فرانس  میں اتوار کو ہونے والی ووٹنگ دراصل  تیس جون کو ہونے والے پہلے مرحلے کی ووٹنگ میں زیادہ تر حلقوں میں واضح نتائج سامنے نہ آنے کی وجہ سے ہو رہی ہے۔ اس حتمی مرحلے میں صدر ماکروں کو بھاری اکثریت نہ ملنے کے امکانات قوی ہیں۔ نو جون کو یورپی  الیکشن میں امیگریشن مخالف قوم پرست جماعت کی زبردست کامیابی کے بعد صدر ماکروں نے فرانس میں قبل از وقت انتخابات کا انتہائی حیران کن اعلان کیا تھا۔ اس طرح انہوں نے یہ ایک بڑا جوا کھیلا تھا جس میں فرانسیسی ووٹرز انتہائی دائیں بازو کی پارٹی کو بلاک کر سکتے تھے جیسا کہ وہ ماضی میں ہمیشہ کرتے آئے ہیں۔

لیکن 30 جون کو ہونے والی ووٹنگ کے پہلے راؤنڈ میں نیشنل ریلی نے اس کی بجائے پہلے سے کہیں زیادہ ووٹ حاصل کیے۔ اس کی رہنما   مارین لے پین  نے اپنے ووٹرز سے اپیل کی ہے کہ وہ ان کو قطعی اکثریت دلانے کے لیے اپنا ووٹ استعمال کریں۔

اتوار کی ووٹنگ کے نتائج اس امر کا تعین کریں گے کہ کون سی سیاسی جماعت قومی اسمبلی کا کنٹرول سنبھالے گی اور وزیر اعظم کون بنے گا۔ اگر کسی سیاسی جماعت کو مطلق اکثریت حاصل نہ ہوئی تو  غالباً تین بلاکس قریب ایک ہی جتنی تعداد میں نشستیں جیت پائیں گے۔ انتہائی دائیں بازو کی نیشنل ریلی، بائیں بازو کی جماعت نیو پاپولر فرنٹ اور دباؤ کا شکار قدامت پسند اور مرکزیت پسند گروہ۔ ماہرین کا ماننا ہے کہ الیکشن کے دوسرے مرحلے کے نتائج کچھ بھی ہوں فرانس  میں آئندہ مہینوں میں ایک بڑے  سیاسی بحران  کے خطرات کے سائے منڈلا رہے ہیں اور یہ صورتحال یورپی سطح پر ایک نئی سیاسی بحث اور ایجنڈا کو جنم دے سکتی ہے۔

فرانس میں آج  ہونے والی پارلیمانی انتخابات کے دوسرے مرحلے کی ووٹنگ کے ابتدائی نتائج چھ بجے شام کو ووٹنگ کے سلسلے کے اختتام کے بعد رات دیر گئے اور پیر کی صبح تک متوقع  ہیں۔

ک م/ ا ب ا(اے پی ای)