات

جرمن وزیر دفاع نے بتایا کہ اس نئے جنگی طیارے کی تخلیق میں چند معاملات ابھی حل طلب ہیں۔ ان میں انجن سازی، قانونی مسائل کا حل اور بعض دیگر معاملات کے لیے ضروری کلیرنس شامل ہیں۔

ان کا کہنا تھا کہ،''سیاستدانوں کی حیثیت سے انہیں امید ہے کہ اس پراجیکٹ کے لیے مشترکہ لائحہ عمل جلد مرتب کیا جائے۔‘‘

فرانس کے مسلح افواج کے وزیر فلورنس پارلی نے صحافیوں کو بتایا کہ انہیں توقع ہے کہ اپریل کے آخر تک اس پراجیکٹ کے حوالے سے معاملات طے ہوجائیں گے۔

امریکا ترکی کو جنگی جہاز نہیں دے گا

نیا جنگی طیارہ

اس نئے جنگے طیارے کو فی الحال 'دی ڈیمانسٹریٹر‘ کا نام دیا گیا ہے۔ ڈیل طے ہونے کے بعد پہلا لڑاکا جہاز سن 2026 میں آزمائشی پروازیں شروع کرے گا۔ اس وقت اس پراجیکٹ کی راہ میں حائل مختلف ذمہ داریوں کا تعین اور انتہائی جدید ٹیکنالوجی کے استعمال کے انٹلیکچوئل پراپرٹی حقوق کا تعین کرنا باقی ہے۔

فرانس اور جرمنی میں کچھ عرصے پہلے تعلقات میں سرد مہری آگئی تھی جس کے باعث یہ منصوبہ بظاہر کھٹائی میں پڑگیا تھا۔ تاہم اب صورت حال بہتر ہونے کے بعد جہاز کی ڈیل کا امکان پیدا ہوا ہے اور جہاز کی تیاری کے لیے ایئر بس اور فرانسیسی طیارہ ساز کمپنی داسو کے درمیان ایک ڈیل طے پا گئی ہے۔

مستقبل کا جنگی ہوائی نظام (FCAS)

داسو اور ایئر بس مستقبل کی ضروریات کے حامل 'جنگی فضائی نظام‘ (Future Combat Air System) کے لیے پرزے اور آلات بنائیں گے۔ اس نظام (FCAS) کی بدولت یورپی یونین اپنی عسکری حاکمیت کی صلاحیت میں خاطر خواہ اضافہ کر سکے گی۔ ابھی تک کی بات چیت میں یہ طے پایا ہے کہ نیا جنگی نظام (FCAS) سن 2040 میں پوری طرح فعال کر دیا جائے گا۔

بھارت روس سے اربوں ڈالر کے 33 جدید ترین جنگی طیارے خریدے گا

اس نظام کو فعال کرنے میں جنگی طیاروں کے علاوہ ڈرونز اور سیٹلائٹس بھی بنائے جائیں گے۔ داسو کے ذمے جنگی جہاز بنانا ہو گا جبکہ ایئربس ڈرونز اور 'کومبیٹ کلاؤڈ کمبینیکیشن نیٹ ورک‘ ڈیزائن کرے گا۔ اس بڑے پراجیکٹ میں جرمنی اور فرانس کے ساتھ اسپین بھی شامل ہو گا۔

ع ح، ش ج (ڈی پی اے، روئٹرز)